Munda Bible
ହରାସେନ୍ପୁଥି 15:2
Verse 2 is marked below, with the whole chapter around it. Read from the start
ମୁଶାରାଃ ଦୁରାଙ୍ଗ୍
ଏନ୍ତେ ମୁଶା ଓଡ଼ୋଃ ଇସ୍ରାଏଲ୍ ହନ୍କ ପ୍ରାଭୁଆଃ ନାଗେନ୍ତେ ନେ ଦୁରାଙ୍ଗ୍କେ ଦୁରାଙ୍ଗ୍କେଦାକ,
“ଆଇଙ୍ଗ୍ ପ୍ରାଭୁଆଃ ନାଗେନ୍ତେ ଦୁରାଙ୍ଗ୍ୟେଁଇଙ୍ଗ୍, ଚିଆଃଚି ଇନିଃ ମାରାଙ୍ଗ୍ କାମି ରିକାକାଦା,
ଇନିଃ ସାଦମ୍ ଓଡ଼ୋଃ ସାଦମ୍ ରାକାବ୍କକେ ଦରେୟାରେ ହୁରାଙ୍ଗ୍ କାଦ୍କଆ।
ପ୍ରାଭୁ ଆଇଁୟାଃ ପେଡ଼େଃ ତାନିଃ,
ଇନିଃ ଆଇଁୟାଃ ଜୀଉବାଞ୍ଚାଅନିଃ ତାନିଃ।
ଇନିଃ ଆଇଁୟାଃ ପାର୍ମେଶ୍ୱାର୍ ତାନିଃ ଓଡ଼ୋଃ ଆଇଙ୍ଗ୍ ଇନିୟାଃ ସାହାରାଅ ରିକାୟାଇଙ୍ଗ୍,
ଆପୁକଆଃ ପାର୍ମେଶ୍ୱାର୍ ତାନିଃ ଓଡ଼ୋଃ ଆଇଙ୍ଗ୍ ଇନିୟାଃ ମାରାଙ୍ଗ୍ ରିକାୟା।
ପ୍ରାଭୁ ଲାଡ଼ାଇନିଃ ତାନିଃ,
ଇନିୟାଃ ନୁତୁମ୍ ପ୍ରାଭୁ ତାନା।
“ଇନିଃ ଫାରୋଆଃ ଲାଡ଼ାଇ ଗାଡ଼ି ଓଡ଼ୋଃ ପାଲ୍ଟାନ୍କକେ ଦରେୟାରେ ହୁରାଙ୍ଗ୍ କାଦ୍କଆ,
ଇନିୟାଃ ସାଲାକାନ୍ ବୁଗିନ୍ ପାଲ୍ଟାନ୍କ ଆରାଃ ଦରେୟାରେ ଡୁବିଃଗ୍ ୟାନାକ।
ଇକିର୍ ସାମୁଦାର୍ ଇନ୍କୁକେ ତପା ତାକୁଆଏ,
ଇନ୍କୁ ଦିରିଲେକା ଇକିର୍ ଦାଆଃରେ ଡୁବିଗ୍ ୟାନାକ।
“ହେ ପ୍ରାଭୁ ଆମାଃ ଜମ୍ତିଃ ପେଡ଼େଃରେ ମାରାଙ୍ଗ୍,
ହେ ପ୍ରାଭୁ ଆମାଃ ଜମ୍ତିଃ ବାଇରିକକେ କେଟେଦ୍ ସେରେଦ୍ କଆ।
ଆମ୍ ଆମାଃ ମାରାଙ୍ଗ୍ ପେଡ଼େଃତେ ବିରୁଧ୍ ତାନ୍କକେ ଜିଅନ୍ ତାକଆମ୍,
ଆମାଃ ରିସ୍ମି କୁଲେମେ, ଏନା ଇନ୍କୁକେ ବୁସୁଃ ଲେକା ଅଣ୍ଡର୍ କଆଏ।
ଆମାଃ ମୁହୁଁରେୟାଃ ସାହେଁଦ୍ ହରାତେ ଦାଆଃ କେସେଦ୍ ହୁଣ୍ଡିୟାନା,
ଲିଙ୍ଗିୟଃତାନ୍ ଦାଆଃ କାଥି ଲେକା ତିଙ୍ଗୁୟାନା,
ସାମୁଦାର୍ ଥାଲାରେ ଇକିର୍ ଦାଆଃ କେଟେଦ୍ୟାନା।
ବାଇରି କାଜିକେଦା, ‘ଆଇଙ୍ଗ୍ ଅତଙ୍ଗ୍ କେଦ୍ତେ ଆଇଙ୍ଗ୍ ସାବ୍କଆ,
ରେଃକ୍ ଇଦିତେୟାଃ ସବେନାଃ ହାଟିଙ୍ଗ୍ ରିକାୟା, ଇନ୍କୁଆଃ ଚେତାନ୍ରେ ଆଇଁୟାଃ ସାନାଙ୍ଗ୍ ପୁରାଅଃଆ,
ଆଇଁୟାଃ ତାରାଉଡ଼ି ଅଡଙ୍ଗ୍ୟେଁଆ ଓଡ଼ୋଃ ଇନ୍କୁକେ ଆଇଙ୍ଗ୍ ଜିଅନ୍କଆ।’
ମେନ୍ଦ ଆମ୍ ଆମାଃ ସାହେଁଦ୍ତେ ଅମ୍କେଦ୍କଆମ୍ ଓଡ଼ୋଃ ଇନ୍କୁକେ ଦରେୟା ହାରୁବ୍କେଦ୍କଆ,
ଇନ୍କୁ ସିସା ଲେକା ପୁରାଃ ଇକିର୍ ଦାଆଃରେ ଡୁବିଗ୍ ୟାନାକ।
“ହେ ପ୍ରାଭୁ ମାହାପୁରୁକଆଃ ଥାଲାରେ ଆମ୍ ଲେକା ଅକଏ ମେନାଇୟା ?
ଆମାଃ ଲେକା ପାବିତାର୍ ମାଇନଃରେ, ମାହିମାରେ ବରୱାନ୍ଗି ଓଡ଼ୋଃ ଆକ୍ଦାନ୍ଦାଅ କାମିନିଃ ଅକଏ ମେନାଇୟା ?
ଆମ୍ ଆମାଃ ଜମ୍ତିଃ ଜିଲିଙ୍ଗ୍ କେଦା,
ଓଡ଼ୋଃ ଅତେଦିଶୁମ୍ ଇନ୍କୁକେ ଉଦ୍ତାକଆ।
ଆମ୍ ଆମାଃ ଦାୟାତେ ବାଞ୍ଚାଅ ହଡ଼କକେ ଆୟାର୍ ଇଦିକ ତାନାମେ,
ଆମାଃ ପେଡ଼େଃତେ ଇନ୍କୁକେ ଆୟାର୍କେଦ୍ତେ ପାବିତାର୍ ଠାୟାଦ୍ତେ ଇଦିକ ତାନାମେ।
ହଡ଼କ ନେଆଁ ଆୟୁମ୍କେଦ୍ତେ ବରକେଦାକ,
ପାଲେଷ୍ଟାଇନ୍ରେନ୍ ହଡ଼କ ବରତେ ଏକ୍ଲାଅୟାନାକ।
ଇଦୋମ୍ରେନ୍ ଆଗୁଆଇକ ବରକେଦା,
ମୋୟାବ୍ରେନ୍ ପେଡ଼େୟାନ୍ ହଡ଼କ ହଗି ଏକ୍ଲାଅୟାନା,
କିନାନ୍ରେନ୍ ତାଇନଃ ତାନ୍କ ସେର୍ୟାନାକ।
ଇନ୍କୁଆଃ ଚେତାନ୍ରେ ବର ଓଡ଼ୋଃ ଏକ୍ଲାଅଃ ତେୟାଃ ପେରେଃୟାନା।
ଇନ୍କୁ ଆମାଃ ସୁପୁରେୟାଃ ପେଡ଼େଃତେ,
ଦିରି ଲେକା ହାପା ତାଇନାଃ
ହେ ପ୍ରାଭୁ ଆମାଃ ହଡ଼କକେ ଚିମ୍ତାଙ୍ଗ୍ କାକ ପାରମ୍ ଜାକେଦ୍
ହେ ପ୍ରାଭୁ, ଆମ୍ ଆମାଃ ତାଇନଃ ନାଙ୍ଗ୍ ଅକ ଠାୟାଦ୍ ବାଇୟାକାଦାମ୍,
ଆମାଃ ତିଃଇ ଅକ ପାବିତାର୍ ଠାୟାଦ୍ ବାଇୟାକାଦାଏ,
ଅକ ବୁରୁ ଆମାଃ ଆକ୍ତେୟାର୍ ତାନାଃ, ଏନ୍ ବୁରୁ ଚେତାନ୍ତେ ଇନ୍କୁକେ ଆଉକେଦ୍ତେ ଦହକମେ।
ପ୍ରାଭୁ ପାର୍ମରଶ୍ୱାର୍ ଜାନାଅ ଜାନାଅ ଜାକେଦ୍ ରାଇଜ୍ ରିକାୟା।”
ମାରିୟାମ୍ଆଃ ଦୁରାଙ୍ଗ୍
ଫାରୋଆଃ ସାଦମ୍, ଲାଡ଼ାଇ ଗାଡ଼ି ଓଡ଼ୋଃ ଚାଲାଅ ତାନ୍ ହଡ଼କ ଦରେୟାରେ ବଲୟାନା, ପ୍ରାଭୁ ଆଡଃମିସା ଦାଆଃ ଇନ୍କୁଆ ଚେତାନ୍ରେ ଆଉକେଦା, ମେନ୍ଦ ଇସ୍ରାଏଲ୍ ହନ୍କ ରହଡ଼୍ ଅତେରେ ସାମୁଦାର୍ ଥାଲାରେ ସେସେନ୍କେଦା।
ଏନ୍ତେ ହାରୁନ୍ଆଃ ମିଶି ନାବୀ ମାରିୟାମ୍ ତିଃଇରେ ଡାପ୍ଲି ବାଜା ଇଦିକେଦା ଓଡ଼ୋଃ ସବେନ୍ କୁଡ଼ିକ ସୁସୁନ୍ତାନ୍ଲଃ ଆୟାଃ ତାୟମ୍ ଅତଙ୍ଗ୍କିୟା। ମାରିୟାମ୍ ଇନ୍କୁଲଃ ନେଲେକା ଦୁରାଙ୍ଗ୍ କେଦା :
“ପ୍ରାଭୁ ନାଗେନ୍ତେ ଦୁରାଙ୍ଗ୍ୟେଁପେ ଚିଆଃଚି ଇନିଃ ମାନାରାଙ୍ଗ୍ କାମି ରିକାକାଦାଏ,
ଇନିଃ ସାଦମ୍ ଓଡ଼ୋଃ ଚାଲାଅତାନ୍ ହଡ଼କକେ ଦରେୟାରେ ହୁରାଙ୍ଗ୍ କାଦ୍କଆଏ।”
ମେହେର୍ ଦାଆଃ
ଏନ୍ତେ ମୁଶା ଇସ୍ରାଏଲ୍କକେ ଆରାଃ ଦରେୟାଏତେ ଇଦିକେଦ୍କଆ ଓଡ଼ୋଃ ସୋର୍ରେୟାଃ ବିର୍ ସାଃ ଇଦିକେଦ୍କଆଏ, ଇନ୍କୁ ଏନ୍ ବିର୍ରେ ଆପି ଦିନ୍ ଦାଆଃ କାକ ନାମ୍ କେଦା। ଇନ୍କୁ ମାରାତେ ସେଟେର୍ୟାନ୍ଚି ମାରା ରେୟାଃ ମେହେର୍ ଦାଆଃ କାକ ନୁ ଦାଡ଼ିକେଦା। ଏନାମେନ୍ତେ ଏନାରାଃ ନୁତୁମ୍ ମାରା1 ହବାୟାନା ଇମ୍ତାଙ୍ଗ୍ ମୁଶାକେ ଇନ୍କୁ କୁର୍ବୁରାଅଃତାନ୍ଲଃ କାଜିକିୟା, “ଆଲେ ଚିନାଃଲେ ନୁଁଇୟାଃ ?” ମୁଶା ପ୍ରାଭୁକେ ବିନ୍ତି କିୟାଏ ଚି, ପ୍ରାଭୁ ଇନ୍କୁକେ ମିଆଦ୍ ସାହାନ୍ ଉଦୁବାଦ୍କଆଏ, ଇନିଃ ଏନାକେ ଦାଆଃରେ ଉୟୁଃଲଃ ଦାଆଃ ହେଡ଼େମ୍ୟାନା।
ଏନ୍ ଠାୟାଦ୍ରେ ପ୍ରାଭୁ ଇନ୍କୁଆ ନାଗେନ୍ତେ ନିୟାମ୍ ଓଡ଼ୋଃ ଆଚୁ ତଲ୍କେଦା, ଓଡ଼ୋଃ ଇନ୍କୁକେ ବିଡ଼ାଅ କେଦ୍ତେ କାଜିକେଦା, “ଆପେ ପ୍ରାଭୁ ପାର୍ମେଶ୍ୱାର୍ଆଃ ବାଚାନ୍କେ ମନ୍ସୁରୁଦ୍ଲଃ ଆୟୁମ୍ରେଦ ଓଡ଼ୋଃ ଆୟାଃ ଆୟାର୍ରେ ଅକ୍ନାଃ ବୁଗିନାଃତାନାଃ ଏନାକେ ରିକାଏରେଦ ଓଡ଼ୋଃ ଆୟାଃ ଆନ୍ଚୁକେ ମାନାତିଙ୍ଗ୍ରେଦ ଓଡ଼ୋଃ ଆୟାଃ ସବେନ୍ ନିୟାମ୍କ ମାନାତିଙ୍ଗ୍ରେଦ, ଚିମିନ୍ ଦୁକୁ ଆଇଙ୍ଗ୍ ମିସାର୍ରେନ୍କକେ କୁଲା କାଦାଇଙ୍ଗ୍ ଏନା ହେତେ ମିଆଦ୍ହଁ ଆପେତାଃ କାଇଙ୍ଗ୍ କୁଲେୟା, ଚିଆଃଚି ଆଇଙ୍ଗ୍ ଆପେୟାଃ ବୁଗି ଏମଃ ପ୍ରାଭୁ ତାନିଙ୍ଗ୍।”
ଏନ୍ତେ ଇନ୍କୁ ଏଲିମ୍ତେକ ସେନ୍ୟାନା। ଏନ୍ତାଃରେ ଗେଲ୍ ବାରିଆ ସେତେଙ୍ଗ୍ ଓଡ଼ୋଃ ଆପି ହିସି ଗେଲ୍ କିତା ଦାରୁ ତାଇକେନା। ଏନାମେନ୍ତେ ଇନ୍କୁ ଏନ୍ ଦାଆଃ ତାଇନଃ ହେପାଦ୍ରେ ତାଇନ୍ୟାନାକ।
Source notes (1)
- Footnote ମେହେର୍
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.