Munda Bible
ଏନେଟେଦ୍ 35
ବେଥେଲ୍ରେ ଯାକୁବ୍କେ ପାର୍ମେଶ୍ୱାର୍ଆଃ ଆଶିଷ୍
ଏନ୍ତେ ପାର୍ମେଶ୍ୱାର୍ ଯାକୁବ୍କେ କାଜିକିୟା, “ବିରିଦ୍ମେ, ବେଥେଲ୍ ସେନ୍କେଦ୍ତେ ଏନ୍ତାଃରେ ତାଇନଃମେଁ। ଆମାଃ ହାଗା ଏଷୌ ସାମ୍ନାଙ୍ଗ୍ଏତେ ନିର୍ ଇମ୍ତା ଅକ ପାର୍ମେଶ୍ୱାର୍ ଆମ୍କେ ଦାର୍ଶାନ୍ ଏମାକାମ୍ ତାଇକେନାଏ, ଇନିୟାଃ ନୁତୁମ୍ତେ ବେଦି ବାଇଏମେଁ।”
ଏନାତେ ଯାକୁବ୍ ଆୟାଃ ସବେନ୍ ହଡ଼କକେ ଓଡ଼ୋଃ କୁଟୁମ୍କକେ କାଜିକେଦ୍କଆଏ, “ଏଟାଃ ଦିଶୁମ୍ରେନ୍ ଅକ ମାହାପୁରୁକ ଆପେତାଃରେ ମେନାକଆ ଇନ୍କୁତାଃଏତେ ଆତମଃପେ। ଆପେ ଆପାନ୍କେ ଫାର୍ଚିନ୍ପେ ଓଡ଼ୋଃ ଲିଜାଃକ ବାଦ୍ଲାଏପେ। ଦଲାବୁ ନେ ଠାୟାଦ୍ ବାଗିକେଦ୍ତେ ବେଥେଲ୍ତେ ସେନଃଆବୁ, ଅକ ପାର୍ମେଶ୍ୱାର୍ ଆଇଁୟାଃ ଦୁକୁ ଦିପିଲିରେ ବିନ୍ତି ଆୟୁମ୍କେଦାଏ ଓଡ଼ୋଃ ଆଇଁୟାଃ ସେନ୍ ହରାରେ ଦେଙ୍ଗାନିଃ ହବାୟାନାଏ, ଇନିୟାଃ ନୁତୁମ୍ତେ ଏନ୍ତାଃରେ ମିଆଁଦ୍ ଦାଣେଁ ରାକାବ୍ରେୟାଃ ବେଦି ବାଇୟାଇଙ୍ଗ୍।”
ଇନ୍କୁ ଏଟାଃ ଦିଶୁମ୍ରେନ୍ ମାହାପୁରୁକକେ ଓଡ଼ୋଃ ଆକଆଃ ଲୁତୁର୍ରେ ତୁସିଙ୍ଗ୍କାନ୍ତେୟାଃ ଯାକୁବ୍କେ ଏମ୍କିୟାକ ଓଡ଼ୋଃ ଇନିଃ ଏନାକେ ଇଦିକେଦ୍ତେ ଶିଖିମ୍ ନୁତୁମ୍ ଠାୟାଦ୍ରେୟାଃ ଅଲୋନ୍ ଦାରୁ ବୁଟାରେ ତପାକେଦା।
ଏନ୍ତେ ଇନ୍କୁ ହରାସେନ୍ ଏଟେଃକେଦାକ ଓଡ଼ୋଃ ଅକ ସାହାର୍କରେ ସେନ୍ହରାକେଦାକ, ଏନ୍ ନାଗାର୍ରେନ୍ ହଡ଼କ ପାର୍ମେଶ୍ୱାର୍କେ ବରକିୟାକ ଓଡ଼ୋଃ ଇନ୍କୁ ଯାକୁବ୍ଆଃ ହନ୍କଲଃ ଲାଡ଼ାଇ ନାଙ୍ଗ୍ କାକ କୁଦାଅକେଦ୍କଆ। ଯାକୁବ୍ ଓଡ଼ୋଃ ଆୟାଃଲଃ ତାଇକାନ୍ ହଡ଼କ ଲୁସ୍ ନୁତୁମ୍ ଠାୟାଦ୍ତେ ସେଟେର୍ୟାନାକ, ଏନାକେ ବେଥେଲ୍ ମେନ୍ତେ ହଗି କାଜିୟାଃକ। ଏନା କିନାନ୍ ନୁତୁମ୍ ଦିଶୁମ୍ରେ ତାଇକେନା। ଏନ୍ତାଃରେ ଇନିଃ ମିଆଁଦ୍ ବେଦି ବାଇକେଦାଏ ଓଡ଼ୋଃ ଏନ୍ ଠାୟାଦ୍ରାଃ ନୁତୁମ୍ “ଏଲ୍ ବେଥେଲ୍1” ଦହକେଦାଏ, ଚିୟାଃଚି ଆୟାଃ ହାଗାତେୟାଃ ବରତେ ନିର୍ ତାଇକେନ୍ ଇମ୍ତା ପାର୍ମେଶ୍ୱାର୍ ଇନିଃକେ ଏନ୍ତାଃରେ ଦାର୍ଶାନ୍ ଏମାକାଇ ତାଇକେନାଏ।
ଏନ୍ତାଃରେ ଦବୋରା ନୁତୁମ୍ ରିବ୍କାରାଃ କାମ୍ଡ଼ିକୁଡ଼ି ଗଏଃୟାନାଏ ଓଡ଼ୋଃ ଇନିଃକେ ବେଥେଲ୍ରାଃ ଅଲୋନ୍ ଦାରୁ ବୁଟାରେ ତପାକିୟାକ। ଏନାତେ ଏନ୍ ଠାୟାଦ୍ରେୟାଃ ନୁତୁମ୍ ଅଲୋନ୍ ବାଖୁତ୍2 ହବାୟାନା।
ଏନ୍ତେ ଯାକୁବ୍ ପଦାନ୍ ଅରାମ୍ଏତେ ରୁହାଡ଼୍ୟାନ୍ ତାୟମ୍ତେ ପାର୍ମେଶ୍ୱାର୍ ଇନିଃକେ ଆଡଃମିସା ଦାର୍ଶାନ୍ ଏମ୍କେଦ୍ତେ ଆଶିଷ୍କିୟା। ପାର୍ମେଶ୍ୱାର୍ ଇନିଃକେ କାଜିକିୟା, “ଆମାଃ ନୁତୁମ୍ ଯାକୁବ୍, ମେନ୍ଦ ଆମାଃ ନୁତୁମ୍ ଯାକୁବ୍ ମେନ୍ତେ କା କାଜିୟଃଆ, ଆମାଃ ନୁତୁମ୍ ଇସ୍ରାଏଲ୍ ହବାଅଃଆ। ପାର୍ମେଶ୍ୱାର୍ ଇନିୟାଃ ନୁତୁମ୍ ଇସ୍ରାଏଲ୍ ଏମ୍କିୟାଏ।”
ପାର୍ମେଶ୍ୱାର୍ ଇନିଃକେ ଆଡଃଗି କାଜିକିୟା, “ଆଇଙ୍ଗ୍ ପୁରାଃ ପେଡ଼େୟାନ୍ ପାର୍ମେଶ୍ୱାର୍ ତାନିଙ୍ଗ୍, ଆମାଃ ପୁରାଃଗି ହନ୍କ ପସାଇଦିୟଃକାକ। ଆମାଃ ମିଆଁଦ୍ ଜାତିଏତେ ପୁରାଃଗି ଜାତିକ ଅଡଙ୍ଗ୍ଅଃଆ ଓଡ଼ୋଃ ଆମାଃତାଃଏତେ ରାଜାକ ଅଡଙ୍ଗ୍ଅଃଆ। ଆଇଙ୍ଗ୍ ଆବ୍ରାହାମ୍କେ ଓଡ଼ୋଃ ଇସାକ୍କେ ଅକ ଦିଶୁମ୍ ଏମାକାଦ୍କିନାଇଙ୍ଗ୍, ଏନ୍ ଦିଶୁମ୍ ଆମ୍କେ ଓଡ଼ୋଃ ଆମାଃ କିଲିକକେ ଏମାକଆଇଙ୍ଗ୍।”
ଅକ ଠାୟାଦ୍ରେ ପାର୍ମେଶ୍ୱାର୍ ଯାକୁବ୍ଲଃ ଜାଗାର୍କେଦାଏ ଓଡ଼ୋଃ ଏନ୍ ଠାୟାଦ୍ ବାଗିକେଦ୍ତେ ଚେତାନ୍ତେ ସେନଃୟାନା। ଯାକୁବ୍ ପାର୍ମେଶ୍ୱାର୍ଲଃ ଜାଗାର୍କେଦ୍ ଠାୟାଦ୍ତାଃରେ ଦିରିରାଃ ମିଆଁଦ୍ ଖୁଣ୍ଟୁ ବିଦ୍କେଦ୍ତେ ଏନାରେ ନୁଏଁ ଦାନ୍ ରାକାବ୍କେଦାଏ ଓଡ଼ୋଃ ଅଲିଭ୍ ସୁନୁମ୍ ଦୁଲ୍କେଦାଏ। ଯାକୁବ୍ ପାର୍ମେଶ୍ୱାର୍ଲଃ ଜାଗାର୍କେଦ୍ ଠାୟାଦ୍ରାଃ ନୁତୁମ୍ ବେଥେଲ୍ ଏମ୍କେଦାଏ।
ରାହେଲ୍ଆଃ ଗନଏଃ
ଏନ୍ତେ ଯାକୁବ୍ ଓଡ଼ୋଃ ଆୟାଃ କୁଟୁମ୍କ ବେଥେଲ୍ଏତେ ସେନଃୟାନାକ, ମେନ୍ଦ ଇଫ୍ରାଥା ସାହାର୍ ସେଟେର୍ ନାଗେନ୍ତେ କାଟିକାନ୍ ସାଙ୍ଗିନ୍ ହରା ତାଇକେନ୍ ଇମ୍ତା ରାହେଲ୍ରାଃ ହନ୍ ଜାନାମଃ ନେଣ୍ଡା ସେଟେର୍ୟାନା ଓଡ଼ୋଃ ଇନିଃ ପୁରାଃଗି ଦୁକୁ ନାମ୍କେଦାଏ। ଇନିୟାଃ ହନ୍ ଜାନାମ୍ରେୟାଃ ଦୁକୁ ପୁରାଃଗି ହବାୟାନା ଇମ୍ତା ଇନିୟାଃ କୁସ୍ରେନ୍କୁଡ଼ି କାଜିକିୟାଏ, “ଆଲମ୍ ବରଏୟା, ଆମାଃ ଆଡଃମିଆଦ୍ କଡ଼ାହନ୍ ଜାନାମଃଆଏ।” ଇନିଃ ଗଜଃଲେକା ହବାୟାନାଏ ଓଡ଼ୋଃ ଗଜଃ ସିଦାରେ ହନ୍ରାଃ ନୁତୁମ୍ ବିନୋନି ମେନ୍ତେ ନୁତୁମ୍ ଏମ୍କିୟା। ମେନ୍ଦ ହନ୍ରାଃ ଆପୁତେ ଇନିଃକେ ବେଞ୍ଜାମିନ୍ ମେନ୍ତେ ନୁତୁମ୍କିୟା।
ନେ ଲେକାତେ ରାହେଲ୍ରାଃ ଗନଏଃ ହବାୟାନା, ଓଡ଼ୋଃ ଇଫ୍ରାଥା ନୁତୁମ୍ ସେନ୍ ହରା ଗେନାରେ ଇନିଃକେ ତପାକିୟାକ, ଅକଆଃଚି ବେଥ୍ଲେହେମ୍ ମେନ୍ତେ ସାରିୟଃତାନା। ଯାକୁବ୍ ପାହାମେ ନାଙ୍ଗ୍ ଏନ୍ ତପାଗାଡ଼ା ଚେତାନ୍ରେ ଦିରିରାଃ ମିଆଁଦ୍ ଖୁଣ୍ଟୁ ବିଦ୍କେଦାଏ ଓଡ଼ୋଃ ରାହେଲ୍ଆଃ ତପାଗାଡ଼ାରେୟାଃ ଦିରିରାଃ ଖୁଣ୍ଟୁ ବିଦାକାନ୍ତେୟାଃ ତିସିଙ୍ଗ୍ ଜାକେଦ୍ ମେନାଃ। ଇସ୍ରାଏଲ୍ ଏନ୍ତାଃଏତେ ସେନଃୟାନା ଓଡ଼ୋଃ ଏଦର୍ ନୁତୁମ୍ ଗାଡ଼୍ ପାରମ୍କେଦ୍ତେ ଆୟାଃ କୁମ୍ବା ବାଇକେଦାଏ।
ଯାକୁବାଃ ହନ୍କ
ଇସ୍ରାଏଲ୍ ଏନ୍ ଦିଶୁମ୍ରେ ତାଇନ୍ତାନ୍ ଇମ୍ତା ରୁବେନ୍ ଆପୁତେୟାଃ ବିଲ୍ହା ନୁତୁମ୍ ହିରୁମ୍ତେଲଃ ହଡ଼୍ମରାଃ ଏତ୍କାନ୍ କାମି ରିକାକେଦା। ନେ କାଜି ଯାକୁବ୍ ଆୟୁମ୍କେଦ୍ତେ ଖିସ୍ୟାନା।
ଯାକୁବ୍ଆଃ ଗେଲ୍ବାର୍ ହନ୍କ ତାଇକେନା। ଇନ୍କୁଏତେ ରୁବେନ୍ ଯାକୁବ୍ଆଃ ମାରାଙ୍ଗ୍ ହନ୍ ତାଇକେନାଏ। ରୁବେନ୍, ଶିମିୟୋନ୍, ଲେବୀ, ଯିହୁଦା, ଇଷାଖର୍ ଓଡ଼ୋଃ ସବ୍ଲୁନ୍, ନେ ସବେନ୍କ ଲେୟାରାଃ ହନ୍କ ତାଇକେନା। ଯୋଷେଫ୍ ଓଡ଼ୋଃ ବେଞ୍ଜାମିନ୍ ରାହେଲ୍ରାଃ ହନ୍ ତାଇକେନାକିନ୍। ଦାନ୍ ଓଡ଼ୋଃ ନପ୍ତାଲି ରାହେଲ୍ଆଃ କାମ୍ଡ଼ିକୁଡ଼ି ବିଲ୍ହାରାଃ ହନ୍କିନ୍ ତାଇକେନା। ଗାଦ୍ ଓଡ଼ୋଃ ଆସେର୍ ଲେୟାରାଃ କାମ୍ଡ଼ିକୁଡ଼ି ସିଲ୍ପାରାଃ ହନ୍କିନ୍ ତାଇକେନା। ଯାକୁବ୍ଆଃ ନେ ହନ୍କ ପଦାନ୍ ଅରାମ୍ରେ ଜାନାମାକାନ୍ ତାଇକେନାକ।
ଇସାକ୍ଆଃ ଗନଏଃ
ଯାକୁବ୍ ଆୟାଃ ଆପୁତେ ତାଇନଃତାନ୍ ମମ୍ରି ନୁତୁମ୍ ଠାୟାଦ୍ତେ ହିଜୁଃୟାନା। ଏନା କିରିୟଥ୍ଅର୍ବ ମେନ୍ଲେରେ ହେବ୍ରୋଣ୍ ନାଗାର୍ରାଃ ହେପାଦ୍ରେ ତାଇକେନା। ଏନ୍ତାଃରେ ଆବ୍ରାହାମ୍ ଓଡ଼ୋଃ ଇସାକ୍ ତାଇନଃ ତାଇକେନାକିନ୍। ଇସାକ୍ ୧୮୦ ବାରାଷ୍ ଜାକେଦ୍ ଜୀନିଦ୍ ତାଇକେନାଏ। ଏନ୍ତେ ଇସାକ୍ ପୁରା ହାଡ଼ାମ୍ୟାନ୍ ତାୟମ୍ତେ ଗଏଃୟାନାଏ ଓଡ଼ୋଃ ଇନିୟାଃ ହନ୍ତେକଡ଼ା ଏଷୌ ଓଡ଼ୋଃ ଯାକୁବ୍ ଇନିଃକେ କାବାର୍ ଏମ୍କିୟାକିନ୍।
Source notes (2)
- Footnote ବେଥେଲ୍ରେନ୍ ପାର୍ମେଶ୍ୱାର୍
- Footnote ଏୟମ୍ରାଃ ଅଲୋନ୍
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.