Munda Bible
ଏନେଟେଦ୍ 48
ଇଫ୍ରାଇମ୍ ଓଡ଼ୋଃ ମନଶିକେ ଯାକୁବ୍ଆଃ ଆଶିଷ୍
ଏନ୍ ସବେନାଃ ହବାୟାନ୍ ତାୟମ୍ତେ, ଜେତାଏ ମିହୁଡ଼୍ ଯୋଷେଫ୍କେ କାଜିକିୟା, “ନେଲେମେ, ଆମାଃ ଆବା କାଏ ଦାଡ଼ିତାନା।” ଯୋଷେଫ୍ ଆୟାଃ ବାରିୟା ହନ୍ ମନଶି ଓଡ଼ୋଃ ଇଫ୍ରାଇମ୍କେ ମିସାତେ ଇଦିକେଦ୍କିନାଏ। ଯାକୁବ୍କେ ଜେତାଏ ମିହୁଡ଼୍ କାଜିକିୟାଏ, “ନେଲେମେ, ଆମାଃ ହନ୍କଡ଼ା ଯୋଷେଫ୍ ଆମାଃତାଃ ହିଜୁଃକାନାଏ।” ଇନିଃ ନେ କାଜି ଆୟୁମ୍କେଦ୍ଚି ଆପାନ୍କେ ପେଡ଼େଃତାନ୍ଲଃ ବିରିଦ୍ୟାନାଏ ଓଡ଼ୋଃ ପାର୍କମ୍ରେ ଦୁବ୍ୟାନା। ଯାକୁବ୍ ଯୋଷେଫ୍କେ କାଜିକିୟା, “କିନାନ୍ ଦିଶୁମ୍ରାଃ ଲୁସ୍ ନୁତୁମ୍ ଠାୟାଦ୍ରେ ପୁରାଃ ପେଡ଼େୟାନ୍ ପାର୍ମେଶ୍ୱାର୍ ଆଇଙ୍ଗ୍କେ ଦାର୍ଶାନ୍ ଏମାଦିୟାଁଏ ଓଡ଼ୋଃ ଆଶିଷ୍କେଦ୍ତେ କାଜିକାଦ୍ ତାଇକେନା, ‘ଆଇଙ୍ଗ୍ ଆମ୍କେ ପୁରାଃଗି ହନ୍ଗାଁଣାକ ଏମ୍ମାଇଙ୍ଗ୍ ଓଡ଼ୋଃ ଇନ୍କୁ ପୁରାଃଗି ହାରା ପସାଅଃଆକ। ଆମାଃତାଃଏତେ ପୁରାଃ କିଲିକ ହବାଅଃଆ ଓଡ଼ୋଃ ଆମାଃ ହିଜୁଃ ପିଢ଼ିରେନ୍ କିଲିକକେ ଆଇଙ୍ଗ୍ ନେ ଦିଶୁମ୍ ଏମାକଆଇଙ୍ଗ୍। ଇନ୍କୁ ଜାନାଅ ଜୀଦାନ୍ ଜାକେଦ୍ ଏନ୍ ଦିଶୁମ୍କେ ଆକ୍ତେୟାର୍ ରିକାଏୟାକ।’
“ଏନାତେ ଆଇଙ୍ଗ୍ ଆମାଃତାଃ ହିଜୁଃ ସିଦାରେ ମିସାର୍ ଦିଶୁମ୍ରେ ଆମାଃ ଅକ ବାରିୟା ହନ୍କିନ୍ ଜାନାମାକାନା, ଇନ୍କିନ୍ ଆଇଁୟାଃ ହବାଅଃଆକିନ୍, ରୁବେନ୍ ଓଡ଼ୋଃ ଶିମିୟୋନ୍ ଲେକାଗି ଇଫ୍ରାଇମ୍ ଓଡ଼ୋଃ ମନଶି ଆଇଁୟାଃ ହବାଅଃଆକିନ୍। ନିକିନାଃ ତାୟମ୍ତେ ଆମାଃ ଅକ ହନ୍କ ଜାନାମଃଆ, ଇନ୍କୁ ଆମାଃ ହବାଅଃଆକ। ଇନ୍କୁ ମାରାଙ୍ଗ୍ ହାଗାକଆଃ ନୁତୁମ୍ତେ ଆକଆଃ ଆପ୍ନାଃ ଆକ୍ତେୟାର୍ରାଃ ହିସା ଆମାଃତାଃଏତେ ନାମେୟାଁକ। ଆଇଙ୍ଗ୍ ପଦନ୍ ଅରାମ୍ଏତେ କିନାନ୍ ଦିଶୁମ୍ ସେନଃ ଇମ୍ତା ଇଫ୍ରାଥା ସେଟେର୍ ନାଙ୍ଗ୍ କାଟିଃ ସାଙ୍ଗିନ୍ ତାଇକେନ୍ ଇମ୍ତା ହରାରେ ରାହେଲ୍ ଟୁଣ୍ଡୁକେଦାଏ। ଏନାତେ ଆଇଙ୍ଗ୍ ଏନ୍ ଇଫ୍ରାଥା ଅକଆଃଚି ବେଥ୍ଲେହେମ୍ ହଗି କାଜିୟାଃକ, ଏନ୍ତାଃରାଃ ହରା ଗେନାରେ ଆଇଃକ୍କେ କାବାର୍ ଏମ୍କିୟାଇଙ୍ଗ୍।”
ଯାକୁବ୍ ବାରିୟା ହନ୍କିନ୍କେ ନେଲ୍କେଦ୍ତେ ଯୋଷେଫ୍କେ କୁଲିକିୟା, “ନିକିନ୍ ଅକଏ ତାନ୍କିନ୍ ?”
ଏନ୍ତେ ଯୋଷେଫ୍ ଆପୁତେକେ କାଜିକିୟା, “ନେ ବାରାନ୍କିନ୍ ଆଇଁୟାଃ ହନ୍ ତାନ୍କିନ୍, ପାର୍ମେଶ୍ୱାର୍ ଆଇଙ୍ଗ୍କେ ନେ ଦିଶୁମ୍ରେ ଏମାକାଦିୟାଁ।”
ଯାକୁବ୍ କାଜିକିୟାଏ, “ଇନ୍କିନ୍କେ ଆଇଁୟାଃ ହେପାଦ୍ତେ ଆଉକିନ୍ମେ, ଆଇଙ୍ଗ୍ ଇନ୍କିନ୍କେ ଆଶିଷ୍ ଏମାକିନାଇଙ୍ଗ୍।” ଏନ୍ ଦିପିଲିରେ ଯାକୁବ୍ ପୁରାଃଗି ହାଡ଼ାମ୍କାନ୍ ହରାତେ ଆୟାଃ ମେଦ୍ ବୁଗିଲେକା କାଏ ନେଲ୍ ଦାଡ଼ି ତାଇକେନା। ଏନାତେ ଯୋଷେଫ୍ ଆୟାଃ ହନ୍କିନ୍କେ ଆପୁତେୟାଃ ଜାପାଃତେ ଆଉକେଦ୍କିନା ଓଡ଼ୋଃ ଯାକୁବ୍ ଇନ୍କିନ୍କେ ହାମ୍ବୁଦ୍କେଦ୍ତେ ଚଅଃକେଦ୍କିନାଏ।
ଯାକୁବ୍ ଯୋଷେଫ୍କେ କାଜିକିୟା, “ଆଇଙ୍ଗ୍ ଆମ୍କେ ଓଡ଼ୋଃ ନେଲ୍ ଦାଡ଼ିୟାଇଙ୍ଗ୍ ମେନ୍ତେ କାଇଙ୍ଗ୍ ଆସ୍ରାକାଦ୍ ତାଇକେନା, ମେନ୍ଦ ନେଲେମେ, ପାର୍ମେଶ୍ୱାର୍ ଆଇଙ୍ଗ୍କେ ଆମାଃ ହନ୍କକେ ହଗି ନେଲ୍ ନାଙ୍ଗ୍ ଦେଙ୍ଗାକେଦିୟାଁଏ।” ଯୋଷେଫ୍ ଇନ୍କିନ୍କେ ଆପୁତେୟାଃ କୟଙ୍ଗ୍ଏତେ ଇଦିକେଦ୍କିନା ଓଡ଼ୋଃ ଯୋଷେଫ୍ ଅତେରେ ଇକ୍ଡ଼ୁମ୍କେଦ୍ତେ ଆପୁତେକେ ଜହାର୍କିୟା।
ଏନ୍ତେ ଯୋଷେଫ୍, ଇଫ୍ରାଇମ୍କେ ଜମ୍ତିଃଇରେ ସାବ୍ ଇଦିକେଦ୍ତେ ଯାକୁବ୍ଆଃ ଲେଙ୍ଗାସାଃରେ ଓଡ଼ୋଃ ମନଶିକେ ଲେଙ୍ଗାତିଃଇରେ ସାବ୍ ଇଦିକେଦ୍ତେ ଯାକୁବ୍ଆଃ ଜମ୍ସାଃରେ ଦହକେଦ୍କିନା। ମେନ୍ଦ ଯାକୁବ୍ ଆୟାଃ ଜମ୍ତିଃଇକେ ହୁଡିଙ୍ଗ୍ନିଃ ଇଫ୍ରାଇମ୍ରାଃ ବହଃ ଚେତାନ୍ରେ ଓଡ଼ୋଃ ଲେଙ୍ଗାତିଃଇକେ ମାରାଙ୍ଗ୍ନିଃ ମନଶିରାଃ ବହଃ ଚେତାନ୍ରେ ଦହକେଦାଏ। ଇନିଃ ସାରିକାଦ୍ ଲେକାଗି ଏନ୍ଲେକା ତିଃଇ ଦହକେଦାଏ, ଚିଆଃଚି ମନଶି ମୁତ୍କୁଲ୍ ହନ୍ ତାଇକେନାଏ। ଏନ୍ତେ ଯାକୁବ୍ ଯୋଷେଫ୍କେ ଆଶିଷ୍କେଦ୍ତେ କାଜିକିୟା,
“ଅକ ପାର୍ମେଶ୍ୱାର୍କେ ଆଇଁୟାଃ ଆପୁ ଆବ୍ରାହାମ୍ ଓଡ଼ୋଃ ଇସାକ୍ ସେୱା ତାଇକେନାକିନ୍ !
ଅକ ପାର୍ମେଶ୍ୱାର୍ ଆଇଙ୍ଗ୍କେ ଆଇଁୟାଃ ଜାନାମ୍ଏତେ ତିସିଙ୍ଗ୍ ଜାକେଦ୍ ଯାତ୍ନାଅ ରିକାକାଦିୟାଁଏ !
ଅକ ଦୁଁତ୍ ସବେନ୍ ସାଙ୍କାଟ୍ଏତେ ଆଇଙ୍ଗ୍କେ ବାଞ୍ଚାଅକାଦିୟାଁ, ଇନିଃ ନେ ହନ୍କିନ୍କେ ଆଶିଷ୍କିନ୍କା।
ନେ ହନ୍କିନ୍ ଆଇଁୟାଃ ନୁତୁମ୍ତେ, ଆଇଁୟାଃ ଆପୁ ଆବ୍ରାହାମ୍ ଓଡ଼ୋଃ ଇସାକ୍ଆଃ ନୁତୁମ୍ତେ ସାରିୟଃକାକିନ୍,
ଏନ୍ତେ ଦିଶୁମ୍ରେ ହାରା ପସାକେଦ୍ତେ ପୁରାଃଗି ହବାଅଃକାକିନ୍।”
ଇଫ୍ରୟିମ୍ରାଃ ବହଃରେ ଆପୁତେୟାଃ ଜମ୍ତିଃଇ ଦହକାନ୍ ନେଲ୍କେଦ୍ତେ ଯୋଷେଫ୍ କାଏ ସୁକୁୟାନା, ଏନାତେ ଇନିଃ ଆପୁତେୟାଃ ତିଃଇକେ ଇଫ୍ରାଇମ୍ରାଃ ବହଃ ଚେତାନ୍ଏତେ ଆତମ୍କେଦାଏ ଓଡ଼ୋଃ ମନଶିରାଃ ବହଃ ଚେତାନ୍ରେ ଦହକେଦା। ଓଡ଼ୋଃ ଯୋଷେଫ୍ ଆପୁତେକେ କାଜିକିୟା, “ହେ ଆବା, ନେ'ଲେକାଦ କାହାଗି, ନିଃ ମୁତ୍କୁଲ୍ ହନ୍ ତାନିଃ, ନିଆଃ ବହଃରେ ଜମ୍ତିଃଇକେ ଦହେମେ।”
ମେନ୍ଦ ଯୋଷେଫ୍ରାଃ ଆପୁତେ କାହାଗି ମେନ୍ତାନ୍ଲଃ କାଜିକେଦାଏ, “ହେ ହନ୍, ଏନା ଆଇଙ୍ଗ୍ ସାରିତାନାଇଙ୍ଗ୍। ମନଶିରାଃ କିଲିକ ହଗି ମାରାଙ୍ଗ୍ ହବାଅଃଆକ, ମେନ୍ଦ ଆୟାଃ ହୁଡିଙ୍ଗ୍ ହାଗା ଇଫ୍ରାଇମ୍ରାଃ କିଲିକ ପୁରାଃ ମାରାଙ୍ଗ୍ କିଲିକ ହବାଅଃଆ।”
ଏନ୍ ହୁଲାଙ୍ଗ୍ ଇନିଃ ଇନ୍କିନ୍କେ ଆଶିଷ୍କେଦ୍ତେ କାଜିକେଦ୍କିନା, “ଇସ୍ରାଏଲ୍ ହଡ଼କ ଜେତାଏକେ ଆଶିଷ୍ ରିକାତାନ୍ ଇମ୍ତା ଆବେନାଃ ନୁତୁମ୍ ସାବ୍କେଦ୍ତେ କାଜିୟାକ, ‘ପାର୍ମେଶ୍ୱାର୍ ଆମ୍କେ ମନଶି ଓଡ଼ୋଃ ଇଫ୍ରୟିମ୍ ଲେକା ଆଶିଷ୍ମେକା।’ ” ନେ'ଲେକାତେ ଯାକୁବ୍ ମନଶିଏତେ ଇଫ୍ରାଇମ୍ରାଃ ନୁତୁମ୍ ସିଦାତେ ସାବ୍କେଦା।
ଏନ୍ତେ ଯାକୁବ୍ ଯୋଷେଫ୍କେ କାଜିକିୟା, “ନେଲେମେ, ଆଇଁୟାଃ ଟୁଣ୍ଡୁ ନେଣ୍ଡା ସେଟେରଃତାନା, ମେନ୍ଦ ପାର୍ମେଶ୍ୱାର୍ ଆପେଲଃ ତାଇନାଃ ଓଡ଼ୋଃ ଆପେୟାଃ ପୁର୍ଖା ଆପୁକଆଃ ଦିଶୁମ୍ତେ ଇଦି ରୁହାଡ଼୍ପେୟା।
“ଆଇଙ୍ଗ୍ ଆଇଁୟାଃ ତାରାଉଡ଼ି ଓଡ଼ୋଃ ଧାନୁଲଃ ଇମୋରିୟ ହଡ଼କଆଃ ତିଃଇଏତେ ଅକ ପାର୍ଗାନ୍ ଆକ୍ତେୟାର୍ କାଦାଇଙ୍ଗ୍, ଏନ୍ ପାର୍ଗାନ୍କେ ଆମାଃ ହାଗାମ୍କଏତେ ଆଦ୍କା ହିସା ଆମ୍କେ ଏମାମ୍ତାନାଇଙ୍ଗ୍।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.