Isai 53:5

1Anging krawi phowngah mih satang mia chow owm?

CHAKRAMANG kowh akürma mih rut mia tut-e chow tatüng?

2CHAKRAMANG kowh nar dow CHAKRAMANG pur kowi singh pawi anowp chow mih iawng,

akhawtma mih bawn kowi chowkah mih singh pawi iawng awr iuk khai.

Aia prakowi anging nadangla pat mih klangiungra aia kowh uowi dowi,

aia kowh powm paw anging naukhi lai pat nadowi chekhai.

3Aia kowi dow maru suiah hai nuata khai;

aia dow kham ngare khai, now sak kowi rau mih tuk khai.

Aia dow maru khita now cham dangta mih iawng phaw khai;

aia kowi dow maru suiah khai,

now anging ringkawah dowi chekhai.

4Aia dow a-i sak kowi rau mih maten kurta a-i khai nowm,

a-i kowh arau maten aia kham a-i khai.

Tawkche aia kowi Thurai bawpah mih pahai a-i ka tuak khai,

aia kowi Thurai bawpah hai pe ngareah mih pahai a-i nüla khai.

5A-i kowh angak rakowi aia kowi sawtah khai,

a-i kowh aprek rakowi aia kowi bawp chamang bawpah khai.

A-i nakala thaulangra kown mih ripra aia kowi peah khai,

now aia ka ngarau mih hownia dow a-i ka iungra khai.

6A-i dow ruapur iawng tiama tawi kowi cham mang bowk khai,

a-i bowkbowk mih kowmatia chowlowkkow tiama kowi mangla pang khai.

Nachepaw CHAKRAMANG mih a-i kowh angak aia kowh nar luk kowi tang pe khai.

7Aia dow nowng chang powng changra kowi uowi hai kham ngare khai.

Nachenganchepaw aia dow tawngpaw tek dowi chekhai.

Aia dow angenra prakowi ruapur chah kowi pawla khe kowh iawng uowi khai,

aia dow ruapur pawi kep miuüa tut-e ruapur lai dowi mih iawng uowi khai.

8Aia kowi dow changah nowng hai anowm nadowi mih tara chet pe now kowngta khai,

aia kowi dow ang maru-uüa kowh angak rakowi kowngta khai.

Nachenganchepaw aia kowng mih kowi miapaw pe ching dowi chekhai.

9Aia dow chang lup ngak dowi hai tek daila dowi chowdiah;

aia kowi dow maru ngakuüa hown katsang dupah khai,

now aia kowi dow kurengma mih maru kowh tadupra kowi dupah khai.

10Aia kowi changah naklak mih dow CHAKRAMANG naukrang chekhai,

now aia kowi dow CHAKRAMANG pe khamah ngare mih chekhai.

CHAKRAMANG kowh nar mih aia kowh asak nachangla angak lawt müa phuchua kown;

nami kung kowi dow aia mih aia chauüa kowi nakhi bowt kown.

Aia dow chowngdawng sakklangma nauowi bowt kown,

aia dow CHAKRAMANG kowh naukrang nape tachiah kown.

11Aia dow aia kham ngare mih uih khi hanow nasak-ih kown;

ang kowh achinawmma mih nar dow maru-uüa kowh angak nakur kown,

aia kur mih hownia maru akawmma kowi angak uowi dowi pahai nadowkah kown.

12Naiawng rakowi ringkaw uowima mih arah aia kowi ang napeah kown,

aia kowi dow kri kraingma hai akürma miuüa kowh arah ang napeah kown.

Tawngplawng kowchow panow aia dow aia kawlow hown uam pe sak khai,

now aia kowi dow maru ngakuüa hown klowkla khai.

Aia dow maru ngakuüa kowh angak kur khai,

now maru ngakuüa vüi aia lü pe alawt khai.