Uown Lawt 27

Tikah mih uanap chang müa phuchuara

1“Ri singh hown en nape thawpah phuchuara lowk kown, now nami phuchuara dow anui nauowi tali klüng kown. Areng klang hai adowng phia dow tanga muk chi en nape thawpah kown, now akro dow sum muk en nape thawpah kown. 2Phuchuara aluk prakowi dow anui towng anang iawng achemchow en nape huiah lowk chi kown. Naiawngün anang tali klüng mih dow phuchuara hown panga sang nasawnah kown. Now phuchuara hailawm naiawngün bowkbowk dow kri hown en nape klaiah kown. 3Phuchuara kowi kowh plawi kuak müa puh, phuchuara kowi kowh mawngchawng kuak müa uaibak, tawncher vi towk müa biatum, chaknga khowng müa chuk hai mairing pawk müa puh nathawpah kown. Naiawngün bowkbowk dow kri hown nathawpah kown. 4Now kri hown en nape thawpah lawkrachow1 lowk kown. Nami lawkrachow nui kowi dow akualuachow nathawp pe akli hanow en nape chawpah lowk chi kown. Nami akli paw kri hown en nape thawpah kown. 5Nami lawkrachow dow phuchuara uen dakchow kowi natowah kown. Nahanow nami lawkrachow dow phuchuara daw hownia phuchuara dawnglang kowi naawr uowi kown towbowt. 6Now phuchuara kawt müa paw ri singh hown en nape huiah akawtlawng pre buk kown, now nami akawtlawng paw kri hown en nape sowah kown. 7Nami akawtlawng pre buk mih dow akli kowi mapra dam lowk paipra dam lowk nasowrah kown, now nami akawtlawng hown phuchuara dow nacham kawtla reng kown. 8Nami phuchuara dow phen hown nathawpah kown, now alak kowi dow akuangma natowah kown. Mami hungh kowi kowh ang tek en mih powm iawng nami dow en nape thawpah kown takla.

Taklowp taklangra te re-e kowh viadawng

9“Taklowp taklangra te tavir lut en natow pe viadawng kown takla. Now nami viadawng dow uaniang hown en nape pingah kown. Mrawkphak prakowi dow 100 muk mowr napingah kown. Nami aping vüi dow adipükchow mih la hown kowh uaniang natawngah kown. 10Naiawngün uaniang iang müa dow natow pe achüng pirmi chüng kown. Nami achüng vüi dow akhawk rup rah kri hown nathawp pe pirmi klüng kown. Now uaniang iang müa dow lawngha iang hai tai hown kowh thawpah mih auowk rah achüng kowi nachawpah kown. 11Tawngphak prakowi paw nami iawng rowprowp en nachangah kown.

12“Satkup prakowi dow 50 muk mowr uaniang hown napingah kown. Nami pra dow uaniang hai achüng nauowi hamüt chüng kown, now naiawngün achüng vüi dow kri hown kowh thawpah mih akhawk rup rah natow pe lowk chi kown. 13Satlawt prakowi paw 50 muk mowr uaniang hown napingah kown. 14-15Nami prakowi dow natow pe aplawt kown. Aplawt hawmlawm pra hai lakuai prakowi dow laitanga muk chi uaniang hown napingah kown. Nami uaniang iang müa dow natow pe achüng sum buk chi kown. Naiawngün achüng vüi paw kri hown kowh thawpah mih akhawk rup rah natow pe lowk chi kown.

16“Nami viadawng plawt vüi dow nathawp pe achüng tali klüng kown. Naiawngün achüng vüi dow akhawk rup rah kri hown nathawp pe tali klüng kown. Now aplawt vüi dow pirmi muk mih uaniang nathawpah lowk kown. Nami uaniang dow aruama süah mih ruapur pawi, arikma süah mih ruapur pawi, aringma süah mih ruapur pawi hai adipükchow mih la hown kowh sawt pe bawng mih natawngah kown. 17Viadawng tapat lut mih achüng maten dow tai hown kowh thawpah mih lawngha iang hown natachawp bowk kown. Now achüng luk kowi dow tai hown kowh thawpah mih auowk rah nachawp pe kown. Now achüng kowi kowh akhawk vüi akhawk rup rah dow kri hown nathawpah kown. 18Viadawng dow areng klang akawm muk naown kown, now adowng phia dow 50 muk naown kown. Uaniang maten dow akro tanga muk chi naown kown. Naiawngün uaniang dow adipükchow mih la hown nakawngah kown, now achüng vüi dow akhawk rup rah kri hown nathawpah bowk kown. 19Taklowp taklangra te kowi kowh natawngah kown mih uanh maten dow kri hown nathawpah bowk kown takla. Tangbung hai viadawng kowi kowh achüng tük müa krawng kowi kowh dupah mih chung paw kri hown nathawpah kown takla.

Maibu towngh vüi kowi kowh sau

20“Israeluüa kowi peah ana diah. Natowkla maibu kownkow kanrawn sau achangma mih en tut-e pauang pawla büah lah. 21Nami taklowp taklangra te lak kowi kowh sangbowk laitawm tawkpla pur kowi dow naiang pe uaniang kown. Uaniang uat kowi kowh Chimsaima Mih Arah kowi Arawn hai achapauüa mih sat kup hownia sat lawt pat chi CHAKRAMANG pur kowi kowh maibu pacham mingkhet lah. Nami dow chowngchowng saksakma Israel krungchakuüa nasunah reng kown mih ari arow chekhai,” pape khai.