2 Kô-rin-tô 8

1Wơ ŏh mi, hi lăm ƀlang ta ŏh mi gư̆t pơp đač Yang Trôk jêh ăn mŏng mbar grăp Pôl Ƀrăh ta Ma-sê-đuan, 2jêng pơp lông dlăng kjham mŏng pơp nai mhŏ ƀai, pơp čhô̆ brơn hên khăñ khăh jêh iên pơp dlĕh dlan knap mñai hên jêh myơr ñjêng pơp bliêh ngăn băh nuih nhăm hên. 3Bơ yơng ăñ lăm nư̆k ru hên jêh myơr hui si pơp dơi, jêh iên gao hĭn pơp hên dơi mau, yơng băh nuih nhăm čŏng čiêng, 4ta ŏk pơp kuôl dăn, hên gĭr dăn ta hi dơi mau pơp đač jêh iên pơp tăm tlăč mŏng bruă ho ăn ta băl đăo ƀrăh. 5Jêh iên so mau hui pơp hi kăp găn, ƀê̆ dăh luôr hĭn hên jêh myơr hên tơm ta Khua Yang, jêh iên ta hi, mơn băh pơp Yang Trôk khơñ. 6Hư̆n yơh, hi čhôl trôt kăn Tit, no di đô̆ nă kăn dư̆ng mhŏ, ndrơm ya, kăn ăt dơi lăm jêh bruă găl hư̆n ta ŏh mi kơt iên ya. 7Ƀê̆ dăh, ndrơm klăh di ŏh mi dơi mŏng grăp pơp, ta pơp đăo, pơp ngơi, pơp gư̆t wơng, lĕ nuih nhăm dôh hôl, jêh iên pơp khăp khơñ băh hi gŭk mŏng ŏh mi, no di ŏh mi ăt dơi mŏng bruă găl ho. 8Ăñ so ngơi hui si pơp tơ tă, ƀê̆ dăh mơn băh nuih nhăm dôh hôl lĕ mơt nêh dơ dêh, ksiêm dlăng pơp ngĭn ngăn ta pơp khăp khơñ ŏh mi di. 9Bơ yơng ŏh mi gư̆t pơp đač Khua Yang băn, jêng Yang Tŏng Tlĕh Yê-su, hư̆n jêng yơng băh ŏh mi, wăt di lăh ndrŏng săh, Khua Yang ñjêng ƀun ƀin, no di mơn băh pơp ƀun knap Mtao hư̆n, ŏh mi dơi ñjêng ndrŏng săh.

10Jêh iên ăñ mau pơp mĭn kčĕ ta bruă ho, bơ yơng pơp ho ăn pơp tŭ dơn ta ŏh mi, jêng lĕ mơt nêh so mau gu băh năm lak dư̆ng mhŏ bruă ho, ƀê̆ dăh hôm wêh khơñ mhŏ ya. 11Ƀê̆ dăh nar o, ăn ŏh mi lăm jêh lĕ mơt bruă jêh mhŏ hư̆n, đô̆ nă nuih nhăm khơñ mhŏ, hư̆n pơp lăm jêh băh tŭk dơi mau ăt blăh iên ya. 12Bơ yơng ndă mau pơp khơñ luôr ru, pơp myơr hư̆n dơi dơn hui si pơp băn dơi mau, so geh hui si pơp băn so mau.

13Ngăn ya, so geh ăn pơp nghơč ta nêh dơ dêh, bơ pơp măh ăr ăn ta ŏh mi, ƀê̆ dăh hui si pơp ndrơm băk. 14Mŏng mông ho, pơp khăñ khăh ŏh mi di thêm ta pơp kƀăh nêh hư̆n, no di pơp khăñ khăh nêh hư̆n ăt dơi thêm ta pơp ŏh mi khơñ, no di mau pơp lăm ndrơm, 15klăh di mau pơp čih:

“Nêh mau ŏk ăt so khăñ,

nêh mau ƀê̆ ăt so bhơi.”

16Ƀê̆ dăh lăh găl Yang Trôk, Mtao ăn ƀơn pơp dôh hôl ta ŏh mi mŏng nuih nhăm kăn Tit. 17Bơ yơng wăt di lăh jêh kăn tŭ ư pơp hi kuôl dăn, ƀê̆ dăh yơng băh kăn mau nuih nhăm dôh hôl, hư̆n kăn čŏng khơñ sak ta ŏh mi. 18Hư̆n yơh, hi jêh yua ju nau nêh sak băk ta kăn, pơp pĕh hing kăn ho mŏng Pơp Găl lar grăp hih ƀư̆n; 19jêh iên so mau blăh iên gu ƀă, ƀê̆ dăh ăt jêh săč ruăh yơng băh grăp hih ƀư̆n ndrơm klăh di ŏh mi mhŏ bruă băk hi, ju băk bruă găl ho, jêng bruă hi hôm mhŏ trôh ta pơp guh ang Yang Trôk, jêh iên lăm ƀlang nuih nhăm găl hi; 20jai hi răng nơn klăh iên, no di so mau ju nau nêh dơi ƀuăh ñjăm hi ta bruă hi kĕ kriê pơp no tŏng đru ŏk mŏk ho. 21Bơ yơng hi ksiêm luôr ta lĕ mơt pơp găl, so mau băh gu ta măt Yang Trôk, ƀê̆ dăh wăt ta măt kuôn nêh ya.

22Gao băh iên, hi tuôm yua ju nau nêh hi sak ju băk hên, hư̆n jêng nêh jêh hi ksiêm nư̆k mŏng ŏk bruă, bơ yơng khăng mau nuih nhăm dôh hôl, ƀê̆ dăh nar o wêh dôh hôl hĭn mơn băh nuih nhăm knang ngăn mŏng ŏh mi. 23Ndă yơng ta kăn Tit, kăn jêng nêh mhŏ bruă băk ăñ jêh iên nêh mhŏ bruă băk ta pu me. Ndă di nêh ŏh mi dơ dêh hi di, hên jêng nêh bi la grăp hih ƀư̆n, jêng pơp guh ang Yang Tŏng Tlĕh. 24Kơt iên, jai lăm ƀlang ta hên ta pơp lăm nư̆k pơp khăp khơñ ŏh mi di jêh iên pơp ngơi găl hi ta ŏh mi jêng lăm ƀlang ta măt băl pôl ƀrăh.