Uown Lawt 28

Uamow tawnguat

1CHAKRAMANG tek pe Mosi mih, “Israeluüa pungmadawng hownia en taimow Arawn hai achapa Nadab, Abihu, Eleazar hai Ithamar büah kowi en tut-e hawah diah. Amatni dow nachang uamow lup kown. 2En taimow Arawn natatawngla kownkow hai nakala ringkawra kownkow chimsaima mih tawnguat en nape thawpah kown. 3Uan sown sarauüa kowi chanlaira atekma mih lümla ang iu pe pe khowk. Nami sarauüa kowi Arawn vüi nathawp pe uamow tawnguat kownkow kowtek pe diah; nami tawnguat dow nachang uamow lup kownkow Arawn kowi nalang kraah kown. 4Amatni kowi dow akrüa kowi kowh khupah mih kowrmow bawngthawng athawngma mih lowk, nami luk kowi kowh khupah kown mih aruama mih kowrmow athawngma mih lowk, nami luk kowi kowh khupah kown mih ephawd kowrmow lowk, nami luk kowi kowh khupah kown mih owngphowr im lowk en nape thawpah kown. Now napawng hai kekawm en nape thawpah lowk chi kown. En taimow Arawn hai achapauüa mih nanowng changla uamow lup kownkow tawnguat chimsaima mih en nape thawpah kown. 5Amatni dow naiawngün tawnguat thawp mih khin khe kuh hai aruama süah mih ruapur pawi, arikma süah mih ruapur pawi, aringma süah mih ruapur pawi hai adipükchow mih la natawngah büah kown.

Ephawd kowrmow thawp krang

6“Ephawd kowrmow dow kuh, aruama süah mih ruapur pawi, arikma süah mih ruapur pawi, aringma süah mih ruapur pawi hai adipükchow mih la hown nathawpah kown. Naiawngün dow uan sown sarauüa kowh lup chekhai. 7Ephawd kowrmow dow pur prakowi kowh uan nga hown kung prakowi kowh uan nga nachawpah kownkow pangkawt re-e mapra lowk paipra lowk chi nachawp pe aleng kown. 8Ephawd kowrmow kowi kowh kekawm paw ephawd kowrmow iawng nathawpah kown takla; nami paw kuh, aruama süah mih ruapur pawi, arikma süah mih ruapur pawi, aringma süah mih ruapur pawi hai adipükchow mih la hown sarauüa kowi klangiungma nape thawpah kown takla. 9En napaw pe ‘oniks’ hua pre buk hanow nami luk kowi dow Israel kowh chapauüa ming en nape ruiah kown. 10Lowk mih huapher kowi dow amatni uang dia khe kowh taken taria iawng taruk ia ming en nape ruiah kown, now alowk mih huapher kowi paw akeng mih taruk ia ming kenah seklek en nape ruiah kown. 11-12Asung khakma mih hua kowi mur thawp miuüa thawp mur iawng dow nami huapher pre buk mih luk kowi Israel kowh chapauüa ming en nape ruiah kown. Nami huapher pre buk mih dow kuh hown thawp pe adan müa hanow naiu danah kown, now ephawd kowrmow kowi kowh pangkawt re-e nasükah kown. Ang CHAKRAMANG, ang pur kowi Arawn uang mih khin khe Israeluüa kowi ang natukla reng kownkow nami ming rui uowi mih huapher pre buk mih pangkawt kowi Arawn nadanla reng kown. 13-14Kuh hown thawpah mih dan müa plan thawp pe pre buk diah. Now kuh achangma mih hown thawp pe leng pre buk hanow nami kuh apherklepchow mih kowi en nachawpah kown.

Owngphowr im thawp krang

15“Ang kowh naukrang natukla kownkow en nape thawpah owngphowr im lowk kown takla. Nami dow uan sown sarauüa kowh lup chekhai. Nami owngphowr im paw ephawd kowrmow iawng dow kuh, aruama süah mih ruapur pawi, arikma süah mih ruapur pawi, aringma süah mih ruapur pawi hai adipükchow mih la hown en nape thawpah kown. 16Nami owngphowr im dow aklang hai aphia pakar chi nathawpah kown. Nami dow uan pathowrchow mih hown klepah now tali tingnuichow nachangah kown. 17Nami owngphowr im luk kowi dow nadan pe asung khakma mih hua tali tan kown. Rik khüa mih tan kowi dow ‘Sardius’ hua, ‘Topaz’ hua hai ‘Karbun’ hua nadan pe kown. 18Pre tan mih kowi dow ‘Emeral’ hua, ‘Safir’ hua hai ‘Daimawn’ hua nadan pe kown. 19Sum tan mih kowi dow ‘Ligure’ hua, ‘Agate’ hua hai ‘Amethis’ hua nadan pe kown. 20Achur tan kowi dow ‘Beril’ hua, ‘Oniks’ hua hai ‘Jasper’ hua nadan pe kown. Naiawngün hua dow kuh hown kowh thawpah mih adan müa luk kowi nadanah kown mih chekhai. 21Israel kowh chapa laipre ia vüi hua nauowi laipre buk kown. Naiawngün hua towng kowi dow Israel kowh chapauüa ming narui pe lowk chi kown. Naiawngün dow thawp mur khe iawng nathawpah kown.

22-25“Nami owngphowr im vüi dow nathawp pe akli pre buk hanow owngphowr im aluk pra kowh nui kowi mapra lowk paipra lowk nachawpah kown. Nami akli dow ephawd kowrmow pangkawt kowi kowh kuh leng hown nakhuowkah kown. 26Nami klen kowi paw kuh hown nathawp pe akli pre buk hanow owngphowr im adak pra kowh nui kowi mapra lowk paipra lowk nachawpah kown. 27Nami klen kowi paw kuh hown kowh akli naplan thawp pe pre buk iawk kown. Nami akli pre buk mih dow ephawd kowrmow kowi kekawm lukchow re-e nachawpah kown. 28Owngphowr im adak pra kowh akli hown kekawm lukchow kowi kowh akli dow aruama mih leng hown nakhuowkah kown. Nahanow owngphowr im dow ephawd kowrmow hownia natasüt kown nadowi bowt.

29“Chimsaima mih arah kowi Arawn uang kup mih khin khe nami Israel chapauüa ming rui uowi mih owngphowr im mih nadanla reng kown. Nahanow ang CHAKRAMANG mih ang maru-uüa kowi natukah reng kown towbowt. 30Ang CHAKRAMANG, ang kowh ana pek tuk müa ‘Urim’ hai ‘Thumim’1 pami dow owngphowr im kowi natowah kown. Now ang pur kowi Arawn uang mih khin khe nami dow aia sakmowr kowi nauowi kown towbowt. Nahanow Israeluüa vüi ang kowh ana pek Arawn natuk kown towbowt.

Uamow kowh akeng mih tawnguat

31“Ephawd kowrmow lak pra kowh khupah kown mih kowrmow athawngma mih dow aruama mih la hown kangowh en nape thawpah kown. 32Nami kowrmow aluk pra dow lu krua müa natow pe akuang kown. Nami akuang uer dow natathek naklak dowi kownkow tapat lut asipma nakrawi sownah kown takla. 33Now aruama mih la, arikma mih la hai aringma mih la hown dalim uih iawng en nathawp pe powtuh hanow nami kowrmow adak pra kowh uer kowi tapat lut nakrawi tan pe kown, now nami powtuh takra kowi dow kuh hown kowh thawpah mih ro nakrawi chawp pe lowk chi kown. 34Adak pra kowh auer maten dow powtuh hai ro kriaah seklek se tapat lut nakrawi tan pe kown. 35Arawn uang chang ang lup mih khin khe nami kowrmow mih nauang khupla kown takla. Chimsaima Mih Arah kowi ang CHAKRAMANG pur kowi aia uang khe hai powt khe nami ro tün dow nata kown. Naiawng nadowi hanow aia dow nakowng kown.

36“Now kuh apherklepchow thawpah lowk hanow nami luk kowi dow ‘CHAKRAMANG VÜI CHIMSAIMA’ pami laiklow mur kowi kowh ruiah iawng en nape ruiah kown. 37Nami kuh apherklepchow mih dow napawng pur prakowi aruama mih leng hown natapah kown. 38Maru-uüa uang ap uanh mih khin khe atawima iawng che uang ap uanh khai hanow naiawngün maru-uüa kowh aprek mih Arawn nakur kown. Naiawngün uanap ang CHAKRAMANG nahawt paw pe kownkow nami kuh apherklepchow mih kaubeng kowi Arawn nadanla reng kown.

39“Aruama mih kowrmow krüa kowi nakhupah kown mih kowrmow bawngthawng athawngma mih hai napawng dow adipükchow mih la hown en nape kawngah kown. Kekawm dow en nape kawngah hanow nape sawtah bawng kown.

40“Arawn kowh chapauüa natatawngla kownkow hai nakala ringkawra kownkow kowrmow, kekawm hai lukruk mih en nape thawpah kown. 41En taimow Arawn hai achapauüa kowi naiawngün tawnguat mih en nakhup pe kown. Amatni kowi dow naklai pe sau hanow en nanümnapah kown, now en napeah uamow rah kown. Naiawng hai amatni kowi dow ang CHAKRAMANG vüi nauang chang lup kownkow en nalang kraah kown. 42Amatni kowh siri natüngla dowi kownkow kelang hownia thungtawr mowr namumla kown mih iawngpa mih la hown kraksa dawngh en nape thawpah kown. 43Taklowp taklangra te lak kowi uang khe hai Chimsaima Mih Arah kowi kowh phuchuara ria kowi uang chang lup khe amatni dow nami dawngh na-üla reng kown. Nahanow amatni kowh siri tüng mih rakowi naka aprek kown nadowi bowt, now amatni dow nakowng kown nadowi tham. Nami dow chowngchowng saksakma Arawn hai aia chuprek chaprekuüa vüi ari arow naown kown,” pakhai.