Munda Bible
ଏନେଟେଦ୍ 36
ଏଷୌଆଃ କିଲିକ
ନେ ସବେନ୍କ ହବାଅଃତାନା ଏଷୌଆଃ କିଲି। ଇନ୍କୁକେ ଇଦୋମ୍ ମେନ୍ତେ ହଗି କାଜିୟଃ ତାଇକେନା। ଏଷୌ କିନାନ୍ରେନ୍ କୁଡ଼ିକକେ ଆଣ୍ଦିୟାନା, ମିଆଦ୍ନିଃ ହିତ୍ତିୟ ଜାତିରେନ୍ ଏଲୋନ୍ରାଃ ହନ୍ତେକୁଡ଼ି ଆଦା ଆଡଃମିଆଦ୍ନିଃ ଅହଲିବାମା, ଅକଏଚି ଆନାରାଃ ହନ୍ତେକୁଡ଼ି ଓଡ଼ୋଃ ହିବ୍ବୀୟ ଜାତିରେନ୍ ସିବିୟୋନ୍ରାଃ ଜାଇକୁଡ଼ି ତାଇକେନା। ଆପିୟାନିଃକେ ଆଣ୍ଦିକାନ୍ନିଃ ହବାଅଃତାନାଏ ଇଶ୍ମାଏଲ୍ରାଃ ହନ୍ତେକୁଡ଼ି ବାସ୍ମତ୍, ଅକଏଚି ନବାୟୋତ୍ରାଃ ମିଶି ତାଇକେନା। ଏନ୍ତେ ଏଷୌ, ଆଦାକେ ଜାନାମ୍କିୟା, ଆଦା, ଏଲିଫସ୍କେ ଜାନାମ୍କିୟା ଓଡ଼ୋଃ ବାସ୍ମତ୍, ରୁୟେଲ୍କେ ଜାନାମ୍କିୟା। ଓଡ଼ୋଃ ଅହଲିବାମା ଜାନାମ୍କେଦ୍ ହନ୍କ ହବାଅଃତାନା ଯିୟୁଶ୍, ଯାଲମ୍ ଓଡ଼ୋଃ କୋରହ। ଏଷୌ କିନାନ୍ ଦିଶୁମ୍ରେ ତାଇକେନ୍ ଇମ୍ତା ନେ ସବେନ୍ ହନ୍କ ଜାନାମ୍ୟାନା।
ଏନ୍ତେ ଏଷୌ ଆୟାଃ କୁଡ଼ି, ହନ୍ଗାଁଣା ଅଡ଼ାଃରେନ୍ ସବେନ୍ ହଡ଼, ଆୟାଃ ସବେନ୍ ଆସୁଲ୍ ଜାଁତୁକ ଓଡ଼ୋଃ କିନାନ୍ ଦିଶୁମ୍ରେ କାମିକାଦ୍ ସବେନ୍ ଖୁର୍ଜିକ ସାବ୍କେଦ୍ତେ ଆୟାଃ ହାଗା ଯାକୁବ୍ତାଃଏତେ ଏଟାଃ ଦିଶୁମ୍ତେ ସେନଃୟାନା। ଯାକୁବ୍ ଓଡ଼ୋଃ ଏଷୌରାଃ ପୁରାଃଗି ଉରିକ୍ ଓଡ଼ୋଃ ମିଣ୍ଡିକ ତାଇକେନା, ଏନା ନାଗେନ୍ତେ ପୁରାଃ ମାହା ଜାକେଦ୍ ବାରାନ୍କିନ୍ ମିଦ୍ତାଃରେ କାକିନ୍ ତାଇନ୍ ଦାଡ଼ିୟାନା। ଚିଆଃଚି ଇନ୍କିନାଃ ଆସୁଲ୍ ଜାଁତୁକକେ ଗୁପିକ ନାଙ୍ଗ୍ ଏନ୍ତାଃରେ ଠାୟାଦ୍ କା ତାଇକେନା। ଏନାତେ ଏଷୌ, ସେୟିର୍ ନୁତୁମ୍ ବୁରୁରେ ତାଇନ୍ୟାନା। ଏନ୍ ଏଷୌରାଃ ଏଟାଃ ନୁତୁମ୍ ଇଦୋମ୍।
ସେୟିର୍ ବୁରୁ ଦିଶୁମ୍ରେ ତାଇନ୍ତାନ୍ ଇଦୋମ୍କଆଃ ପୁର୍ଖା ହାଡ଼ାମ୍କଗି ଏଷୌରାଃ କିଲିକ ତାନ୍କ। ଏଷୌଆଃ କୁଡ଼ିତେୟାଃ ନୁତୁମ୍ ଆଦା, ଆୟାଃ ହନ୍ ଏଲିଫସ୍ ଓଡ଼ୋଃ ବାସ୍ମତ୍ ନୁତୁମ୍ କୁଡ଼ିତେୟାଃ ହନ୍ଆଃ ନୁତୁମ୍ ରୁୟେଲ୍। ଏଲିଫସ୍ଆଃ ହନ୍କଆଃ ନୁତୁମ୍ ହବାଅଃତାନା, ତୈମନ୍, ଓମାର୍, ସଫୋ, ଗୟିତାମ୍ ଓଡ଼ୋଃ କନସ୍। ଏଷୌରାଃ ହନ୍ତେକଡ଼ା ଏଲିଫସ୍ରାଃ ମିଆଁଦ୍ ତିମ୍ନା ନୁତୁମ୍ ହିରୁମ୍କୁଡ଼ି ତାଇକେନା, ଇନିୟାଃ ମିଆଁଦ୍ ହନ୍ ଜାନାମ୍ୟାନାଏ, ଇନିୟାଃ ନୁତୁମ୍ ଅମାଲେକ୍।
ନେ ସବେନ୍କ ଏଷୌଆଃ କୁଡ଼ି ଆଦାରାଃ ଜାଇହନ୍କ ତାଇକେନା। ରୁୟେଲ୍ରାଃ କଡ଼ାହନ୍କଆଃ ନୁତୁମ୍ ହବାଅଃତାନା, ନହତ୍, ସେରହ, ଶମ୍ମ ଓଡ଼ୋଃ ମିସା। ନେ ସବେନ୍କ ଏଷୌଆଃ କୁଡ଼ି ବାସ୍ମତ୍ରାଃ ଜାଇହନ୍ ତାନ୍କ।
ଏଷୌଆଃ ଆଡଃମିଆଦ୍ କୁଡ଼ି ତାଇକେନା, ଇନିୟାଃ ନୁତୁମ୍ ଅହଲିବାମା। ଇନିଃ ସିବିୟୋନ୍ରାଃ ଜାଇକୁଡ଼ି ଓଡ଼ୋଃ ଆନାରାଃ ହନ୍ତେକୁଡ଼ି ତାଇକେନାଏ। ଇନିୟାଃ ହନ୍କଆଃ ନୁତୁମ୍ ହବାଅଃତାନା, ଯିୟୁଶ୍, ଯାଲମ୍ ଓଡ଼ୋଃ କୋରହ।
ଏଷୌଆଃ ହନ୍କଆଃ ନେ କିଲିକ ଏଟାଃ ଏଟାଃ ଝୁଣ୍ଡ୍ରେନ୍ ଆଗୁଆଇକ ହବାୟାନା। ଏଷୌଆଃ ମୁତ୍କୁଲ୍ ହନ୍ ଏଲିଫସ୍ରାଃ ଅକନ୍ ହନ୍କ ଆଗୁଆଇ ହବାୟାନାକ, ଇନ୍କୁଆଃ ନୁତୁମ୍ ହବାଅଃତାନା, ତୈମନ୍, ଓମାର୍, ସଫୋ, କନସ୍, କୋରହ, ଗୟିତାମ୍ ଓଡ଼ୋଃ ଅମାଲେକ୍। ନେ ସବେନ୍ ଆଗୁଆଇକ ଇଦୋମ୍ ଦିଶୁମ୍ରେନ୍ ଏଲିଫସ୍ କିଲିଏତେ ତାଇକେନାକ ଓଡ଼ୋଃ ଏଷୌଆଃ କୁଡ଼ିତେ ଆଦାରାଃ ଜାଇହନ୍କ ତାଇକେନା।
ଏଷୌଆଃ ହନ୍ତେକଡ଼ା ରୁୟେଲ୍ଆଃ ଅକନ୍ ହନ୍କ ଆଗୁଆଇ ହବାୟାନାକ, ଇନ୍କୁଆଃ ନୁତୁମ୍ ହବାଅଃତାନା ନହତ୍, ସେରହ, ଶମ୍ମ ଓଡ଼ୋଃ ମିସା। ନେ ସବେନ୍କ ରୁୟେଲ୍ଆଃ କିଲିକ ଓଡ଼ୋଃ ଇଦୋମ୍ ଦିଶୁମ୍ରେ ଆଗୁଆଇ ହବାୟାନାକ। ଇନ୍କୁ ଏଷୌଆଃ କୁଡ଼ିତେ ବାସ୍ମତ୍ରାଃ ଜାଇହନ୍କ ତାଇକେନା।
ଓଡ଼ୋଃ ଏଷୌଆଃ କୁଡ଼ି ଅହଲିବାମା, ଅକଏଚି ଆନାରାଃ ହନ୍ତେକୁଡ଼ି ତାଇକେନା। ଇନିୟାଃ ଆଗୁଆଇକାନ୍ ହନ୍କ ହବାଅଃତାନା ଯିୟୁଶ୍, ଯାଲମ୍ ଓଡ଼ୋଃ କୋରହ। ଇନ୍କୁ ଏଷୌରାଃ ମେନ୍ଲେରେ ଇଦୋମ୍ରାଃ ହନ୍କ ଓଡ଼ୋଃ ଆଗୁଆଇକ ତାଇକେନା।
ସେୟିର୍ଆଃ କିଲିକ
ଏନ୍ ପାର୍ଗାନ୍ରେ ସିଦା ତାଇନଃ ତାଇକେନ୍ ହୋରିୟ ସେୟିର୍ଆଃ କିଲିକ। ସେୟିର୍ଆଃ ହନ୍କଆଃ ନୁତୁମ୍ ହବାଅଃତାନା, ଲୋଟନ୍, ଶୋବାଲ୍, ସିବିୟନ୍, ଆନା, ଦିଶୋନ୍, ଏସର୍ ଓଡ଼ୋଃ ଦିଶାନ୍। ସେୟିର୍ରାଃ ନେ ହନ୍କ ଇଦୋମ୍ ଦିଶୁମ୍ରେନ୍ ହୋରିୟ କିଲିରେନ୍ ଆଗୁଆଇ ତାଇକେନାକ।
ଲୋଟନ୍ରାଃ ହୋରି ଓଡ଼ୋଃ ହେମମ୍ ନୁତୁମ୍ ବାରିୟା ହନ୍ତେକଡ଼ା ତାଇକେନାକିନ୍ ଓଡ଼ୋଃ ଲୋଟନ୍ରାଃ ମିଆଁଦ୍ ମିଶି ତାଇକେନାଏ, ଇନିୟାଃ ନୁତୁମ୍ ତିମ୍ନା।
ଶୋବାଲ୍ରାଃ ହନ୍କଆଃ ନୁତୁମ୍ ଅଲ୍ବନ୍, ମନ୍ହତ୍, ଏବଲ୍, ସଫୋ ଓଡ଼ୋଃ ଓନମ୍ ତାଇକେନା।
ସିବିୟନ୍ରାଃ ବାରିୟା କଡ଼ାହନ୍ ତାଇକେନାକିନ୍, ଇନ୍କିନାଃ ନୁତୁମ୍ ଆୟା ଓଡ଼ୋଃ ଆନା। ଏନ୍ ଆନା ଆପୁତେୟାଃ ଗାଧାକକେ ଗୁପିକ ତାଇକେନ୍ ଇମ୍ତା ବିର୍ରେ ଲଲ ଦାଆଃରେୟାଃ ସେତେଙ୍ଗ୍ ନାମ୍ ଅଡଙ୍ଗ୍କାଦ୍ ତାଇକେନାଏ। ଆନାରାଃ କଡ଼ାହନ୍ଆଃ ନୁତୁମ୍ ଦିଶୋନ୍ ଓଡ଼ୋଃ କୁଡ଼ିହନ୍ଆଃ ନୁତୁମ୍ ଅହଲିବାମା ତାଇକେନା। ଦିଶୋନ୍ରାଃ କଡ଼ାହନ୍କ ଜାନାମ୍ୟାନା, ଇନ୍କୁଆଃ ନୁତୁମ୍ ହବାଅଃତାନା, ହେମ୍ଦାନ୍, ଇସ୍ବାନ୍, ଯିଥ୍ରନ୍ ଓଡ଼ୋଃ କରାନ୍।
ଏସର୍ରାଃ ହନ୍କ ଜାନାମ୍ୟାନା, ଇନ୍କୁଆଃ ନୁତୁମ୍ ହବାଅଃତାନା ବିଲ୍ହାନ୍, ସାବାନ୍ ଓଡ଼ୋଃ ଯାକନ୍।
ଦିଶାନ୍ରାଃ ହନ୍କଆଃ ନୁତୁମ୍ ହବାଅଃତାନା, ଉଷ୍ ଓଡ଼ୋଃ ଅରାନ୍।
ହୋରିୟ କିଲିରେନ୍ ଆଗୁଆଇକଆଃ ନୁତୁମ୍କ ହବାଅଃତାନା ଲୋଟନ୍, ଶୋବାଲ୍, ସିବିୟନ୍, ଆନା, ଦିଶୋନ୍, ଏସର୍ ଓଡ଼ୋଃ ଦିଶାନ୍। ନେ ହଡ଼କ ସେୟିର୍ ଦିଶୁମ୍ରାଃ ଆପ୍ନାଃ ଆପ୍ନାଃ ପାର୍ଗାନ୍ରେ ହୋରିୟ କିଲିରେନ୍ ଆଗୁଆଇ ତାଇକେନାକ।
ଇଦୋମ୍ରେନ୍ ରାଜାକ
ଇସ୍ରାଏଲ୍ ଦିଶୁମ୍ରେ ଜେତାନ୍ ରାଜା କା ତାଇକେନ୍ ସିଦାରେ, ନେ ରାଜାକ ଇଦୋମ୍ ଦିଶୁମ୍ରେ ରାଇଜ୍ ତାଇକେନାକ।
ବିୟୋର୍ଆଃ ହନ୍ତେକଡ଼ା ବେଲା ଇଦୋମ୍ ଦିଶୁମ୍କେ ରାଇଜ୍କେଦା, ଆୟାଃ ମାରାଙ୍ଗ୍ ନାଗାର୍ରାଃ ନୁତୁମ୍ ଦିନ୍ହାବା ତାଇକେନା।
ବେଲାରାଃ ଗନଏଃ ତାୟମ୍ତେ, ବସ୍ରାରେ ତାଇନ୍ତାନ୍ ସେର୍ହରାଃ ହନ୍ତେକଡ଼ା ଯୋବବ୍ ଆୟାଃ ରାଜ୍ଗାଦିରେ ଦୁବ୍ୟାନା।
ଯୋବବ୍ରାଃ ଗନଏଃ ତାୟମ୍ତେ ତୈମନ୍ ପାର୍ଗାନ୍ରେନ୍ ହୁଶାମ୍ ଇନିୟାଃ ରାଜ୍ଗାଦିରେ ଦୁବ୍ୟାନା।
ହୁଶାମ୍ରାଃ ଗନଏଃ ତାୟମ୍ତେ ବେଦାଦ୍ରାଃ ହନ୍ତେକଡ଼ା ହଦାଦ୍, ମୋୟାବ୍ ପିଡ଼ିରେ ମିଦିୟନ୍ ହଡ଼କକେ ହାରାଅକେଦ୍କଆ ଓଡ଼ୋଃ ହଦାଦ୍ ଇନିୟାଃ ରାଜ୍ଗାଦିରେ ଦୁବ୍ୟାନା। ଆୟାଃ ମାରାଙ୍ଗ୍ ନାଗାର୍ରାଃ ନୁତୁମ୍ ଅବିତ୍।
ହଦାଦ୍ରାଃ ଗନଏଃ ତାୟମ୍ତେ ମସ୍ରେକାରେ ତାଇନ୍ତାନ୍ ସାମ୍ଲା, ଇନିୟାଃ ରାଜ୍ଗାଦିରେ ଦୁବ୍ୟାନା।
ସାମ୍ଲାରାଃ ଗନଏଃ ତାୟମ୍ତେ ଫରାତ୍ ଗାଡ଼ା ହେପାଦ୍ରାଃ ରହୋବତ୍ରେ ତାଇନ୍ତାନ୍ ଶୌଲ୍, ଇନିୟାଃ ରାଜ୍ଗାଦିରେ ଦୁବ୍କେଦ୍ତେ ରାଇଜ୍କେଦା।
ଶୌଲ୍ରାଃ ଗନଏଃ ତାୟମ୍ତେ ଆକ୍ବର୍ରାଃ ହନ୍ତେକଡ଼ା ବାଲ୍ହନାନ୍ ଇନିୟାଃ ରାଜ୍ଗାଦିରେ ଦୁବ୍କେଦ୍ତେ ରାଇଜ୍କେଦା।
ଆକ୍ବର୍ରାଃ ହନ୍ତେକଡ଼ା ବାଲ୍ହନାନ୍ରାଃ ଗନଏଃ ତାୟମ୍ତେ ହଦାର୍ ଇନିୟାଃ ରାଜ୍ଗାଦିରେ ଦୁବ୍କେଦ୍ତେ ରାଇଜ୍କେଦା। ଆୟାଃ ମାରାଙ୍ଗ୍ ନାଗାର୍ରାଃ ନୁତୁମ୍ ପାଉ ଓଡ଼ୋଃ ଆୟାଃ କୁଡ଼ିତେୟାଃ ନୁତୁମ୍ ମହେଟାବେଲ୍ ତାଇକେନା। ଇନିଃ ମଟ୍ରେଦ୍ଆଃ ହନ୍କୁଡ଼ି ତାଇକେନା ଓଡ଼ୋଃ ମେସାହଦ୍ରାଃ ଜାଇକୁଡ଼ି ତାଇକେନା।
ଏଷୌତାଃଏତେ ଅଡଙ୍ଗ୍କାନ୍ କିଲିକ ଓଡ଼ୋଃ ଆକଆଃ ଠାୟାଦ୍ ଲେକା ନୁତୁମ୍କ ହବାଅଃତାନା, ତିମ୍ନା, ଅଲ୍ବା, ଯିଥେତ୍, ଅହଲିବାମା, ଏଲା, ପିନୋନ୍, କନସ୍, ତୈମନ୍, ମିବ୍ସର୍, ମଗ୍ଦିୟେଲ୍ ଓଡ଼ୋଃ ଈରମ୍। ନେ ସବେନ୍କ ଆପାନ୍ ଆପାନ୍ ଆକ୍ତେୟାର୍ ଲେକାତେ ଇଦୋମ୍ ଦିଶୁମ୍ରେନ୍ ଆଗୁଆଇ ତାଇୟାନାକ। ଏଷୌ ହବାଅଃତାନାଏ ଇଦୋମିୟ ହଡ଼କଆଃ ପୁର୍ଖା ଆପୁ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.