Munda Bible
ଏନେଟେଦ୍ 33
ଯାକୁବ୍ ଓଡ଼ୋଃ ଏଷୌଆଃ ନେପେଲ୍
ଯାକୁବ୍, ଏଷୌକେ ୪୦୦ ହଡ଼କଲଃ ହିଜୁଃତାନ୍ ନେଲ୍କିୟାଏ। ଏନାତେ ଯାକୁବ୍ ଆୟାଃ ହନ୍କକେ ବିନ୍ଗାଅକେଦ୍ତେ ଲେୟା, ରାହେଲ୍ ଓଡ଼ୋଃ ବାରାନ୍ କାମ୍ଡ଼ିକୁଡ଼ି କିନ୍ତାଃରେ ଦହକେଦ୍କଆ। ଇନିଃ ପାହିଲା ବାରାନ୍ କାମ୍ଡ଼ିକୁଡ଼ି ଓଡ଼ୋଃ ଆକିନାଃ ହନ୍କକେ, ଏନ୍ତେ ଲେୟା ଓଡ଼ୋଃ ଆୟାଃ ହନ୍କକେ, ଟୁଣ୍ଡୁରେ ରାହେଲ୍ ଓଡ଼ୋଃ ଯୋଷେଫ୍କେ ଦହକିୟା। ଯାକୁବ୍ ଆଇଃଗି ସବେନ୍କଆଃଏତେ ଆୟାର୍ରେ ସେନ୍ୟାନ୍ଲଃ ଅତେରେ ଏୟା ଧାଅଁ ଅମ୍ବାଃକେଦ୍ତେ ଜହାର୍କିୟା ଓଡ଼ୋଃ ଆୟାଃ ହାଗାତେୟାଃ ସାମ୍ନାଙ୍ଗ୍ତେ ସେନ୍ ସେଟେର୍ୟାନା। ଏଷୌ ଇନିଃଲଃ ନେପେଲ୍ ନାଗେନ୍ତେ ନିର୍ ଇଦିକେଦା ଓଡ଼ୋଃ ଆୟାଃ ତିଃଇକେ ଜିଲିଙ୍ଗ୍କେଦ୍ତେ ହାମ୍ବୁଦ୍କିୟା, ଏନ୍ତେ ବାରାନ୍କିନ୍ ଚଅଃୟାନ୍ଲଃ ରାଆଃକେଦାକିନ୍। ଏନ୍ତେ ଏଷୌ ଚାରିଓସାଃରେ କୁଡ଼ିକକେ ଓଡ଼ୋଃ ହନ୍କକେ ନେଲ୍କେଦ୍ତେ କୁଲିକିୟା, “ଆମାଃଲଃ ନେ ସବେନ୍କ ଅକଏ ତାନ୍କ ?”
ଯାକୁବ୍ କାଜିରୁହାଡ଼୍କିୟାଏ, “ପାର୍ମେଶ୍ୱାର୍ଆଃ ଦାୟାତେ ଆମାଃ ଦାସିକେ ନେ ସବେନ୍ ହନ୍କକେ ଏମ୍କିୟା।” ଏନ୍ତେ ଇନିୟାଃ ବାରାନ୍ କାମ୍ଡ଼ିକୁଡ଼ି ଆକିନାଃ ହନ୍କଲଃ ହେପାଦ୍ ହିଜୁଃୟାନାକ ଓଡ଼ୋଃ ଅମ୍ବାକେଦ୍ତେ ଜହାର୍କିୟାକ। ଏନ୍ତେ ଲେୟା ଓଡ଼ୋଃ ଆୟାଃ ହନ୍କ ହିଜୁଃକେଦ୍ତେ ଅମ୍ବାୟାନ୍ଲଃ ଜହାର୍କିୟାକ। ଟୁଣ୍ଡୁରେ ଯୋଷେଫ୍ ଓଡ଼ୋଃ ରାହେଲ୍ ହଗି ହିଜୁଃକେଦ୍ତେ ଅମ୍ବାୟାନ୍ଲଃ ଜହାର୍କିୟାକିନ୍।
ଏଷୌ କୁଲିକିୟାଏ, “ଆଇଙ୍ଗ୍ ହିଜୁଃ ଇମ୍ତା ଅକ ଝୁଣ୍ଡ୍କକେ ନେଲ୍କେଦ୍କଆଇଙ୍ଗ୍, ଏନ୍କୁ ଚିନାଃ ନାଗେନ୍ତେ ?”
ଯାକୁବ୍ କାଜିକିୟାଏ, “ଆଇଁୟାଃ ଗମ୍କେଆଃ ନେପେଲ୍ରେ ସାୟାଦ୍ ନାମେ ନାଙ୍ଗ୍, ଇନ୍କୁକେ ସିଦାରେଇଙ୍ଗ୍ କୁଲାକାଦ୍କ ତାଇକେନା।”
ମେନ୍ଦ ଏଷୌ କାଜିକିୟାଏ, “ହେ ହାଗା, ଆଇଁୟାଃ ପୁରାଃଗି ମେନାଃ। ଅକଆଃ ଆମାଃ ତାନାଃ, ଏନା ଆମାଃ ନାଗେନ୍ତେ ଦହଏମେ।”
ଯାକୁବ୍ କାଜିକିୟାଏ, “କାହାଗି, ବିନ୍ତିମେ ତାନାଇଙ୍ଗ୍, ଆଇଙ୍ଗ୍ ଆମାଃ ଆୟାର୍ରେ ସାୟାଦ୍ ନାମାକାଦ୍ ରେଦ, ଆଇଁୟାଃ ଏମାକାଦ୍ ଦାନ୍ ସବେନାଃକେ ତେଲାଏମେ। ଚିୟାଃଚି ପାର୍ମେଶ୍ୱାର୍ଆଃ ମେଦ୍ମୁହାଁଡ଼୍ ନେଲ୍କେଦ୍ ଲେକା ଆମାଃ ମେଦ୍ମୁହାଁଡ଼୍କେ ନେଲ୍କେଦାଇଙ୍ଗ୍, ନାହାଃଁଦ ଆଲାଙ୍ଗ୍ ବାରାନ୍କିନ୍ ଗାତି ଲେକା ହବାକାନାଲାଙ୍ଗ୍। ଏନାମେନ୍ତେ ଆଇଙ୍ଗ୍ ଆମାଃ ନାଙ୍ଗ୍ ଆଉକାଦ୍ ଆଶିଷ୍ ଦାନ୍ ସବେନାଃକେ ଦାୟାକେଦ୍ତେ ତେଲାଏମେ। ଚିଆଃଚି ପାର୍ମେଶ୍ୱାର୍ ଆଇଙ୍ଗ୍କେ ସାୟାଦ୍ ଏମାକାଦିୟାଁଏ, ଓଡ଼ୋଃ ଆଇଁୟାଃ ପୁରାଃଗି ମେନାଃ।” ନେ'ଲେକାତେ ଯାକୁବ୍ ପୁରାଃଗି କାଜିକିଃ ହରାତେ, ଏଷୌ ଏନ୍ ସବେନାଃକେ ତେଲାକେଦା।
ଏନ୍ତେ ଏଷୌ କାଜିକିୟାଏ, “ଦଲାବୁ ସେନ୍ ଆୟାର୍ରଃଆ, ଆଇଙ୍ଗ୍ ଆପେୟାଃ ଆୟାର୍ ଆୟାର୍ତେ ସେନ୍ତାନା।”
ମେନ୍ଦ ଯାକୁବ୍ କାଜିକିୟାଏ, “ଗମ୍କେ ଆମ୍ଦ ସାରିତାନାମ୍, ନେ ହନ୍କ ହୁପ୍ଡ଼ିଙ୍ଗ୍ଗି ମେନାକଆ, ଓଡ଼ୋଃ ଆଇଁୟାଃ ଗୋଟ୍ରେ ହନ୍ ଆୟାର୍କାଦ୍କ ଚିମିନ୍ ଗାଈ ଓଡ଼ୋଃ ମିଣ୍ଡିକ ମେନାକଆ। ଇନ୍କୁକେ ସିଙ୍ଗିସାଟୁବ୍ ସେସେନ୍ କରେ, ଲାଗାକେଦ୍ତେ ଗଏଃକଆକ। ଏନାମେନ୍ତେ ବିନ୍ତିମେ ତାନାଇଙ୍ଗ୍, ହେ ଗମ୍କେ, ଆମ୍ ଆୟାର୍ତେ ସେନଃ ସିଦାନ୍ମେ, ସେୟିର୍ ପାର୍ଗାନ୍ରେ ସେଟେର୍ ଜାକେଦ୍ ଆଇଙ୍ଗ୍ ଜାଁତୁ ଓଡ଼ୋଃ ଆକଆଃ ହନ୍କଆଃ ସେସେନ୍ରେୟାଃ ପେଡ଼େଃ ଲେକାତେ ମାଡ଼ି ମାଡ଼ିତେଇଙ୍ଗ୍ ଇଦି ସେଟେର୍କଆ।”
ଏନ୍ତେ ଏଷୌ କାଜିକିୟାଏ, “ତାବ୍ଦ ଆଇଙ୍ଗ୍ ଆଇଁୟାଃଲଃ ହିଜାକାନ୍ ଚିମିନ୍ ହଡ଼କକେ ଆମାଃତାଃରେ ବାଗିକେଦ୍ତେଇଙ୍ଗ୍ ସେନଃତାନା।”
ମେନ୍ଦ ଯାକୁବ୍ କାଜିରୁହାଡ଼୍କିୟାଏ, “ଏନାରେୟାଃ ଲାଗାତିଙ୍ଗ୍ ବାନଃଆ ? ଆଇଁୟାଃଲଃ ଗମ୍କେଆଃ ସାୟାଦ୍ ଏସ୍କାର୍ ତାଇନ୍ରେ ହବାଅଃଆ।” ଏନ୍ତେ ଏଷୌ ଏନ୍ ହୁଲାଙ୍ଗ୍ ସେୟିର୍ସାଃତେ ରୁହାଡ଼୍ ନାଙ୍ଗ୍ ଅଡଙ୍ଗ୍ୟାନାଏ। ମେନ୍ଦ ଯାକୁବ୍ ସୁକୋତ୍ତେ ସେନଃୟାନା ଓଡ଼ୋଃ ଏନ୍ତାଃରେ ଆୟାଃ ନାଙ୍ଗ୍ ତାଇନଃ ଅଡ଼ାଃ ଏନ୍ତେ ଆସୁଲ୍ ଜାଁତୁକ ନାଙ୍ଗ୍ ଗଁଣା ବାଇକେଦାଏ। ଏନାମେନ୍ତେ ଏନ୍ ଠାୟାଦ୍ରାଃ ନୁତୁମ୍ ସୁକୋତ୍ ହବାୟାନା।
ନେ'ଲେକା ଯାକୁବ୍ ପଦାନ୍ ଅରାମ୍ଏତେ ଅଡଙ୍ଗ୍ୟାନ୍ଲଃ କିନାନ୍ ଦିଶୁମ୍ରେୟାଃ ଶିଖିମ୍ ନାଗାର୍ତେ ବୁଗିଲେକାଏ ସେଟେର୍ୟାନା ଓଡ଼ୋଃ ନାଗାର୍ରାଃ ବାହାରିରେ କୁମ୍ବା ବାଇକେଦାଏ। ଯାକୁବ୍ ଅକ ଠାୟାଦ୍ରେ କୁମ୍ବା ବାଇକେଦ୍ତେ ତାଇକେନା, ଏନ୍ ପିଡ଼ିକେ ଶିଖିମ୍ରାଃ ଆପୁ ହାମୋର୍ଆଃ କିଲିକତାଃଏତେ ଯାକୁବ୍ ମିଦ୍ଶାଅ ରୁପା ସିକା ଏମ୍କେଦ୍ତେ କିରିଙ୍ଗ୍କେଦା। ଇନିଃ ଏନ୍ତାଃରେ ମିଆଁଦ୍ ବେଦି ବାଇକେଦା ଓଡ଼ୋଃ ଏନାକେ ଏଲ୍-ଏଲୋହି-ଇସ୍ରାଏଲ୍ଆଃ ପାର୍ମେଶ୍ୱାର୍1 ମେନ୍ତେ ନୁତୁମ୍କେଦା।
Source notes (1)
- Footnote ଇସ୍ରାଏଲ୍ରେନ୍ ପାର୍ମେଶ୍ୱାର୍
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.