Munda Bible
ଏନେଟେଦ୍ 50:20
Verse 20 is marked below, with the whole chapter around it. Read from the start
ଇମ୍ତା ଯୋଷେଫ୍ ଆୟାଃ ଆପୁଆଃ ମେଦ୍ମୁହାଁଡ଼୍ରେ ଆୟାଃ ମେଦ୍ମୁହାଁଡ଼୍ ଦହ ତାନ୍ଲଃ ପୁରାଃଗି ରାଆଃକେଦ୍ତେ ଚଅଃକିୟା। ଓଡ଼ୋଃ ଯୋଷେଫ୍ ଆୟାଃ ଆପୁତେୟାଃ ଗୟାକାନ୍ ହଡ଼୍ମ କା ସୟାଅଃ ନାଗେନ୍ତେ ଇନିଃ ଆୟାଃ ବାଇଦ୍କକେ ଆପୁ ଇସ୍ରାଏଲ୍ରାଃ ହଡ଼୍ମରେ ରାକାମ୍ ରାକାମ୍ ସହାନ୍ ସୁନୁମ୍ ଓଡ଼ୋଃ ଜଲମ୍ ଲେକାନ୍ କ୍ରିମ୍କ ଗସଃ କିୟାଃ। ଏନା ୪୦ ଦିନ୍ ଜାକେଦ୍ ବୁଗିନ୍ସହାନ୍ ସୁନୁମ୍ ଗସଃ ଲାଗାଅୟାନା। ଓଡ଼ୋଃ ଇନିଃ ନାଗେନ୍ତେ ମିସାର୍ରେନ୍ ହଡ଼କ ୭୦ ଦିନ୍ ଜାକେଦ୍ ରାଆଃକେଦାଏ।
ଏନ୍ତେ ଏନ୍ ଏୟମ୍ରେୟାଃ ଦିପିଲି ସେନଃୟାନ୍ଚି, ଯୋଷେଫ୍ ଫାରୋଆଃ ଦାସିକକେ କାଜିକେଦ୍କଆ, “ଆଇଙ୍ଗ୍ ଆପେୟାଃ ଆୟାର୍ରେ ସାୟାଦ୍ ନାମାକାଦ୍ ରେଦ, ବିନ୍ତିପେ ତାନାଇଙ୍ଗ୍ ଫାରୋକେ ନେ କାଜି ଉଦୁବାଇପେ।” ଆଇଁୟାଃ ଆପୁ କିରିୟା କେଦ୍ତେ କାଜିକାଦ୍ ତାଇକେନା, ଆଇଙ୍ଗ୍ ଗଜଃରେଦ, କିନାନ୍ ଦିଶୁମ୍ରେ ଅକ ତପା ଠାୟାଦ୍ ଉରା କାଦା, ଏନାରେ ଆଇଙ୍ଗ୍କେ କାବାର୍ ଏମାଇଙ୍ଗ୍ମେ,ଏନାମେନ୍ତେ ଆଇଙ୍ଗ୍କେ ସେନ୍ ଆଚୁଇଙ୍ଗ୍ ପେ ଆପୁଇଙ୍ଗ୍ କେ କାବାର୍ ଏମ୍ ତାୟମ୍ତେ ହିଜୁଃ ରୁହାଡ଼ା।
ଏନ୍ତେ ଫାରୋ କାଜିକେଦା, “ଜୁ, ଆମାଃ ଆପୁ ଅକଆଃ କିରିୟା କାଦା,ଏନ୍ଲେକା ଆମ୍ କାବାର୍ ଏମାଇମେ।”
ଏନ୍ତେ ଯୋଷେଫ୍ ଆୟାଃ ଆପୁକେ କାବାର୍ ଏମ୍ ନାଗେନ୍ତେ ଅଡଙ୍ଗ୍ୟାନା ଓଡ଼ୋଃ ଫାରୋରାଃ ଅଡ଼ାଃରେନ୍ ଓଡ଼ୋଃ ମିସାର୍ ଦିଶୁମ୍ରେନ୍ ପୁର୍ଖା ହାଡ଼ାମ୍ ହଡ଼କ, ଯୋଷେଫ୍ଆଃ କୁଟୁମ୍ ଓଡ଼ୋଃ ହାଗାକ ଓଡ଼ୋଃ ଆୟାଃ ଅଡ଼ାଃରେନ୍ ସବେନ୍କ ଆୟାଃଲଃ ସେନଃୟାନାକ। ମେନ୍ଦ ଗୋଶେନ୍ ରାଇଜ୍ରେ ଇନ୍କୁ ଏସ୍କାର୍ ଆକଆଃ ହନ୍କକେ ଓଡ଼ୋଃ ଗୋଟ୍ରେନ୍ ଜାଁତୁକକେ ବାଗିକେଦ୍ତେ ସେନଃୟାନାକ। ଇନିୟାଃଲଃ ରାଁତ୍ ଓଡ଼ୋଃ ସାଦମ୍ରେ ଦୁବାକାନ୍କ ସେନଃୟାନା, ଏନ୍ରେ ପୁରାଃଗି ମିଆଦ୍ ମାରାଙ୍ଗ୍ ସେସେନ୍ ଝୁଣ୍ଡ୍ ହବାୟାନା।
ଏନ୍ତେ ଇନ୍କୁ ଯାର୍ଦାନ୍ ପାରମ୍ରେୟାଃ, ଆଟଦ୍ ନୁତୁମ୍ ଆଖ୍ଡ଼ାରେ ସେଟେର୍ୟାନ୍ଚି ପୁରାଃଗି ରାଆଃକେଦାକ, ଯୋଷେଫ୍ ଏନ୍ତାଃରେ ସାତ୍ ଦିନ୍ ଜାକେଦ୍ ରାଆଃକେଦାଏ। ଓଡ଼ୋଃ, ଏନ୍ ଦିଶୁମ୍ରେ ତାଇନ୍ତାନ୍ କିନାନିୟ ହଡ଼କ ଆଟଦ୍ ଆଖ୍ଡ଼ାରେ ଇନ୍କୁଆଃ ନେ ଲେକାନ୍ ରାନାଃ ନେଲ୍କେଦ୍ତେ କାଜିକେଦାକ, “ମିସାର୍ରେନ୍ ହଡ଼କଆଃ ନେଆଁ ପୁରାଃ ମାରାଙ୍ଗ୍ ଦୁକୁ,” ଏନାମେନ୍ତେ ଏନ୍ ଠାୟାଦ୍ରେୟାଃ ନୁତୁମ୍ ଆବେଲ୍ ମିସାର୍ ମେନ୍ତେ ହବାୟାନା। ଓଡ଼ୋଃ ଯାର୍ଦାନ୍ ହାନ୍ ପାରମ୍ରେ ମେନାଃ।
ଏନ୍ତେ ଯାକୁବ୍ କାଜିକାଦ୍ ଲେକାତେ ଆୟାଃ ହନ୍କ ରିକା କେଦା; ଇନିୟାଃ ହନ୍କ ଇନିଃକେ କିନାନ୍ ଦିଶୁମ୍ ଇଦିକେଦ୍ତେ ମକ୍ପେଲା ପିଡ଼ିରେୟାଃ ଥାଲାରେ ଉରାକାନ୍ ତପାଗାଡ଼ାରେ ତପାକିୟା, ଚିୟାଃଚି ଏନ୍ ଲାପାଙ୍ଗା ମମ୍ରି ହେପାଦ୍ରାଃ ଲୟଙ୍ଗ୍ଲଃ ତପାଠାୟାଦ୍କେ ହଗି ହଗି ଆକ୍ତେୟାର୍ ନାଙ୍ଗ୍ ହିତ୍ତିୟ ଇଫ୍ରୋଣ୍ ତାଃଏତେ ଆବ୍ରାହାମ୍ଆଃ ହରାତେ କିରିଙ୍ଗ୍କାନ୍ ତାଇକେନା। ଯୋଷେଫ୍ ଆୟାଃ ଆପୁତେକେ କାବାର୍ ଏମ୍ ତାୟମ୍ତେ ଇନିଃ ଓଡ଼ୋଃ ଆୟାଃ ହାଗାକ ଓଡ଼ୋଃ ଅକନ୍କ କାବାର୍ ଏମ୍ ନାଗେନ୍ତେ ସେନାକାନ୍ ତାଇକେନା, ସବେନ୍କ ମିସାର୍ତେ ରୁହାଡ଼୍ୟାନା।
ଯୁସାଫ୍ ଆୟାଃ ହାଗାକକେ ଜୀଉରାଡ଼େଃ ଏମଃ
ଆକଆଃ ଆପୁ ଗୟାକାନାଏ, ନେଆ ନେଲ୍କେଦ୍ତେ ଯୋଷେଫ୍ଆଃ ହାଗାକ କାଜିକେଦା, “ଅକଏସାରି ଯୋଷେଫ୍ ଆବୁକେ ହିଲାଙ୍ଗ୍ ରିକାୟା, ଓଡ଼ୋଃ ଆବୁ ସବେନ୍କ ଇନିୟାଃ ହାନି ରିକା କାଦା, ଏନାରା ବାଦ୍ଲା ଇନିଃ ଇଦିୟାଏ।” ଏନ୍ତେ ଇନ୍କୁ ଯୋଷେଫ୍ତାଃରେ କାଜି କୁଲ୍କେଦା, “ଗଜଃ ସିଦାରେ ଆପୁ କାଜିକାଦ୍ ତାଇକେନାଏ, ଆମାଃ ହାଗାକ ଆମାଃ ଚେତାନ୍ରେ ପୁରାଃଗି ଗୁହ୍ନାଁ ରିକାକେଦାକ, ଏନାମେନ୍ତେ ଇନ୍କୁଆଃ କା ଧାର୍ମାନ୍ କାଜିକ ଓଡ଼ୋଃ ପାପ୍ କାମିକ ଛାମା ଏମାକମେ, ଏନାମେନ୍ତେ ବିନ୍ତିମେ ତାନାଇଙ୍ଗ୍, ଆମାଃ ଆପୁ ପାର୍ମେଶ୍ୱାର୍ଆଃ ଦାସିକଆଃ କା ଧାର୍ମାନ୍ କାମିକ ନାଗେନ୍ତେ ଛାମା ଏମାଲେମେ।” ଇନ୍କୁ ନେ କାଜି କାଜିତାନ୍ ଇମ୍ତା ଯୋଷେଫ୍ ରାଆଃକେଦାଏ।
ଏନ୍ତେ ଇନିୟାଃ ହାଗାକ ଆୟାଃ ଆୟାର୍ତେ ସେନ୍କେଦ୍ତେ କାଜିକିୟାଃ, “ନେଲେମେ, ଆଲେ ଆମାଃ ଦାସିକ।”
ମେନ୍ଦ ଯୋଷେଫ୍ ଇନ୍କୁକେ କାଜିକେଦ୍କଆଏ, “ଆପେ ଜେତ୍ନାଃ ଆଲପେ ବରୟା, ଆଇଙ୍ଗ୍ ଚିନାଃ ପାର୍ମେଶ୍ୱାର୍ଆଃ ଠାୟାଦ୍ ଇଦି ଦାଡ଼ିୟାଃ ?” ଆପେ ଆଇଁୟାଃ ବିରୁଧ୍ରେ ଏତ୍କାନ୍ ପାହାମ୍ ରିକାକାଦ୍ ତାଇକେନା, ମେନ୍ଦ ପାର୍ମେଶ୍ୱାର୍ ଏନାକେ ବୁଗିନ୍ କାମି ରିକାକେଦା, ନାହାଁ ଆପେ ନେଲେତାନା, ଚିଲ୍କା କେଦ୍ତେ ପୁରାଃ ହଡ଼କଆଃ ଜୀଉ ବାଞ୍ଚାଅ ନାଗେନ୍ତେ ଇନିୟାଃ ଇଛା ସାନାଙ୍ଗ୍ ତାଇକେନା। ଏନାମେନ୍ତେ ଆପେ ନାହାଁଦ ଆଲପେ ବରୟା, ଆଇଙ୍ଗ୍ ଆପେୟା ଓଡ଼ୋଃ ହନ୍କଆଃ ଯାତାନ୍ ଇଦିୟା। ନେ ଲେକା ଇନ୍କୁକେ ଦୁଲାଡ଼୍ ରେୟା କାଜିକ କାଜିକେଦ୍ତେ ଜୀଉରାଡ଼େଃ ଏମାଦ୍କଆଏ।
ଯୋଷେଫ୍ଆଃ ଗନଏଃ
ଏନ୍ତେ ଯୋଷେଫ୍ ଓଡ଼ୋଃ ଇନିୟାଃ କୁଟୁମ୍ କିଲିକ ମିସାର୍ ଦିଶୁମ୍ରେ ତାଇନ୍ ୟାନା, ଇନିଃକେ ଚିମ୍ତା ୧୧୦ ବାରାଷ୍ ପୁରାୟାନା ଇମ୍ତା ଇନିଃ ଗଏଃ ୟାନାଏ। ଯୋଷେଫ୍ ଇଫ୍ରାଇମ୍ରାଃ ଆପି ପିଢ଼ି ଜାକେଦ୍ ହନ୍କକେ ନେଲ୍କେଦ୍କଆଏ। ଓଡ଼ୋଃ ଯୋଷେଫ୍ ମନଶିରାଃ ମାଖିର୍ ନୁତୁମ୍ ହନ୍ରାଃ ହନ୍କକେ କୟଙ୍ଗ୍ କେଦ୍କଆଏ। ଏନ୍ତାୟମ୍ତେ ଯୋଷେଫ୍ ଆୟାଃ ହାଗାକକେ କାଜିକେଦ୍କଆ, “ଆଇଙ୍ଗ୍ ଗଜଃ ତାନାଇଙ୍ଗ୍, ମେନ୍ଦ ପାର୍ମେଶ୍ୱାର୍ ଆପେୟାଃ ଯାତାନ୍ ଇଦିୟାଏ, ଓଡ଼ୋଃ ନେ ଦିଶୁମ୍ଏତେ ଆପେକେ ଅଡଙ୍ଗ୍କେଦ୍ତେ, ଅକନ୍ ଦିଶୁମ୍ ଏମ୍ ନାଗେନ୍ତେ ଆବ୍ରାହାମ୍, ଇସାକ୍ ଓଡ଼ୋଃ ଯାକୁବ୍କେ ଏମ୍ ନାଗେନ୍ତେ କିରିୟା ରିକାକାଦା, ଏନ୍ ଦିଶୁମ୍ତେ ଆପେକେ ଇଦି ସେଟେର୍ପେୟା।” ଏନ୍ତେ ଆଡଃଗି ଯୋଷେଫ୍ ଇସ୍ରାଏଲ୍କକେ କିରିୟାକେଦ୍ କାଜିକେଦ୍କଆଏ, “ପାର୍ମେଶ୍ୱାର୍ ଆପେୟାଃ ଯାତାନ୍ ଇଦିୟା, ଓଡ଼ୋଃ ଆପେ ସେନଃ ଇମ୍ତା ଗାତିରେ ଆଇଁୟାଃ ଜାଙ୍ଗ୍ କେ ଇଦିପେ।” ନେ ଲେକାତେ ଯୋଷେଫ୍ ୧୧୦ ବାରାଷ୍ ତାୟମ୍ତେ ମିସାର୍ ଦିଶୁମ୍ରେ ଗଏଃୟାନାଏ, ଏନ୍ତେ ଇନ୍କୁ ଇନିୟାଃ ଗୟାକାନ୍ ହଡ଼ମ କେ ଆଲକା ସୟା ମେନ୍ତେ ଇନିୟାଃ ହଡ଼ମରେ ରାକାମ୍ ରାକାମ୍ ସହାନ୍ ସୁନୁମ୍ ଓଡ଼ୋଃ ଜଲମ୍ ଲେକାନ୍ କ୍ରିମ୍କ ଗସଃ କିୟାଃ, ଓଡ଼ୋଃ ମିସାର୍ ଦିଶୁମ୍ ରେ ଗୟାକାନ୍ ହଡ଼ମ କେ ଦହ ଲେକାନ୍ ମିଆଦ୍ ବାକାସ୍ରେ ଇନିୟାଃ ଗୟାକାନ୍ ହଡ଼ମ କେ ଦହଃକେଦା।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.