Isai 52

Jerusalem vüi lawngra

1Aw Zaiawn, rü bowt, rü bowt, now en kowh kür tüng bowt.

Aw chimsaima mih Jerusalem marow, en kowh klangiungma mih tawnguat khup bowt.

Hiah khampha uanpik dowi mih hai sürlawkma mih maru-uüa en lak kowi nauang kup kown nadowi bowt.

2Aw Jerusalem, rü bowt, now en buk kowi kowh dinchow thürla hanow mang chowm rah kowi chowm bowt.

Aw cham takhang mih Zaiawn chama, en ngawng kowi kowh khuowkla en mih lawngha leng maten latta bowt.

3CHAKRAMANG tek mih, “En kowi aiawng hown cham sum en khai, now aiawng hown nalawtta en iawk kown. 4Ang maru-uüa mih alai khe Aigupta pren kowi chowdiah kowuowi; akung kowi Asuriauüa mih aiawnglowma amatni kowi changah nowng khai. 5Kawmat dow Babulawnuüa mih amatni kowi khümla khai. Ang maru-uüa kowi cham pawla khai, now amatni kowh kruitown miuüa dow amatni kowi thaah nangah khai. Amatni dow amowt uowi dowi kowi ang ming kowi tek naklak khai. 6Nachenganchepaw ang ming mih ang maru-uüa kowi ang naphuang pe bowt kown. Nami ni khe dow ang chekhai tek lai mih, ang CHAKRAMANG chekhai nami laiklow tek mih pami natuk büah bowt kown,” pakhai.

7Uang pawla satang iung mih, phuang thaulangra laiklow mih,

iungra satang uang pawla mih, lawngra laiklow krawi phuang mih hai Zaiawn kowi,

“En kowh Thurai chowm mang khowk,” pahai tek pe mih maru kowh khawk dow klangiungma chekhai;

nami maru kowh khawk dow hungh luk hownia uang mih khin khe lainowmma klangiung chekhai.

8Sünta, en kowh kangchawng miuüa how khai,

amatni dow apiawma hown akrowksang hek khai.

Tawngplawng kowchow panow Zaiawn kowi CHAKRAMANG uang plan mih amatni mik hown khi büah khai.

9Aw Jerusalem kowi kowh apiaknama mih arah maten,

enni bowkbowk akrowksang tek piaw meng büa diah.

Tawngplawng kowchow panow CHAKRAMANG mih aia maru-uüa kowi peah sakklamra khai bowt,

now Jerusalem kowi aia lawngah khowk chekhai.

10CHAKRAMANG mih chenchap maten pur kowi aia kowh chimsaima hai akürma mih rut natüngah kown,

now lusa kowi kowh maru maten a-i kowh Thurai lawngra lup nakhi kown.

11Uang lawt büa diah, nami arah hownia uang lawt büa diah.

Tawng iawng mih asür alawkma mih uanh paw hang cham kak büa diah.

CHAKRAMANG kowh bia enni kawtla mih maten nami arah hownia uang lawt büa diah,

now tachim tasai büa diah.

12Tawkchedow lenlenma enni uang lawt kla dowi,

now powt paw enni uang powt kla dowi.

Tawngplawng kowchow panow CHAKRAMANG mih enni pur kowi narik mang kown chekhai;

Israel kowh Thurai mih enni kung kowi taka müa nachowng kown.

CHAKRAMANG nar kowh akrat pusara hai kraingra

13CHAKRAMANG tek mih,

“Sünta, ang kowh nar kowh lup mih nachawn kown.

Aia kowi dow alowngma kowi natangah kown,

now aia dow kraingra hai ringkawra naka kown.

14Tawkchedow nami dowi rawn khe aia kowi mih lainowmma nachangah nowng kown,

aia kowh powm mih lusa maru powm uowi dowi pat nachangah kown.

Naiawng rakowi aia kowi khi hanow amawlawma maru naphaw kown.

15Nachenganchepaw akung kowi dow aia mih chenchap ahuma kowi nachimsaiah kown.

Aia lawnguan kowi awda kowh manguüa mih nanowng lai kown nadowi.

Tawngplawng kowchow panow amatni kowi tek pe dowi mih lawnguan kowi amatni nakhi kown,

now amatni taah dowi mih lawnguan kowi natuk ta büah kown,” pakhai.