Munda Bible
ଏନେଟେଦ୍ 23
ସାରାରାଃ ଗନଏଃ
ସାରା ୧୨୭ ବାରାଷ୍ ଜୀନିଦ୍ ତାଇକେନା। ଇନିଃ କିରିୟଥ୍ଅର୍ବ1ରେ ଗଏଃୟାନା। ଏନା କିନାନ୍ ଦିଶୁମ୍ରେ ମେନାଃ ଓଡ଼ୋଃ ଏନାକେ ହେବ୍ରୋଣ୍ ମେନ୍ତେ ହଁ କାଜିୟାଃକ। ଏନ୍ତାଃରେ ଆବ୍ରାହାମ୍ ସାରା ନାଗେନ୍ତେ ଏୟମ୍ ଓଡ଼ୋଃ ରାଆଃକେଦାଏ।
ଏନ୍ତେ ଆବ୍ରାହାମ୍ ଆୟାଃ ଗୟାକାନ୍ କୁଡ଼ିତାଃଏତେ ବିରିଦ୍କେଦ୍ତେ ହିତ୍ତିୟ ହଡ଼କଲଃ ଜାଗାର୍କେଦାଏ। ଇନିଃ କାଜିକେଦାଏ, “ଆଇଙ୍ଗ୍ ଆପେ ଥାଲାରେ ମିହୁଁଡ଼୍ ଏଟାଃ ଦିଶୁମ୍ରେନ୍ ହଡ଼ ତାନିଙ୍ଗ୍। ଆପେ ଥାଲାରେ ତପାଗାଡ଼ା ନାଙ୍ଗ୍ ଆଇଙ୍ଗ୍କେ କାଟିକାନ୍ ଠାୟାଦ୍ କିରିଙ୍ଗ୍ରେୟାଃ ଆକ୍ତେୟାର୍ ଏମାଇଙ୍ଗ୍ପେ, ଏନ୍ତାଃରେ ଆଇଙ୍ଗ୍ ଆଇଁୟାଃ ଗୟାକାନ୍ କୁଡ଼ିକେ କାବାର୍ ଏମାଇୟାଇଙ୍ଗ୍।”
ଏନ୍ତେ ହିତ୍ତିୟ ହଡ଼କ ଆବ୍ରାହାମ୍କେ କାଜିରୁହାଡ଼୍କିୟାକ, “ହେ ଗମ୍କେ, ଆଲେୟାଃ କାଜି ଆୟୁମେମେ, ଆମ୍ ଆଲେୟାଃ ଥାଲାରେ ପେଡ଼େୟାନ୍ ରାଜା ତାନ୍ମେ, ଏନାମେନ୍ତେ ଆଲେୟାଃ ବୁଗିନ୍ ତପା ଗାଡ଼ାରେ ଆମାଃ ଗୟାକାନ୍ କୁଡ଼ିକେ କାବାର୍ ଏମାଇମେ। ଆଲେକଏତେ ଜେତାଏ ଆପ୍ନାଃ କାବାର୍ରେ ଆମାଃ କୁଡ଼ିଆଃ ଗନଏଃ ହଡ଼୍ମକେ ତପା ନାଙ୍ଗ୍ କାହା ମେନ୍ତେ କାଲେ କାଜିୟା।”
ଇମ୍ତା ଆବ୍ରାହାମ୍ ବିରିଦ୍ୟାନା, ଓଡ଼ୋଃ ଏନ୍ ହିତ୍ତିୟ ଦିଶୁମ୍ରେନ୍ ହଡ଼କକେ ଜହାର୍କେଦ୍କଆ। ଏନ୍ତେ ଆବ୍ରାହାମ୍ ଇନ୍କୁଲଃ ଜାଗାର୍ କେଦ୍ତେ କାଜିକେଦ୍କଆ, “ଆପେୟାଃ ସାନାଙ୍ଗ୍ ଲେକାତେ ଆଇଁୟାଃ କୁଡ଼ିକେ କାବାର୍ ଏମ୍ନାଗେନ୍ତେ ସାନାଙ୍ଗ୍ତାନ୍ ରେଦ ସୋହର୍ଆଃ ହନ୍ତେକଡ଼ା ଇଫ୍ରୋଣ୍ତାଃରେ କାଜି ଉଦୁବେପେ। ଇନିଃ ଆୟାଃ ପିଡ଼ିରାଃ ଟୁଣ୍ଡୁ ହିସାରେ ତାଇକାନ୍ ମକ୍ପେଲା ନୁତୁମ୍ ଲାପାଙ୍ଗାକେ ଆଇଙ୍ଗ୍ତାଃରେ ରୁପା ସିକାତେ ଆଖ୍ରିଙ୍ଗ୍ ନାଙ୍ଗ୍ କାଜିପେ, ଆଇଙ୍ଗ୍ ଏନାକେ ତପାଗାଡ଼ା ନାଙ୍ଗ୍ ଆକ୍ତେୟାର୍ ରିକାଏୟାଇଙ୍ଗ୍।”
ଇମ୍ତା ହିତିୟରେନ୍ ଇଫ୍ରୋଣ୍ ଆୟାଃ ହଡ଼କଲଃ ନାଗାର୍ରେୟାଃ ଦୁହାର୍ତାଃରେ ଦୁବାକାନ୍ ତାଇକେନା। ଏନ୍ତାଃରେ ଦୁବାକାନ୍ ସବେନ୍ ହିତ୍ତିୟ ହଡ଼କଆଃ ସାମ୍ନାଙ୍ଗ୍ରେ ଇନିଃ ଆବ୍ରାହାମ୍କେ କାଜିକିୟା, “ହେ ଗମ୍କେ, ଏନ୍ଲେକା ଆଲକା ହବାଅଃକା, ଆଇଁୟାଃ କାଜି ଆୟୁମେମେ ! ଆଇଙ୍ଗ୍ ଆଇଁୟାଃ ହଡ଼କଆଃ ଆୟାର୍ରେ ଏନ୍ ପିଡ଼ି ଓଡ଼ୋଃ ଏନାରେ ତାଇକାନ୍ ଲାପାଙ୍ଗା ଏମାମ୍ତାନାଇଙ୍ଗ୍, ଆମ୍ ଏନ୍ତାଃରେ ଆମାଃ କୁଡ଼ିକେ କାବାର୍ ଏମାଇମେ।”
ମେନ୍ଦ ଆବ୍ରାହାମ୍ ଏନ୍ ଦିଶୁମ୍ରେନ୍ ହଡ଼କକେ ଜହାର୍ କେଦ୍କଆଏ। ଓଡ଼ୋଃ ଏନ୍ତାଃରେନ୍ ହଡ଼କ ଆୟୁମ୍ ଦାଡ଼ି ଇଫ୍ରୋଣ୍କେ କାଜିକିୟା, “ଦାୟାକେଦ୍ତେ ଆଇଁୟାଃ କାଜିଆୟୁମେମେ। ଆଇଙ୍ଗ୍ ଏନ୍ ପିଡ଼ିରାଃ ଗନଙ୍ଗ୍ ପାଏସା ଏମେୟାଇଙ୍ଗ୍, ଆମ୍ ଏନାକେ ତେଲାଏମେ, ତାବ୍ଦ ଆଇଙ୍ଗ୍ ଏନ୍ତାଃରେ ଆଇଁୟାଃ କୁଡ଼ିକେ କାବାର୍ ଏମାଇୟାଇଙ୍ଗ୍।”
ଏନ୍ତେ ଇଫ୍ରୋଣ୍ ଆବ୍ରାହାମ୍କେ କାଜିରୁହାଡ଼୍କିୟା, “ହେ ଗମ୍କେ, ପିଡ଼ିରାଃ ଗନଙ୍ଗ୍ ୪୦୦ ରୁପା ସିକା ଆମାଃ ଓଡ଼ୋଃ ଆଇଁୟାଃ ଥାଲାରେ ଏନା ଚିମିନ୍ ତାନାଃ ? ଏନାମେନ୍ତେ ଆମାଃ କୁଡ଼ିକେ ଏନ୍ତାଃରେ କାବାର୍ ଏମାଇମେ।” ଇଫ୍ରୋଣ୍ଆଃ ନେ କାଜି ଆୟୁମ୍କେଦ୍ତେ ଆବ୍ରାହାମ୍, ହିତ୍ତିୟ ହଡ଼କଆଃ ଆୟାର୍ରେ ଏନ୍ ପିଡ଼ିରାଃ ଗନଙ୍ଗ୍ କିରିଙ୍ଗ୍ ଆଖ୍ରିଙ୍ଗ୍ତାନ୍ ହଡ଼କଆଃ ଥାଲାରେ ଚାଲାଅଃତାନ୍ ଅଜାନ୍ ଲେକାତେ ୪୦୦ ରୁପା ସିକା ଏଫ୍ରୋଣ୍କେ ଏମ୍କିୟା।
ଏନ୍ତେ ମମ୍ରିରାଃ ସିଙ୍ଗିତୁରଃସାଃରେୟାଃ ମକ୍ପେଲାରେ ତାଇକାନ୍ ଇଫ୍ରୋଣ୍ରାଃ ପିଡ଼ି, ଏନାରେ ତାଇକାନ୍ ଲାପାଙ୍ଗା ଓଡ଼ୋଃ ଚାରିଓସାଃରେ ତାଇକାନ୍ ଦାରୁକ ଆବ୍ରାହାମ୍ଆଃ ଆକ୍ତେୟାର୍ ହବାୟାନା। ନେଆଁ ହିତ୍ତିୟରେନ୍ ହଡ଼କ ଅକନ୍କ ନାଗାର୍ ଦୁଆର୍ରେ ବଲଃଆ ଇନ୍କୁଆଃ ସାମ୍ନାଙ୍ଗ୍ରେ ଆବ୍ରାହାମ୍କେ ଆକ୍ତେୟାର୍ ଏମ୍ୟାନା।
ଏନ୍ତାୟମ୍ତେ ଆବ୍ରାହାମ୍ ହେବ୍ରୋଣ୍ ଆୟାର୍ରେ ତାଇନ୍ତାନ୍ କିନାନ୍ ଦିଶୁମ୍ରେୟାଃ ମମ୍ରିରାଃ ସିଙ୍ଗିତୁରଃସାଃ ମକ୍ପେଲା ପିଡ଼ିରେ ତାଇକାନ୍ ଲାପାଙ୍ଗାରେ ଆୟାଃ କୁଡ଼ି ସାରାକେ କାବାର୍ ଏମ୍କିୟାଏ। ନେ'ଲେକାତେ ଆବ୍ରାହାମ୍ ହିତ୍ତିୟ ହଡ଼କତାଃଏତେ ଏନ୍ ପିଡ଼ି ଓଡ଼ୋଃ ଲାପାଙ୍ଗାକେ ତପାଗାଡ଼ା ଠାୟାଦ୍ ବାଇ ନାଙ୍ଗ୍ କିରିଙ୍ଗ୍କେଦାଏ ଓଡ଼ୋଃ ଆୟାଃ ଆକ୍ତେୟାର୍ ହବାୟାନା।
Source notes (1)
- Footnote ହେବ୍ରୋଣ୍
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.