Munda Bible
ଏନେଟେଦ୍ 22
ଆବ୍ରାହାମ୍ଆଃ ବିଶ୍ୱାସ୍ରାଃ ବିନିଡ଼ାଅ
ଚିମିନ୍ ମାହା ତାୟମ୍ତେ ପାର୍ମେଶ୍ୱାର୍ ଆବ୍ରାହାମ୍ଆଃ ବିଶ୍ୱାସ୍ରାଃ ବିଡ଼ାଅ ନାଗେନ୍ତେ କାଜିକିୟା, “ହେ ଆବ୍ରାହାମ୍, ହେ ଆବ୍ରାହାମ୍।” ଏନ୍ତେ ଆବ୍ରାହାମ୍ କାଜିରୁହାଡ଼୍କିୟାଏ, “ହେ ଗମ୍କେ, ଆଇଙ୍ଗ୍ଦ ନେତାଃରିୟାଁ।”
ଏନ୍ତେ ପାର୍ମେଶ୍ୱାର୍ କାଜିକିୟାଏ, “ଆମ୍ ଆମାଃ ମିଆଁଦ୍ଗି ହନ୍କଡ଼ାକେ, ଅକଏକେଚି ଆମ୍ ପୁରାଃଗି ଦୁଲାଡ଼୍ ତାନାମ୍, ଏନ୍ ଇସାକ୍କେ ଇଦିକେଦ୍ତେ ମୋରିୟା ଦିଶୁମ୍ତେ ସେନଃମେ, ଓଡ଼ୋଃ ଆଇଙ୍ଗ୍ ଅକ ବୁରୁ ଉଦୁବାମେୟାଁଇଙ୍ଗ୍, ଏନ୍ତାଃରେ ଇନିଃକେ ଆଇଙ୍ଗ୍ ନାଙ୍ଗ୍ ଉରୁବ୍ଦାଣେଁ ରାକାବିମେଁ।”
ଏଟାଃ ହୁଲାଙ୍ଗ୍ ଆବ୍ରାହାମ୍ ସେତାଃ ଇଦାନ୍ରେ ବିରିଦ୍ୟାନା ଓଡ଼ୋଃ ଉରୁବ୍ଦାଣେଁ ରାକାବ୍ ନାଙ୍ଗ୍ ସାହାନ୍ ମାଆଃକେଦ୍ତେ ଗାଧା ଚେତାନ୍ରେ ଲାଦିକେଦା। ଆବ୍ରାହାମ୍ ଆୟାଃଲଃ ବାରିୟା ଦାସିକିନ୍କେ ଓଡ଼ୋଃ ହନ୍ତେକଡ଼ା ଇସାକ୍କେ ଗାତିରେ ଇଦିକେଦ୍କିନା। ଓଡ଼ୋଃ ପାର୍ମେଶ୍ୱାର୍ କାଜିକାଦ୍ ଠାୟାଦ୍ତେକ ସେନଃୟାନା। ଆପି ମାହା ହୁଲାଙ୍ଗ୍ରେ ଆବ୍ରାହାମ୍ ସାଙ୍ଗିନ୍ଏତେ ଏନ୍ ଠାୟାଦ୍କେ ନେଲ୍କେଦା। ଏନ୍ତେ ଆବ୍ରାହାମ୍ ଏନ୍ ଦାସିକିନ୍କେ କାଜିକେଦ୍କିନା, “ଆବେନ୍ ବାରାନ୍କିନ୍ ନେ ଠାୟାଦ୍ରେ ଗାଧାଲଃ ତାଇନ୍ବେନ୍। ଆଇଙ୍ଗ୍ ଓଡ଼ୋଃ ଆଇଁୟାଃ ହନ୍, ଏନ୍ ଠାୟାଦ୍ ସେନ୍ୟାନ୍ଲଃ ସେୱା ରିକାକେଦ୍ତେ ଆବେନ୍ତାଃ ହିଜୁଃ ରୁହାଡ଼ାଃଲିଙ୍ଗ୍।”
ଆବ୍ରାହାମ୍ ଉରୁବ୍ଦାଣେଁ ରାକାବ୍ ସାହାନ୍ ଇଦିକେଦ୍ତେ ଇସାକ୍କେ ଗଅଃ ଇଚିକିୟା, ଏନ୍ତେ ଆବ୍ରାହାମ୍ ଆୟାଃ ତିଃଇରେ ସେଙ୍ଗେଲ୍ ଓଡ଼ୋଃ କାତୁ ସାବ୍କେଦ୍ତେ ବାରାନ୍କିନ୍ ମିସାତେ ସେନଃୟାନାକିନ୍। ଇସାକ୍ ଆୟାଃ ଆପୁ ଆବ୍ରାହାମ୍କେ କାଜିକିୟା,
“ଏ ଆବା।”
ଆବ୍ରାହାମ୍ କାଜିରୁହାଡ଼୍କିୟାଏ, “ହେ ଆଇଁୟାଃ ଦୁଲାଡ଼୍ ହନ୍ ଆଇଙ୍ଗ୍ଦ ନେତାଃରେ ମେନାଇୟାଁ।”
ଏନ୍ତେ ଇସାକ୍ ଆପୁତେକେ କୁଲିକିୟା, “ନେଲେମେ, ସେଙ୍ଗେଲ୍ ଓଡ଼ୋଃ ସାହାନ୍ ମେନାଃ, ମେନ୍ଦ ଉରୁବ୍ଦାଣେଁ ରାକାବ୍ ନାଗେନ୍ତେ ମିଣ୍ଡିହନ୍ କତାଃରିୟା ?”
ଆବ୍ରାହାମ୍ କାଜିରୁହାଡ଼୍କିୟାଏ, “ହେ ଆଇଁୟାଃ ଦୁଲାଡ଼୍ ହନ୍, ଉରୁବ୍ଦାଣେଁ ରାକାବ୍ ନାଙ୍ଗ୍ ପାର୍ମେଶ୍ୱାର୍ ଆଇଃଗି ମିଣ୍ଡିହନ୍ ଜଗାଡ଼ିୟାଏ।” ଏନ୍ତେ ବାରାନ୍କିନ୍ ମିସାତେ ସେନଃୟାନାକିନ୍।
ପାର୍ମେଶ୍ୱାର୍ କାଜିକାଦ୍ ଠାୟାଦ୍ତାଃ ଇନ୍କିନ୍ ସେଟେର୍ୟାନାକିନ୍। ଆବ୍ରାହାମ୍ ଏନ୍ତାଃରେ ମିଆଁଦ୍ ବେଦି ବାଇକେଦାଏ ଓଡ଼ୋଃ ଏନାରାଃ ଚେତାନ୍ରେ ସାହାନ୍ ଦହକେଦାଏ, ଏନ୍ତେ ଆୟାଃ ହନ୍ତେକଡ଼ା ଇସାକ୍କେ ତଲ୍କେଦ୍ତେ ସାହାନ୍ ଚେତାନ୍ରେ ବାଟିକିୟା। ଏନ୍ତେ ଆବ୍ରାହାମ୍ ଇସାକ୍କେ ଗଗଏଃ ନାଗେନ୍ତେ ଆୟାଃ ତିଃଇରେ କାତୁକେ ସାବ୍କେଦା। ମେନ୍ଦ ଏନ୍ ଦିପିଲିରେଗି ପ୍ରାଭୁ ପାର୍ମେଶ୍ୱାର୍ଆଃ ଦୁଁତ୍ ସିର୍ମାଏତେ ହାକାଅକିୟା, “ଏ ଆବ୍ରାହାମ୍, ଏ ଆବ୍ରାହାମ୍ !”
ଏନ୍ତେ ଆବ୍ରାହାମ୍ କାଜିରୁହାଡ଼୍କିୟାଏ, “ନେଲେମେ, ଆଇଙ୍ଗ୍ ନେତାଃରେ ମେନାଇୟାଁ।”
ଏନ୍ତେ ଏନ୍ ଦୁଁତ୍ କାଜିକିୟାଏ, “ହନ୍ମେକଡ଼ାକେ ଗଗଏଃ ନାଙ୍ଗ୍ ତିଃଇ ତାମାଃ ଆଲମ୍ ଜିଲିଙ୍ଗ୍ୟେଁଆ, ଚାଏ ଇନିଃକେ ଜେତ୍ନାଃ ଆଲମ୍ ରିକାଇୟା। ଆମ୍ ପାର୍ମେଶ୍ୱାର୍କେ ବରଭାକ୍ତି ରିକାତାନାମ୍, ଏନା ଆଇଙ୍ଗ୍ ନାହାଁଃ ସାରିକେଦାଇଙ୍ଗ୍। ଚିଆଃଚି ଆମ୍ ଆମାଃ ହନ୍ମେକଡ଼ାକେ, ଆମାଃ ମିଆଁଦ୍ଗି ମୁତ୍କୁଲ୍ ହନ୍କେ ଏମ୍ ନାଗେନ୍ତେ କାମ୍ ହିଚ୍କିଚାଅୟାନା।”
ଇମ୍ତା ଆବ୍ରାହାମ୍ ଆୟାଃ ଦୟାସାଃରେ ତାଇକାନ୍ ତାସାଦ୍ ଚୁପାଦ୍ରେ ଦିରିଙ୍ଗ୍ ଛାନ୍ଦିକାନ୍ ମିଆଁଦ୍ ମିଣ୍ଡିହନ୍କେ ନେଲ୍କିୟା। ଆବ୍ରାହାମ୍ ଏନ୍ ମିଣ୍ଡିହନ୍କେ ଇଦିକେଦ୍ତେ ଇସାକ୍ରାଃ ବାଦ୍ଲାରେ ଇନିଃକେ ଉରୁବ୍ଦାଣେଁ ରାକାବ୍କିୟାଏ। ଆବ୍ରାହାମ୍ ଏନ୍ ଠାୟାଦ୍ରାଃ ନୁତୁମ୍ ଯିହୋବାଯିରି1 ଦହକେଦା। ଏନାମେନ୍ତେ ହଡ଼କ ତିସିଙ୍ଗ୍ ଜାକେଦ୍ କାଜିୟାଃକ, ପ୍ରାଭୁଆଃ ବୁରୁରେ ଯୋଗାଡ଼୍ ଏମଃଆ।
ପ୍ରାଭୁଆଃ ଦୁଁତ୍ ସିର୍ମାଏତେ ବାର୍ସା ଆବ୍ରାହାମ୍କେ ହାକାଅକେଦ୍ତେ କାଜିକିୟା, “ପ୍ରାଭୁ କାଜିତାନାଏ, ଆଇଙ୍ଗ୍ ଆପ୍ନାଃ ନୁତୁମ୍ତେ କିରିୟାତାନାଇଙ୍ଗ୍ ଯେ, ଆଇଙ୍ଗ୍ ଆମ୍କେ ପୁରାଃତେ ଆଶିଷ୍ମେୟାଇଙ୍ଗ୍। ଚିଆଃଚି ଆମ୍ ଆମାଃ ହନ୍ମେକଡ଼ା, ଆମାଃ ମୁତ୍କୁଲ୍ ହନ୍କେ ଏମ୍ ନାଙ୍ଗ୍ କାମ୍ ହିଚ୍କିଚାଅୟାନା। ଆମାଃ ନେ କାମି ହରାତେ ଆଇଙ୍ଗ୍ ଆପ୍ନାଃ ନୁତୁମ୍ତେ କିରିୟାତାନ୍ଲଃ କାଜିତାନାଇଙ୍ଗ୍, ଆଇଙ୍ଗ୍ ସାର୍ତିଗି ଆମ୍କେଇଙ୍ଗ୍ ଆଶିଷ୍ମେୟାଁ। ଆଇଙ୍ଗ୍ ଆମାଃ କିଲିକକେ ସିର୍ମାରେନ୍ ଇପିଲ୍ ଓଡ଼ୋଃ ଦରେୟାରେନ୍ ଗିତିଲ୍ ଲେକା ପୁରାଃଗିଇଙ୍ଗ୍ ପସାକଆ। ଆମାଃ କିଲିକ ବାଇରିକଆଃ ସବେନ୍ ନାଗାର୍ ଆକ୍ତେୟାର୍ ରିକାୟାକ। ଓଡ଼ୋଃ ଅତେରେନ୍ ସବେନ୍ ମାନୱାକ ଆମାଃ କିଲିକ ହରାତେ ଆଶିଷ୍କ ନାମେୟା। ଚିୟାଃଚି ଆମ୍ ଆଇଁୟାଃ କାଜିଲେକାତେ କାମିମ୍ ରିକାକାଦା।” ଆବ୍ରାହାମ୍ ଆୟାଃ ଦାସିକିନ୍ତାଃ ରୁହାଡ଼୍ୟାନାଏ ଓଡ଼ୋଃ ଇନ୍କୁ ସବେନ୍କ ବେର୍ଶେବାତେ ସେନଃୟାନାକ। ଆବ୍ରାହାମ୍ ଏନ୍ତାଃରେଗି ତାଇନ୍ୟାନା।
ନାହୋର୍ଆଃ କିଲିକ
ଚିମିନ୍ ମାହା ତାୟମ୍ତେ ଆବ୍ରାହାମ୍ ନେ କାନାଜି ଆୟୁମ୍କେଦା, “ମିଲ୍କା ହଁଗି ଆମାଃ ହାଗା ନାହୁର୍ ନାଗେନ୍ତେ ହନ୍ଗାଁଣାକକେ ଜାନାମ୍କେଦ୍କଆ। ମିଲ୍କାରାଃ ମୁତ୍କୁଲ୍ ହନ୍ରାଃ ନୁତୁମ୍ ଉଷ୍ ଓଡ଼ୋଃ ଆୟାଃ ହାଗାକଆଃ ନୁତୁମ୍ ବୁଷ୍, କେମୁୟେଲ୍, ଇନିଃ ଅରାମ୍ରାଃ ଆପୁତେ ତାନିଃ, କେଷଦ୍, ହସୋ, ପିଲ୍ଦସ୍, ଯିଦ୍ଲଫ୍ ଓଡ଼ୋଃ ବଥୁୟେଲ୍।” ଏନ୍ ବଥୁୟେଲ୍ରାଃ ହନ୍ତେକୁଡ଼ି ରିବ୍କା। ଆବ୍ରାହାମ୍ଆଃ ହାଗାତେୟାଃ ନୁତୁମ୍ ନାହୁର୍। ନାହୋର୍ଆଃ କୁଡ଼ି ମିଲ୍କା ହରାତେ ନେ ଇରାଲିୟା ହନ୍କ ଜାନାମ୍ୟାନା। ନାହୋର୍ଆଃ ରୁମା ନୁତୁମ୍ ଆଡଃମିଆଦ୍ ହିରୁମ୍କୁଡ଼ି ତାଇକେନାଏ, ଇନିୟାଃ ହରାତେ ଟେବହ, ଗହମ୍, ତହଶ୍ ଓଡ଼ୋଃ ମାଖା ସବେନ୍ ହନ୍କ ଜାନାମ୍ୟାନା।
Source notes (1)
- Footnote ପ୍ରାଭୁ ଯୋଗାଡ଼୍ନିଃ ତାନିଃ
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.