Munda Bible
ଯିଶାୟ 27
ଇସ୍ରାଏଲ୍ରାଃ ପାରିତ୍ରାଣ୍
ଏନ୍ ହୁଲାଙ୍ଗ୍ ପ୍ରାଭୁ, ଆୟାଃ ଆପ୍ନାଃ ମାହୁଁରାତେ, ମାରାଙ୍ଗ୍ ଓଡ଼ୋଃ ପେଡ଼େୟାନ୍ ତାରାଉଡ଼ିତେ ଓଡ଼ୋଃ ନେତେହେନ୍ତେ ରେଙ୍ଗାଅଃତାନ୍ ବିଙ୍ଗ୍ ଲିବିୟାଥନ୍କେ ସାଜାଇ ଏମାଇୟା, ଇନିଃ ଏନ୍ ଦରେୟାରେନ୍ ମାରାଙ୍ଗ୍ ଜାଁତୁକେ ଜିୟନ୍ ରିକାଇୟା।
ଏନ୍ ହୁଲାଙ୍ଗ୍ ନାଗେନ୍ତେ ମିଆଦ୍ ଦାଖ୍ବାକ୍ଡ଼ି ବାଇକେଦ୍ତେ ସେକାଡ଼୍କାନା। ଆପେ ଏନ୍ ବିଷାଏରେ ଦୁରାଙ୍ଗ୍ ଗାମୁଇପେ। ଆଇଙ୍ଗ୍ଦ ପ୍ରାଭୁ ତାନିଙ୍ଗ୍, ଏନାକେ ଯାତାନ୍ ଇଦିୟାଇଙ୍ଗ୍, ସବେନ୍ ଇମ୍ତା ଏନାରେ ଦାଆଃ ଏମେୟାଇଙ୍ଗ୍, ଜେତାଏ ଏନାକେ ନକ୍ସାନ୍ ରିକା କା ଦାଡ଼ିୟା ନାଙ୍ଗ୍ ଆଇଙ୍ଗ୍ ନିଦାସିଙ୍ଗି ହର ତାନାଇଙ୍ଗ୍। ଆଇଁୟାଃତାଃରେ ଖିସ୍ ବାନଆଃ, ହେଗି, ଅତେ ଦଧାଡ଼ି ଓଡ଼ୋଃ ଜାନୁମ୍ ଲେକାନ୍ ଦାରୁକ ବାଇରି ଲେକା ଆଇଁୟାଃ ବିରୁଧ୍ରେ ତିଙ୍ଗୁନ୍ ରେୟଗି, ଆଇଙ୍ଗ୍ ଏନାକେ ପୁରା ସେଙ୍ଗେଲ୍ରେ ଅଣ୍ଡର୍ତାଃଇଙ୍ଗ୍। କା'ରେଦ ଇନ୍କୁ ଆଇଁୟାଃ ଗୁମାଟ୍ତେ ହିଜୁଃକାକ ଓଡ଼ୋଃ ଆଇଁୟାଃଲଃ ଜୀଉସୁକୁତେ ତାଇନ୍ ନାଙ୍ଗ୍ ଆସ୍ରାରେୟାଃ ଦେଙ୍ଗା ଆସିକାକ ଏନ୍ତେ ଆଇଁୟାଃଲଃ ସୁକୁଜୀଉରେ ତାଇନ୍କାକ।
ଦିପିଲି ସେଟେରା, ଯାକୁବ୍ଆଃ କିଲିରେ ରେହେଦ୍ ଅଡଙ୍ଗ୍ଅଃଆ, ଇସ୍ରାଏଲ୍ ଡେମ୍ବ ସାବେୟାଏ ଓଡ଼ୋଃ ଏନାରେ ବାହା ହବାଅଃଆ ଏନ୍ତେ ଜ ହରାତେ ସବେନ୍ ଅତେକେ ପସାଇଦିୟା। ଇସ୍ରାଏଲ୍କେ ଅକନ୍କ ଦାଲ୍କିୟା, ପ୍ରାଭୁ ଇନ୍କୁକେ ଚିଲ୍କା ଦାଲ୍ କେଦ୍କଆ, ଏନ୍ଲେକା ଚିନାଃ ଇନିଃ ଇସ୍ରାଏଲ୍ ହଡ଼କକେ ଦାଲ୍ କେଦ୍କଆ ? ଇନିଃକେ ଅକନ୍କ ଜିୟନ୍କିୟା, ଇନ୍କୁ ଚିଲ୍କା ମାଆଃ ୟାନା, ଇନ୍କୁ ଲେକା ଚିନାଃ ଇନିଃ ମାଆଃକାନା ? ଆମ୍ ଇନିଃକେ ସାଙ୍ଗିନ୍ତେ କୁଲ୍ ଇମ୍ତା ଇନିଃକେ ସୁଧ୍ରାଅ ନାଗେନ୍ତେ ଇନିଃଲଃ କାପ୍ଜି ରିକାତାନା। ପୁରାବ୍ ସାଃରେ ହୟତାନ୍ ଆନ୍ଧିହୟ ଲେକା, ଏନ୍ ହୁଲାଙ୍ଗ୍ ଇନିଃକେ ଆୟାଃ ଆନ୍ଧିହୟ ହରାତେ ହାର୍ ଆତମ୍ ରିକାଇୟା। ଏନ୍ତେ ଯାକୁବ୍ଆଃ କିଲିକଆଃ ପାପ୍କ ସାଙ୍ଗିନେ ଇମ୍ତା ଇନିୟାଃ ପାପ୍ ଛାମାରେୟାଃ ଜ ହୁଇନାଃ, ଦାଣେଁ ରାକାବ୍ତାନ୍ ବେଦୀରେୟାଃ ଦିରିକକେ ଟୁକ୍ଡ଼ା କେଦ୍ତେ ତରେକ୍ ଲେକା ରିକାୟା। ଏନ୍ତାଃରେ ଜେତାନ୍ ଆଶେରା ମୁରୁତ୍ ଚାଏ ଧୁଆନ୍ ରାକାବ୍ରେୟାଃ ବେଦି କା ତାଇନାଃ। ପେଡ଼େୟାନ୍ ନାଗାର୍ ବିର୍ ଲେକା ସିଃସଏଃ, ବେଗାର୍ ହଡ଼ ଓଡ଼ୋଃ ମାଇଲାକାନ୍ ଠାୟାଦ୍ ହବାକାନା। ଏନ୍ତାଃରେ ବାଛାହନ୍କ ଡେରାଏୟା ଓଡ଼ୋଃ ଇନ୍କୁ ଆତିଙ୍ଗ୍ୟାଁଃକ ଏନ୍ତେ କତରେୟାଃ ସାକାମ୍ ଜମେୟାଃଁକ। ଦାରୁରାଃ କତକ ରହଡ଼ଃ ରେଦ ଏନାକେ ମାଆଃ କେଦ୍ତେ ଟୁକ୍ଡ଼ା ଟୁକ୍ଡ଼ା ରିକାଅଃଆ, ସେଙ୍ଗେଲ୍ ତିଙ୍ଗ୍ ନାଗେନ୍ତେ କୁଡ଼ିକ ଏନାକେ ଇଦିୟାକ। ଚିୟାଃଚି ନେ କିଲିକ ଆଟ୍କାର୍ଉରୁମ୍ ଲେକାନ୍କ ନାହାଁଲାକ, ଏନାମେନ୍ତେ ଇନ୍କୁଆଃ ବାବାଇନିଃ ଇନ୍କୁକେ କାଏ ଦାୟାକଆ। ଅକଏ ଇନ୍କୁକେ ବାଇକେଦ୍କଆ, ଇନ୍କୁଆଃ ଚେତାନ୍ରେ ସାୟାଦ୍ କାଏ ଉଦୁବେୟା। ହେ ଇସ୍ରାଏଲ୍ରେନ୍ ହଡ଼କ, ଏନ୍ ହୁଲାଙ୍ଗ୍ ପ୍ରାଭୁ ଆପେକେ କଲମ୍ ଏତେ ବୁଗିନ୍ ଜ ହୁଣ୍ଡିତାନ୍ ଲେକା ଫରାଦ୍ ଗାଡ଼ା ଏତେ ଏଟେଦ୍କେଦ୍ତେ ମିସାର୍ରେୟାଃ ହୁଡିଙ୍ଗ୍ ଗାଡ଼ା ଜାକେଦ୍ ଆପେକେ ସବେନ୍ ପାର୍ଗାନ୍ ଏତେ ମିଆଦ୍ ମିଆଦ୍ ଲେକା ଆଉ ହୁଣ୍ଡିପେୟା। ଓଡ଼ୋଃ ଏନ୍ ହୁଲାଙ୍ଗ୍ ମାରାଙ୍ଗ୍ ବିଙ୍ଗୁଲ୍ବାଜା ସାଡ଼ିଅଃଆ ଓଡ଼ୋଃ ଆସେରିୟାରେନ୍ ସିଗିଦଃତାନ୍ ହଡ଼କ ଓଡ଼ୋଃ ମିସାର୍ତେ ତଲ୍ ଇଦିକାନ୍ ହଡ଼କ ଯୀରୁଶାଲେମ୍ ରେୟାଃ ପାବିତାର୍ ବୁରୁତେ ହିଜୁଆଃକ ଓଡ଼ୋଃ ପ୍ରାଭୁଆଃ ସେୱା ରିକାୟାକ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.