Munda Bible
ଏନେଟେଦ୍ 15
ଆବ୍ରାମ୍ଲଃ ପାର୍ମେଶ୍ୱାର୍ଆଃ ରାଜିନାମା
ନେଆଁ ତାୟମ୍ତେ, ପ୍ରାଭୁଆଃ କାନାଜି, ଦାର୍ଶାନ୍ ହରାତେ ଆବ୍ରାମ୍ତାଃରେ ସେଟେର୍ୟାନା, “ଏ ଆବ୍ରାମ୍, ଆଲମ୍ ବରୟା, ଆଇଙ୍ଗ୍ ଆମାଃ ବାଞ୍ଚାଅନିଃ, ଆମ୍କେ ସାଙ୍କାଟ୍ଏତେ ବାଞ୍ଚାଅମେୟାଇଙ୍ଗ୍ ଓଡ଼ୋଃ ମାରାଙ୍ଗ୍ ନାଲା ଏମାମେୟାଇଙ୍ଗ୍।”
ମେନ୍ଦ ଆବ୍ରାମ୍ କାଜିରୁହାଡ଼୍କିୟା, “ସବେନାଃଏତେ ପେଡ଼େୟାନ୍ ହେ ପ୍ରାଭୁ, ଆମ୍ ଆଇଙ୍ଗ୍କେ ଚିନାଃମ୍ ଏମାଇଁୟା ? ଚିଆଃଚି ଆଇଁୟାଃଦ ହନ୍ଗାଁଣା ବାଙ୍ଗ୍କଆ। ଦମାସ୍କସ୍ରେନ୍ ଏଲିୟାଜାର୍ ଆଇଁୟାଃ ସବେନାଃରେୟାଃ ହାନାଟିଙ୍ଗ୍ ନାମେନିଃ ତାନିଃ।” ଆବ୍ରାମ୍ ଆଡଃଗି କାଜିକିୟାଏ, “ଆମ୍ଦ ଆଇଙ୍ଗ୍କେ ହନ୍ କାମ୍ ଏମାକାଇଁୟା, ଏନାତେ ଆଇଁୟାଃ ଅଡ଼ାଃରେ ଜାନାମାକାନ୍ ମିଆଁଦ୍ ଦାସି ଆଇଁୟାଃ ଆକ୍ତେୟାର୍ନିଃ ହବାଅଃଆଏ।”
ଆବ୍ରାମ୍କେ ପ୍ରାଭୁଆଃ କାନାଜି, “ଏଲିୟାଜାର୍ ଆମାଃ ଆକ୍ତେୟାର୍ ନାମେନିଃ କାଏ ହବାଅଃଆ, ମେନ୍ଦ ଆମାଃ ଆପ୍ନାଃ ହନ୍ ଏସ୍କାର୍ ଆମାଃ ଆକ୍ତେୟାର୍ ନାମେନିଃ ହବାଅଃଆଏ।” ଏନ୍ତେ ପ୍ରାଭୁ ଆବ୍ରାମ୍କେ ବାହାରି ଆଉକେଦ୍ତେ କାଜିକିୟା, “ଆମ୍ ସିର୍ମା ଆରିଦ୍କେଦ୍ତେ ଇପିଲ୍କକେ ନେଲ୍କମେ ଓଡ଼ୋଃ ଲେକା ଦାଡ଼ିରେଦମ୍ ଇପିଲ୍କକେ ଲେକାକମେ। ଆମାଃ କିଲିକ ନେ'ଲେକାଗି ପୁରାଃଗି ହବାଅଃଆକ।”
ଇମ୍ତା ଆବ୍ରାମ୍ ପ୍ରାଭୁତାଃରେ ବିଶ୍ୱାସ୍କେଦା ଓଡ଼ୋଃ ପ୍ରାଭୁ ଇନିୟାଃ ବିଶ୍ୱାସ୍ ନେଲ୍କେଦ୍ତେ ଇନିଃକେ ଧାର୍ମାନ୍ ମେନ୍ତେ କାଜିକିୟା।
ଏନ୍ତେ ପ୍ରାଭୁ ଇନିଃକେ ଆଡଃଗି କାଜିକିୟା, “ଆଇଙ୍ଗ୍ଦ ପ୍ରାଭୁ ତାନିଙ୍ଗ୍, ଅକଏଚି ଆମ୍କେ ନେ ଦିଶୁମ୍ ଆକ୍ତେୟାର୍ ରିକାନାଙ୍ଗ୍ କଲ୍ଦିୟ ହଡ଼କଆଃ ଉର୍ ଦିଶୁମ୍ଏତେଇଙ୍ଗ୍ ସୁତୁଃ ଆଉକେଦ୍ମେୟାଁ।”
ମେନ୍ଦ ଆବ୍ରାମ୍ କାଜିକିୟାଏ, “ସବେନାଃଏତେ ପେଡ଼େୟାନ୍ ହେ ପ୍ରାଭୁ, ଆଇଙ୍ଗ୍ ନେ ଦିଶୁମ୍କେ ଆକ୍ତେୟାର୍ ରିକାଏୟାଇଙ୍ଗ୍, ଏନା ଚିଲ୍କାତେ ଆଇଙ୍ଗ୍ ସାରି ଦାଡ଼ିୟାଇଙ୍ଗ୍ ?”
ପାର୍ମେଶ୍ୱାର୍ ଇନିଃକେ କାଜିକିୟା, “ଆମ୍ ଆପି ବାରାଷ୍ରେନ୍ ମିଆଁଦ୍ ଅସାର୍,1 ଆପି ବାରାଷ୍ରେନ୍ ମିଆଁଦ୍ ପେଠି ମେରମ୍ହନ୍, ଆପି ବାରାଷ୍ରେନ୍ ମିଆଁଦ୍ ମିଣ୍ଡି, ମିଆଁଦ୍ ପୁତାମ୍ ଓଡ଼ୋଃ ମିଆଁଦ୍ ଦୁଦୁମୁଲ୍ ହନ୍ ଆଇଁୟାଃତାଃତେ ଆଉକମେ।” ଏନ୍ତେ ଆବ୍ରାମ୍ ଏନ୍ ସବେନ୍କକେ ପାର୍ମେଶ୍ୱାର୍ତାଃ ଆଉକେଦ୍କଆଏ ଓଡ଼ୋଃ ଜାଁତୁକକେ ମାଆଃକେଦ୍ତେ ବାର୍ ହିସାକେଦ୍କଲଃ ନେତେ ହାନ୍ତେ ବାର୍ ପାନ୍ତିରେ ଦହକେଦ୍କଆ, ମେନ୍ଦ ଚେଣେଁକକେ କାଏ ବାର୍ ହିସାକେଦ୍କଆ। ଏନ୍ ମାଆଃକେଦ୍ତେ ବାର୍ ହିସାକାନ୍ ଜାଁତୁକଆଃ ହଡ଼୍ମ ଚେତାନ୍ରେ ମାସ୍ ଜମ୍ ଅଡ଼େକ ଆଡ଼୍ଗୁୟାନା ମେନ୍ଦ ଆବ୍ରାମ୍ ଇନ୍କୁକେ ହାର୍କେଦ୍କଆ।
ସିଙ୍ଗି ହାସୁର୍ତାନ୍ ଇମ୍ତା ଆବ୍ରାମ୍ ପୁରାଃଗି ଦୁଡ଼ୁମ୍ୟାନା ଓଡ଼ୋଃ ଇନିଃ ନୁବାଃରେ ପୁରାଃଗି ବରକେଦା। ଇମ୍ତା ପ୍ରାଭୁ ଆବ୍ରାମ୍କେ କାଜିକିୟା, “ଆମାଃ ହନ୍ଗାଁଣାକ ଦାସିୟଃଆ ଓଡ଼ୋଃ ଏଟାଃ ଦିଶୁମ୍ରେକ ତାଇନା ଏନ୍ତେ ଉପୁନ୍ ଶାଅ ସିର୍ମା ଜାକେଦ୍ ଦାସି ଲେକା ସୁନୁସାର୍ କାମିରେ ସାସାତିକ ନାମେୟା, ନେଆଁ ସାର୍ତିଗି ସାରିମେ। ମେନ୍ଦ ଇନ୍କୁ ଅକ ଦିଶୁମ୍ରେନ୍ ହଡ଼କଆଃ ଦାସି ଲେକା ସୁନୁସାର୍ କାମିକ କାମିୟା, ଆଇଙ୍ଗ୍ ଏନ୍ ଦିଶୁମ୍ରେନ୍ ହଡ଼କଆଃ ବିଚାର୍ ରିକାୟାଇଙ୍ଗ୍। ତାୟମ୍ତେ ଇନ୍କୁ ପୁରାଃଗି ଖୁର୍ଜିକ ସାବ୍କେଦ୍ଲଃ ଏନ୍ ଦିଶୁମ୍ଏତେ ଅଡଙ୍ଗ୍ଅଃଆକ। ମେନ୍ଦ ଆମ୍ ପୁରାଃ ହାଡ଼ାମ୍ ଦିପିଲି ଜାକେଦ୍ ତାଇନଃଆମ୍ ଓଡ଼ୋଃ ଜୀଉତାମାଃ ଟୁଣ୍ଡୁଃଆ ଏନ୍ତେ ଆମ୍ ଜୀଉସୁକୁତେ ଆମାଃ ପୁର୍ଖା ହାଡ଼ାମ୍ ହଡ଼କତାଃତେ ସେନଃଆମ୍। ଆମାଃ କିଲିରେନ୍ ଉପୁନ୍ ପିଢିରେ ଇନ୍କୁ ନେ ଦିଶୁମ୍ତେ ରୁହାଡ଼ାଃକ, ଚିୟାଃଚି ନେତାଃରେ ତାଇନ୍ତାନ୍ ଇମୋରିୟ ହଡ଼କଆଃ ଗୁହ୍ନାଁ ନାହାଁଃ ଜାକେଦ୍ ଆଉରି ପୁରାଅଃଆ।”
ସିଙ୍ଗି ହାସୁର୍ୟାନ୍ ତାୟମ୍ତେ ପୁରାଃଗି ନୁବାଃୟାନା, ଇମ୍ତା ସୁକୁଲ୍ ଅଡଙ୍ଗ୍ଅଃତାନ୍ ମିଆଁଦ୍ ଚିମ୍ନି ଓଡ଼ୋଃ ଜୁଲଃତାନ୍ ସେଙ୍ଗେଲ୍ ହୁକା ନେଲ୍ୟାନା ଓଡ଼ୋଃ ମାଆଃକେଦ୍ତେ ଏନ୍ ବାର୍ ହିସାକାନ୍ ଜାଁତୁକଆଃ ଥାଲାରେ ପାରମ୍ୟାନା। ଏନ୍ ହୁଲାଙ୍ଗ୍ ପ୍ରାଭୁ, ଆବ୍ରାମ୍ଲଃ ରାଜିନାମା ଠାହାରାଅକେଦ୍ତେ କାଜିକେଦା, “ଆଇଙ୍ଗ୍ ମିସାର୍ରେୟାଃ ଗାଡ଼ାଏତେ ଇଉଫ୍ରେଟିସ୍ ମାରାଙ୍ଗ୍ ଗାଡ଼ା ଜାକେଦ୍, ନେ ଅତେ ଆମାଃ କିଲିକକେଇଙ୍ଗ୍ ଏମାକତାନା। ଏନ୍ ଦିଶୁମ୍ରେ ନାହାଁଃ କେନିୟ, କନ୍ଜିୟ, କଦ୍ମୋନିୟ, ହିତ୍ତିୟ, ପିରିଷିୟ, ରଫାୟିୟ, ଇମୋରିୟ, କିନାନିୟ, ଗିର୍ଗାଶୀୟ ଓଡ଼ୋଃ ଯିବୁଷିୟ ହଡ଼କ ତାଇନ୍ ତାନାକ।”
Source notes (1)
- Footnote ବାଛିହନ୍
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.