Munda Bible
ଏନେଟେଦ୍ 14
ଆବ୍ରାମ୍ ଲୁଟ୍କେ ବାଞ୍ଚାଅକିୟା
ଏନ୍ ଦିପିଲିରେ ସିନିୟର୍ରେନ୍ ଅମ୍ରାଫେଲ୍ ରାଜା, ଏଲ୍ଲାସର୍ରେନ୍ ଅରିୟୋକ୍ ରାଜା, ଏଲମ୍ରେନ୍ କେଦର୍ଲାୟୋମର୍ ରାଜା ଓଡ଼ୋଃ ଗୟିମ୍ରେନ୍ ତିଦିଲ୍ ରାଜା, ନେ ସବେନ୍ ରାଜାକ, ସଦୋମ୍ରେନ୍ ରାଜା ବେରା, ଗମ୍ରାରେନ୍ ରାଜା ବିର୍ସା, ଆଦ୍ମାରେନ୍ ରାଜା ସିନାବ୍, ସବୋୟୀମ୍ରେନ୍ ରାଜା ଶିମେବର୍ ଓଡ଼ୋଃ ବେଲା ଅର୍ଥାତ୍ ସୋୟର୍ରେନ୍ ରାଜାକଲଃ ଲାଡ଼ାଇୟାନାକ। ନେ ସବେନ୍ ରାଜାକ ସିଦିମ୍ ପିଡ଼ି ଅର୍ଥାତ୍ ବୁଲୁଙ୍ଗ୍ ଦୋରେୟାଗେନା ହେପାଦ୍ତାଃରେ ହୁଣ୍ଡିୟାନାକ। ଇନ୍କୁ ଗେଲ୍ବାର୍ ବାରାଷ୍ ଜାକେଦ୍ କେଦର୍ଲାୟୋମ୍ରେନ୍ ରାଜାରାଃ ଆକ୍ତେୟାର୍ରେ ତାଇକେଦ୍ତେ ସୁନୁସାର୍ କାମି ରିକାକେଦ୍ ଗେଲ୍ ଆପି ବାରାଷ୍ ହବାଅଃ ତାଇକେନ୍ ଇମ୍ତା, ଆୟାଃ ବିରୁଧ୍ରେ ଲାଡ଼ାଇୟାନାକ। ନେ'ଲେକା ଗେଲ୍ ଉପୁନିୟା ବାରାଷ୍ରେ କେଦର୍ଲାୟୋମର୍ ରାଜା ଓଡ଼ୋଃ ଆୟାଃଲଃ ତାଇକେନ୍ ରାଜାକ ହିଜୁଃୟାନା ଓଡ଼ୋଃ ଅସ୍ତରୋତ୍ କର୍ଣ୍ଣୟିମ୍ରେ ରଫାୟିମ୍ରେନ୍ ହଡ଼କକେ, ହାମ୍ରେ ସୁଷିୟ ହଡ଼କକେ ଓଡ଼ୋଃ ଶାବିକିରୀୟାଥୟିମ୍ରେ ଏମିୟ ହଡ଼କକେ ଲାଡ଼ାଇକେଦ୍ତେ ହାରାଅ କେଦ୍କଆକ। ଓଡ଼ୋଃ ବିର୍ ହେପାଦ୍ରେୟାଃ ଏଲ୍ପାରଣ୍ ଜାକେଦ୍ ସେୟିର୍ ବୁରୁ ପାର୍ଗାନ୍ରେନ୍ ହୋରିୟ ହଡ଼କକେ ହାରାଅ କେଦ୍କଆକ। ଏନ୍ତେ ଇନ୍କୁ ଏନ୍ତାଃଏତେ ରୁହାଡ଼୍ୟାନାକ ଓଡ଼ୋଃ କାଦେଶ୍, ଅକଆଃଚି ଐନ୍ମିସ୍ପାତ୍ ମେନ୍ତେ କାଜିୟଃ ତାନା, ଏନ୍ତାଃ ସେନ୍କେଦ୍ତେ ଇନ୍କୁ ଅମାଲେକିୟ ହଡ଼କଆଃ ଗଟା ଦିଶୁମ୍କେ ଜିତାଅୟାନାକ ଓଡ଼ୋଃ ହତ୍ସୋସନ୍ ତାମର୍ରେ ତାଇନ୍ତାନ୍ ଇମୋରିୟ ହଡ଼କକେ ହାରାଅ କେଦ୍କଆକ।
ଏନ୍ତେ ସଦୋମ୍ରେନ୍ ରାଜା, ଗମ୍ରାରେନ୍ ରାଜା, ଆଦ୍ମାରେନ୍ ରାଜା, ସବୋୟୀମ୍ରେନ୍ ରାଜା, ବେଲା ଅର୍ଥାତ୍ ସୋୟର୍ରେନ୍ ରାଜାକ ଆକଆଃ ସିପାଇକଆଃ ଝୁଣ୍ଡ୍ ଇଦିକେଦ୍ତେ ମିଦ୍ତାଃରେ ହୁଣ୍ଡିୟାନାକ। ଏନ୍ତେ ଇନ୍କୁ ସିଦିମ୍ ପିଡ଼ିତେ ସେନଃୟାନାକ। ଏନ୍ ମଣେୟାଁ ରାଜାକ ମେସାକେଦ୍ତେ ଏଲମ୍ରେନ୍ ରାଜା କେଦର୍ଲାୟୋମର୍, ଗୟିମ୍ରେନ୍ ରାଜା ତିଦିଲ୍, ସିନିୟର୍ରେନ୍ ରାଜା ଅମ୍ରାଫେଲ୍, ଏଲ୍ଲାସର୍ରେନ୍ ରାଜା ଅରିୟୋକ୍, ନେ ଚାରିଓ ରାଜାକଲଃ ଲାଡ଼ାଇୟାନାକ। ଏନ୍ ସିଦିମ୍ ପିଡ଼ିରେ ପୁରାଃଗି ନାଡ଼୍କା ହାଁସା ଉରାକାଦ୍ ଗାଡାକ ତାଇକେନା। ସଦୋମ୍ ଓଡ଼ୋଃ ଗମ୍ରାରେନ୍ ରାଜାକ ହାରାଅକେଦ୍ତେ ଏନ୍ ହରାରେ ନିର୍ ତାଇକେନାକ ଇମ୍ତା, ଚିମିନ୍ ହଡ଼କ ଏନ୍ ଗାଡାରେ ଉୟୁଃୟାନାକ ଓଡ଼ୋଃ ଅକନ୍କ ବାଞ୍ଚାଅୟାନା, ଇନ୍କୁ ବୁରୁତେକ ନିର୍ୟାନା। ଏନ୍ତେ ଜିତାଅକାନ୍ ଉପୁନିୟା ରାଜାକ ସଦୋମ୍ ଓଡ଼ୋଃ ଗମ୍ରାରେୟାଃ ସବେନ୍ ଖୁର୍ଜିକ ଓଡ଼ୋଃ ଜଜମାଃକ ରେଃକ୍କେଦ୍ତେ ଇଦିକେଦାକ। ଓଡ଼ୋଃ ସଦୋମ୍ରେ ତାଇନ୍ତାନ୍ ଆବ୍ରାମ୍ଆଃ ପୁତୁରା ଲୁଟ୍କେ ଓଡ଼ୋଃ ଇନିୟାଃ ସବେନ୍ ଖୁର୍ଜିକ ରେଃକ୍ ଇଦିକେଦା।
ମେନ୍ଦ ନିର୍କେଦ୍ତେ ବାଞ୍ଚାଅକାନ୍ ମିଆଁଦ୍ ହଡ଼ ହିଜୁଃକେଦ୍ତେ ଏବ୍ରୀ କିଲିରେନ୍ ଆବ୍ରାମ୍କେ ଉଦୁବ୍କିୟା, ଇମ୍ତା ଆବ୍ରାମ୍, ଇମୋରିୟ କିଲିରେନ୍ ମମ୍ରିଆଃ ମାରାଙ୍ଗ୍ ଦାରୁ ଲାତାର୍ରେ ତାଇନଃ ତାଇକେନା। ମମ୍ରିଆଃ ହାଗାକିନ୍ ଇଷ୍କୋଲ୍ ଓଡ଼ୋଃ ଆନେର୍, ଆବ୍ରାମ୍ଲଃ ରାଜିନାମାକାଦ୍ ତାଇକେନାକିନ୍। ଚିମ୍ତା ଆବ୍ରାମ୍ ଆୟାଃ ପୁତୁରାତେ ତଲ୍ ଇଦିୟାନାଏ ମେନ୍ତେ ଆୟୁମ୍କେଦ୍ଚି, ଆୟାଃ ଅଡ଼ାଃରେ ଜାନାମ୍କାନ୍ ଓଡ଼ୋଃ ଲାଡ଼ାଇ ସାରିୟାକାନ୍ ୩୧୮ ଝାନ୍ ଦାସିକକେ ଇଦିକେଦ୍ତେ, ବାଇରିକଆଃ ଦୟା ଦୟା ଦାନ୍ ନୁତୁମ୍ ନାଗାର୍ ଜାକେଦ୍ ଅତଙ୍ଗ୍କେଦ୍କଆକ। ଆବ୍ରାମ୍ ନୁବାଃ ଇମ୍ତା ଆୟାଃ ଦାସିକକେ ବାର୍ ହିସାରେ ହାଟିଙ୍ଗ୍କେଦ୍କଆ ଓଡ଼ୋଃ ବାଇରିକଲଃ ଲାଡ଼ାଇୟାନାକ। ଇନ୍କୁକେ ହାରାଅକେଦ୍ତେ ଦମାସ୍କସ୍ରେୟାଃ ଉତ୍ତାର୍ସାଃରେ ତାଇକାନ୍ ହୋବା ଜାକେଦ୍ ହାର୍ ଇଦିକେଦ୍କଆକ। ଇନିଃ ଆୟାଃ ପୁତୁରା ଲୁଟ୍କେ, ଲୁଟ୍ରାଃ ସବେନ୍ ଖୁର୍ଜି, କୁଡ଼ିକକେ, ଓଡ଼ୋଃ ଆୟାଃ ସବେନ୍ ଦାସିକକେ ଆଉ ରୁହାଡ଼୍କେଦ୍କଆ।
ମଲ୍କିସେଦକ୍ ଆବ୍ରାମ୍କେ ଆଶିଷ୍କିୟା
ନେ'ଲେକାତେ ଆବ୍ରାମ୍, କେଦର୍ଲାୟୋମର୍କେ ଓଡ଼ୋଃ ଆୟାଃ ଗାତି ରାଜାକକେ ହାରାଅକେଦ୍ତେ ରୁହାଡ଼୍ୟାନ୍ ତାୟମ୍ତେ, ସଦୋମ୍ରେନ୍ ରାଜା ସାଭେ ନୁତୁମ୍ ପିଡ଼ିରେ ଆବ୍ରାମ୍ଲଃ ନେପେଲ୍ ନାଙ୍ଗ୍ ଅଡଙ୍ଗ୍ୟାନାଏ। ସାଲେମ୍ରେନ୍ ରାଜା ମଲ୍କିସେଦକ୍, ଇନିଃ ସାଲାଙ୍ଗିଉତାର୍ ପାର୍ମେଶ୍ୱାର୍ଆଃ ଯାଜାକ୍ ତାଇକେନାଏ। ଇନିଃ ହଲଙ୍ଗ୍ ଓଡ଼ୋଃ ଦାଖ୍ରାସି ଆଉକେଦ୍ତେ ହିଜୁଃୟାନା। ଏନ୍ତେ ଇନିଃ ଆବ୍ରାମ୍କେ ଆଶିଷ୍କେଦ୍ତେ କାଜିକିୟା, “ସିର୍ମାଦିଶୁମ୍ ଓଡ଼ୋଃ ଅତେରାଃ ବାବାଇନିଃ, ସାଲାଙ୍ଗିଉତାର୍ ପାର୍ମେଶ୍ୱାର୍ ଆବ୍ରାମ୍କେ ଆଶିଷ୍ ରିକାଇମେ ! ସାଲାଙ୍ଗିଉତାର୍ ପାର୍ମେଶ୍ୱାର୍ଆଃ ନୁତୁମ୍ ଧାଇନ୍ ହବାଅଃକା, ଇନିଃ ଆମାଃ ସବେନ୍ ବାଇରିକକେ ଆମାଃ ତିଃଇରେ ଜିମାକେଦ୍କଆ।” ଇମ୍ତା ଆବ୍ରାମ୍ ନାମାକାଦ୍ ହିସାଏତେ ଗେଲ୍ହିସା ଇନିଃକେ ଏମ୍କିୟା।
ଏନ୍ତେ ସଦୋମ୍ରେନ୍ ରାଜା ଆବ୍ରାମ୍କେ କାଜିକିୟା, “ଆମ୍ ଆମାଃ ସବେନ୍ ଖୁର୍ଜିକ ଇଦିମେ, ମେନ୍ଦ ଆଇଁୟାଃ ହଡ଼କକେ ଆଇଙ୍ଗ୍କେ ଏମାଇଙ୍ଗ୍ମେ।”
ଏନ୍ତେ ଆବ୍ରାମ୍ ସଦୋମ୍ରେନ୍ ରାଜାକେ କାଜିରୁହାଡ଼୍କିୟା, “ଆଇଙ୍ଗ୍ ସିର୍ମାଦିଶୁମ୍ ଓଡ଼ୋଃ ଅତେରେୟାଃ ଆକ୍ତେୟାର୍ନିଃ ପ୍ରାଭୁ, ସାଲାଙ୍ଗିଉତାର୍ ପାର୍ମେଶ୍ୱାର୍ଆଃ ଆୟାର୍ରେ କିରିୟାକେଦ୍ତେ କାଜିତାନାଇଙ୍ଗ୍, ‘ଆଇଙ୍ଗ୍ ଆମାଃତାଃଏତେ ଜେତ୍ନାଃ କାଇଙ୍ଗ୍ ଇଦିୟା, ମିଆଁଦ୍ ସୁତାମ୍ ଚାଏ ଖାର୍ପାରେୟାଃ ତନଲ୍ ବାହେର୍ ହଗି କାଇଙ୍ଗ୍ ଇଦିୟା, କା'ରେଦ ତାୟମ୍ତେ ଆମ୍ କାଜିୟାମ୍, ଆଇଙ୍ଗ୍ ଆବ୍ରାମ୍କେଇଙ୍ଗ୍ କିସାଁଣ୍କିୟା।’ ଆଇଁୟାଃ ସେପେଡ଼େଦ୍କ ଜମାକାଦ୍ତେୟାଃ ଓଡ଼ୋଃ ଆଇଙ୍ଗ୍ଲଃ ସେନାକାନ୍କଆଃ ହାନାଟିଙ୍ଗ୍ ବାଗିକେଦ୍ତେ ଆଇଙ୍ଗ୍ ଜେତ୍ନାଃ କାଇଙ୍ଗ୍ ଇଦିୟା। ଆନେର୍, ଇଷ୍କୋଲ୍ ଓଡ଼ୋଃ ମମ୍ରି, ଇନ୍କୁ ଆକଆଃ ହାନାଟିଙ୍ଗ୍କ ଇଦିକା।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.