Munda Bible
ଏନେଟେଦ୍ 47
ଗୋଶନ୍ ପାର୍ଗାନ୍ରେ ଯାକୁବ୍ଆଃ ପାରିବାର୍
ଯୋଷେଫ୍ ସେନ୍କେଦ୍ତେ ଫାରୋକେ କାଜିକିୟା, “ଆଇଁୟାଃ ଆପୁ ଓଡ଼ୋଃ ହାଗାଇଙ୍ଗ୍ ସବେନ୍କ କିନାନ୍ ଦିଶୁମ୍ଏତେ ଆକଆଃ ଗୋଟ୍ରେନ୍ ଆସୁଲ୍ ଜାଁତୁ ସାବ୍କେଦ୍ତେ ହିଜୁଃକାନାକ ଓଡ଼ୋଃ ଗୋଶେନ୍ ନୁତୁମ୍ ପାର୍ଗାନ୍ରେ ମେନାକଆ।” ଯୋଷେଫ୍ ହାଗାକଏତେ ମଣେୟାଁ ହାଗାକକେ ଇଦିକେଦ୍ତେ ଫାରୋରାଃ ଆୟାର୍ରେ ଇନ୍କୁକେ ତିଙ୍ଗୁକେଦ୍କଆ। ଏନ୍ତେ ଫାରୋ ଇନ୍କୁକେ କୁଲିକେଦ୍କଆ, “ଆପେୟାଃ କାମିଉଦାମ୍ ଚିନାଃତାନାଃ ?”
ଇନ୍କୁ ଫାରୋକେ କାଜିରୁହାଡ଼୍କିୟାକ, “ଆଲେ ଆମାଃ ଦାସିକ, ଆଲେୟାଃ ପୁର୍ଖା ଆପୁକଆଃ ଲେକାଗି ଗୋଟ୍ରେନ୍ ଆସୁଲ୍ଜାଁତୁ ଗୁପି ହଡ଼କ ତାନ୍ଲେ।” ଇନ୍କୁ ଫାରୋକେ ଆଡଃଗି କାଜିକିୟାକ, “ଆଲେ ନେ ଦିଶୁମ୍ତେ ସବେନ୍ ହୁଲାଙ୍ଗ୍ ତାଇନଃ ନାଗେନ୍ତେ କାଲେ ହିଜାକାନା। କିନାନ୍ ଦିଶୁମ୍ରେ ପୁରାଃଗି ରିଙ୍ଗା ହବାଅଃତାନ୍ ହରାତେ ଆଲେୟାଃ ଗୋଟ୍ରେନ୍ ଆସୁଲ୍ଜାଁତୁକକେ ଗୁପିକ ନାଙ୍ଗ୍ ତାସାଦ୍ ବାନଃଆ, ଏନାମେନ୍ତେ ହିଜୁଃକାନାଲେ। ଦାୟାକେଦ୍ତେ ଆଲେକେ ଗୋଶେନ୍ ପାର୍ଗାନ୍ରେ ତାଇନଃ ନାଙ୍ଗ୍ ଆଚୁଲେମେ।” ଫାରୋ ଯୋଷେଫ୍କେ କାଜିକିୟା, “ଆମାଃ ଆପୁ ଓଡ଼ୋଃ ହାଗାକ ଆମାଃତାଃ ହିଜୁଃକାନାକ, ମିସାର୍ ଦିଶୁମ୍ ଆମାଃ ଆୟାର୍ରେ ମେନାଃ। ମିସାର୍ ଦିଶୁମ୍ରାଃ ସବେନାଃଏତେ ବୁଗିନ୍ ପାର୍ଗାନ୍ ଗୋଶେନ୍ରେ ଇନ୍କୁକେ ତାଇନଃ ନାଙ୍ଗ୍ କାଜିକମେ। ଇନ୍କୁଏତେ ଅକନ୍କ ଆଗୁଆଇ ରିକା ଦାଡ଼ି ଲେକା ମେନାକଆଃ ମେନ୍ତେମ୍ ସାରିକାଦ୍ ରେଦ, ଇନ୍କୁକେ ଆଇଁୟାଃ ଆସୁଲ୍ ଜାଁତୁକଆଃ ଯାତାନ୍ ଇଦିରାଃ ଆଗୁଆଇ ରିକା ନାଙ୍ଗ୍ ସାଲାକମେ।”
ଏନ୍ତେ ଯୋଷେଫ୍ ଆୟାଃ ଆପୁ ଯାକୁବ୍କେ ଫାରୋତାଃ ଆଉକିୟାଏ, ଓଡ଼ୋଃ ଯାକୁବ୍ ଫାରୋକେ ଆଶିଷ୍କିୟା। ଫାରୋ ଯାକୁବ୍କେ କୁଲିକିୟା, “ଆମାଃ ଚିମିନ୍ ବାରାଷ୍ ହବାଅଃତାନା ?”
ଯାକୁବ୍ ଫାରୋକେ କାଜିକିୟା, “ତିସିଙ୍ଗ୍ ଜାକେଦ୍ ଆଇଁୟାଃ ୧୩୦ ବାରାଷ୍ ହବାଅଃତାନା। ଆଇଁୟାଃ ପୁର୍ଖା ଆପୁକଆଃ ବାରାଷ୍ଲଃ ଜକାଲେରେ ଆଇଁୟାଃ ବାରାଷ୍ ହୁଡିଙ୍ଗ୍ଗିୟା ଓଡ଼ୋଃ ପୁରାଃଗି ଦୁକୁତେ ପେରେଜାକାନା।” ଏନ୍ତେ ଯାକୁବ୍ ଫାରୋକେ ଆଶିଷ୍କେଦ୍ତେ ଇନିଃତାଃଏତେ ବିଦା ଇଦିକେଦାଏ। ଯୋଷେଫ୍ ଫାରୋରାଃ ଆନାଚୁ ଲେକାତେ ମିସାର୍ ଦିଶୁମ୍ରାଃ ପୁରାଃ ବୁଗିନ୍ ପାର୍ଗାନ୍ ରାମିଷେଷ୍ ନାଗାର୍କେ ଆୟାଃ ଆପୁ ଓଡ଼ୋଃ ହାଗାକକେ ଏମାଦ୍କଆ। ଯୋଷେଫ୍ ଆୟାଃ ଆପୁ, ହାଗାକ, ଓଡ଼ୋଃ ଅଡ଼ାଃରେନ୍ ସବେନ୍କକେ ଜମେୟାଁଃ ଏମାଦ୍କଆଏ।
ରିଙ୍ଗା
ଏନ୍ ଦିପିଲିରେ ପୁରାଃଗି ରିଙ୍ଗା ହବାୟାନା ଓଡ଼ୋଃ ସବେନ୍ ଦିଶୁମ୍ରେ ଜଜମାଃ ଜାଞ୍ଜିୟାନା। ଏନାମେନ୍ତେ ମିସାର୍ ଦିଶୁମ୍ରେନ୍ ଓଡ଼ୋଃ କିନାନ୍ ଦିଶୁମ୍ରେନ୍ ହଡ଼କ ରେଙ୍ଗେଃତେ ନାରାଦୁରାଅଃ ତାଇକେନାକ। ହଡ଼କ ମିସାର୍ ଓଡ଼ୋଃ କିନାନ୍ ଦିଶୁମ୍ରେ ତାଇକେନ୍ ରୁପା ଟାକା ଏମ୍କେଦ୍ତେ ହିତା କିରିଙ୍ଗ୍କେଦାକ ଓଡ଼ୋଃ ଯୋଷେଫ୍ ଏନ୍ ରୁପା ଟାକାକେ ହୁଣ୍ଡିକେଦ୍ତେ ଫାରୋରାଃ ରାଜ୍ମାହାଲ୍ତେ ଆଉକେଦା।
ମିସାର୍ ଓଡ଼ୋଃ କିନାନ୍ ଦିଶୁମ୍ରେନ୍ ହଡ଼କତାଃରେ ତାଇକେନ୍ ଟାକା ପାଏସା ଚାବାୟାନ୍ ତାୟମ୍ତେ ମିସାର୍ରେନ୍ ହଡ଼କ ଯୋଷେଫ୍ତାଃ ହିଜୁଃକେଦ୍ତେ କାଜିକିୟାକ, “ଆଲେକେ ଜମେୟାଁଃ ଏମାଲେମେ, ଆଲେତାଃରେ ଟାକା ବାନଃ ମେନ୍ତେ ଚିନାଃ ନାଙ୍ଗ୍ ଆମାଃ ମେଦ୍ ସାମ୍ନାଙ୍ଗ୍ରେ ଗଜଃୟାଲେ ?”
ଯୋଷେଫ୍ କାଜିକେଦ୍କଆଏ, “ଆପେୟାଃ ଟାକା ପାଏସା ଚାବାୟାନ୍ରେ, ଆପେୟାଃ ଆସୁଲ୍ ଜାଁତୁ ଆଉକପେ, ଜାଁତୁରାଃ ବାଦ୍ଲାରେ ଆପେକେ ଜମେୟାଁଃ ଏମଃଆ।” ଏନ୍ତେ ଇନ୍କୁ ଯୋଷେଫ୍ତାଃ ଆକଆଃ ଗୋଟ୍ରେନ୍ ଜାଁତୁକକେ ଆଉକେଦ୍କଆକ। ଯୋଷେଫ୍ ସାଦମ୍, ମିଣ୍ଡି, ଉରିଃକ୍, ଗାଧା ଇଦିକେଦ୍ତେ ଜଜମାଃ ଇନ୍କୁକେ ଏମାଦ୍କଆ। ନେ'ଲେକାତେ ଯୋଷେଫ୍ ଆସୁଲ୍ ଜାଁତୁ ବାଦ୍ଲାରେ ଇନ୍କୁକେ ଜମେୟାଁଃ ଏମ୍କେଦ୍ତେ ଏନ୍ ବାରାଷ୍ ଚାଲାଅ କେଦ୍କଆଏ।
ଏନ୍ ବାରାଷ୍ ପୁରାୟାନା, ଏଟାଃ ବାରାଷ୍ ଇନ୍କୁ ଯୋଷେଫ୍ତାଃ ହିଜୁଃକେଦ୍ତେ କାଜିକିୟାକ, “ହେ ଗମ୍କେ, ଆଲେୟାଃ ଟାକା ପାଏସା ଚାବାୟାନା, ଆଲେୟାଃ ଆସୁଲ୍ ଜାଁତୁକ ହଗି ଆମାଃ ହବାୟାନାକ, ନେ କାଜିଦ କା ଉକୁଦାଡ଼ିୟଃଆ। ନାହାଁଃ ଆମ୍କେ ଏମ୍ ନାଙ୍ଗ୍ ଆଲେୟାଃ ହଡ଼୍ମ ଓଡ଼ୋଃ ଅତେ ବାଗିକେଦ୍ତେ ଜେତ୍ନାଃ ବାନଃଆ। ଆଲେ ଆମାଃ ମେଦ୍ ସାମ୍ନାଙ୍ଗ୍ରେ ଚିନାଃମେନ୍ତେଲେ ଜିୟନଃଆ ଓଡ଼ୋଃ ଆଲେୟାଃ ଲୟଙ୍ଗ୍ ଚିନାଃ ମେନ୍ତେ ବିର୍ ଲେକା ହବାଅଃଆ ? ଆମ୍ ଜମେୟାଁଃ ବାଦ୍ଲାରେ ଆଲେକେ ଓଡ଼ୋଃ ଆଲେୟାଃ ଲୟଙ୍ଗ୍କେ କିରିଙ୍ଗ୍ ଇଦିମେ। ଆଲେ ଆଲେୟାଃ ଲୟଙ୍ଗ୍ଲଃଗି ଫାରୋରାଃ ଦାସି ହବାଅଃଆଲେ। ଆଲେକେ ହିତା ଏମାଲେମେ, ଏନ୍ରେଦ ଆଲେ କା ଗଏଃକେଦ୍ତେ ଜୀନିଦ୍ ତାଇନାଃଲେ ଓଡ଼ୋଃ ଦିଶୁମ୍ କା ଜୀଅନଃଆ।”
ନେ'ଲେକାତେ ଯୋଷେଫ୍ ଫାରୋ ନାଗେନ୍ତେ ମିସାର୍ରାଃ ଗଟା ଅତେ କିରିଙ୍ଗ୍କେଦା। ରିଙ୍ଗା ପୁରାଃଗି ସାହାତିଙ୍ଗ୍ ଲେକା ହବାୟାନ୍ ହରାତେ ମିସାର୍ ଦିଶୁମ୍ରେନ୍ ହଡ଼କ ଆପ୍ନାଃ ଲୟଙ୍ଗ୍ ଆଖ୍ରିଙ୍ଗ୍କେଦାକ, ଏନାତେ ସବେନ୍ ଅତେ ଫାରୋରାଃ ହବାୟାନା। ଯୋଷେଫ୍ ମିସାର୍ ଦିଶୁମ୍ରାଃ ନେ'ସାଃଏତେ ଏଟାଃସାଃ ଜାକେଦ୍ ହଡ଼କକେ ନାଗାର୍ଏତେ ଆଉକେଦ୍ଲଃ ଫାରୋରାଃ ଦାସି ବାଇକେଦ୍କଆ। ଯାଜାକ୍କକେ ଏମାକାନ୍ ଲୟଙ୍ଗ୍ ଏସ୍କାର୍ କାଏ କିରିଙ୍ଗ୍କେଦା। ଚିଆଃଚି ଫାରୋ ଯାଜାକ୍କ ନାଙ୍ଗ୍ ଜମେୟାଁଃ ଜଗାଡ଼୍କାଦ୍ ତାଇକେନାଏ, ଏନାତେ ଇନ୍କୁ ଆକଆଃ ଲୟଙ୍ଗ୍ କାକ ଆଖ୍ରିଙ୍ଗ୍କେଦା। ଏନ୍ତେ ଯୋଷେଫ୍ ଇନ୍କୁକେ କାଜିକେଦ୍କଆ, “ନେଲେପେ, ଆଇଙ୍ଗ୍ ଫାରୋଆଃ ନାଗେନ୍ତେ ଆପେକେ ଓଡ଼ୋଃ ଆପେୟାଃ ଲୟଙ୍ଗ୍ କିରିଙ୍ଗ୍କେଦାଇଙ୍ଗ୍। ନେତାଃରେ ହେର୍ ନାଙ୍ଗ୍ ହିତା ମେନାଃ, ଲୟଙ୍ଗ୍ରେ ହିତା ହେରେପେ। ଏନାଏତେ ଅକଆଃ ଅମନ୍ନଃଆ, ଏନାରାଃ ମଣେୟାଁ ହିସାଏତେ ମିଦ୍ ହିସା ଫାରୋକେ ଏମାଇପେ, ସାରେଜାକାନ୍ ଉପୁନ୍ ହିସା ଆପେୟାଃ ହବାଅଃଆ, ଏନା ହିତା ହେର୍ ନାଙ୍ଗ୍ ଓଡ଼ୋଃ ଆପେୟାଃ ଅଡ଼ାଃରେନ୍କଆଃ ଜମେ ନାଙ୍ଗ୍ ଦହଏପେ।”
ଇନ୍କୁ କାଜିକେଦାକ, “ହେ ଗମ୍କେ, ଆମ୍ ଆଲେୟାଃ ଜୀଉ ବାଞ୍ଚାଅକେଦାମ୍। ଆମ୍ ଆଲେୟାଃ ଚେତାନ୍ରେ ଦାୟା ରିକାଏ ରେଦ, ଆଲେ ଫାରୋରାଃ ଦାସି ହବାଅଃଆଲେ।” ଏନ୍ତେ ଯୋଷେଫ୍ ମିସାର୍ରାଃ ଅତେ ବିଷାଏରେ ମିଆଁଦ୍ ନିୟାମ୍ ବାଇକେଦାଏ, ଏନା ହବାଅଃତାନା ମଣେୟାଁ ହିସାଏତେ ମିଦ୍ ହିସା ଫାରୋକେ ଏମଃଆ। ଏନ୍ ନିୟାମ୍ ତିସିଙ୍ଗ୍ ଜାକେଦ୍ ମେନାଃ। ଯାଜାକ୍କଆଃ ଲୟଙ୍ଗ୍ ଏସ୍କାର୍ ଫାରୋରାଃ କା ହବାୟାନା।
ଯାକୁବାଃ ଟୁଣ୍ଡୁ ବିନ୍ତି
ଇସ୍ରାଏଲ୍ ହଡ଼କ ମିସାର୍ରାଃ ଗୋଶେନ୍ ପାର୍ଗାନ୍ରେ ତାଇକେଦ୍ତେ ପୁରାଃଗି କିସାଁଣ୍ୟାନାକ ଓଡ଼ୋଃ ଏନ୍ତାଃରେ ହାରା ପସାକେଦ୍ତେ ପୁରାଃଗି ହବାୟାନାକ। ଯାକୁବ୍ ମିସାର୍ ଦିଶୁମ୍ରେ ୧୭ ବାରାଷ୍ ଜାକେଦ୍ ତାଇକେନାଏ, ଇମ୍ତା ଆୟାଃ ୧୪୭ ବାରାଷ୍ ହବାକାନ୍ ତାଇକେନା। ଯାକୁବ୍ରାଃ ଗନଏଃ ନେଣ୍ଡା ସେଟେର୍ ଆଉ ତାଇକେନ୍ରେ ଯୋଷେଫ୍କେ କାଜିକିୟା, “ଆଇଙ୍ଗ୍ ଆମାଃ ଆୟାର୍ରେ ସାୟାଦ୍ ନାମାକାଦ୍ ରେଦ, ବିନ୍ତିମେ ତାନାଇଙ୍ଗ୍, ଆମ୍ ଆଇଁୟାଃ ଚେତାନ୍ରେ ଦାୟାକେଦତେ ପାତିୟାର୍ରଃ ଲେକା ନେ କାମି ରିକାୟାମ୍ ମେନ୍ତେ ଆଇଁୟାଃ ବୁଲୁରେ ତିଃଇ ଦହକେଦ୍ତେ1 କିରିୟା ରିକାଏମେ ଯେ, ଆମ୍ ଆଇଙ୍ଗ୍କେ ନେ ମିସାର୍ ଦିଶୁମ୍ରେ କାବାର୍ ଆଲମ୍ ଏମାଇଙ୍ଗ୍। ଆଇଁୟାଃ ଗନଏଃ ହବାଅଃ ରେଦ, ଆଇଙ୍ଗ୍କେ ମିସାର୍ଏତେ ଇଦିକେଦ୍ତେ ଅକ ଠାୟାଦ୍ରେ ଆଇଁୟାଃ ପୁର୍ଖା ଆପୁକ ତପାକାନା, ଏନ୍ତାଃରେ ଆଇଙ୍ଗ୍କେ ତପାଇଙ୍ଗ୍ମେ।”
ଯୋଷେଫ୍ କାଜିରୁହାଡ଼୍କିୟାଏ, “ଆଇଙ୍ଗ୍ ଆମାଃ କାଜି ଲେକାଗି ରିକାଏୟାଇଙ୍ଗ୍।”
ଯାକୁବ୍ ଯୋଷେଫ୍କେ କାଜିକିୟା, “ଆଇଙ୍ଗ୍ତାଃରେ କିରିୟା ରିକାଏମେ।” ଯୋଷେଫ୍ ଆୟାଃ ସାମ୍ନାଙ୍ଗ୍ରେ କିରିୟା ରିକାକେଦାଏ। ଏନ୍ତେ ଯାକୁବ୍ ଗିତିଃକ୍ ଠାୟାଦ୍ରାଃ ବହଃସାଃରେ ବହଃ ତିରିବ୍କେଦ୍ତେ ପାର୍ମେଶ୍ୱାର୍କେ ଜହାର୍କିୟା।
Source notes (1)
- Footnote କିରିୟା ରିକାରାଃ ମିଆଁଦ୍ ରିତି
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.