2 Kô-rin-tô 7

1Kơt iên, wơ ŏh mi khăp khơñ, bơ yơng băn mau lĕ mơt pơp ƀuôn hư̆n, ăn băn lăm ngôr băn tơm băh grăp pơp ƀơ̆ ñơ̆ mŏng săk jăn wăt ngăt nhuôl, lăm ñjêng ƀrăh ngôr nư̆m nơn mŏng pơp gư̆t mpŭ ta Yang Trôk.

2Ăn thêm tŭk ta hi! Hi ñăm tuôm mhŏ tih ta nai ôh; hi ñăm tuôm lăm djŏh nai; hi ñăm tuôm mblơm nai. 3Ăñ so ngơi no di phat dôih ŏh mi; bơ yơng ăñ jêh tuôm ngơi ru, ŏh mi gŭk mŏng nuih nhăm hi, no di khư̆t ju băk jêh iên brêh ju băk. 4Ăñ mau pơp knang ngăn mŏng ŏh mi; ăñ brơn nuih ngăn yơng ta ŏh mi. Ăñ dơi mau ŏk pơp jôh lih. Ăñ dơi mau pơp čhô̆ brơn ho mŏng grăp pơp knap mñai hi.

5Bơ yơng di lăh ăñ sak trôh ta Ma-sê-đuan, săk jăn hi so mau mdei dŏng nĕ nơn, ƀê̆ dăh dlĕh dlan mŏng djăp pơp — ta ling mau pơp tăm mblăh, mŏng nuông mau pơp đhir ngĭt. 6Ƀê̆ dăh, Yang Trôk, Mtao jôh lih lĕ mơt nêh plơ̆ nuih, jêh jôh lih hi ta bruă kăn Tit jêh trôh ta o, 7jêh iên so mau čuôm gu yơng băh bruă kăn jêh trôh hư̆n ôh, ƀê̆ dăh yơng băh pơp jôh lih hư̆n jêng pơp kăn jêh dơn mŏng ŏh mi, jai tơ têh ta hi yơng nuih nhăm čang mơn ŏh mi di, pơp ênguôt ŏh mi di, nuih nhăm dôh hôl ŏh mi yơng băh ăñ, tăl ta ăñ dơi mau pơp čhô̆ brơn hĭn.

8Bơ yơng wăt di lăh mŏng ră ñuôr ndă ăñ lăm ênguôt ŏh mi, hư̆n ăñ so wêh ƀlŏk ôh. Wăt di lăh ndă ăñ khăng ƀlŏk (ăñ so klăh iêu ră ñuôr hư̆n jêh lăm ênguôt ŏh mi, khă băh gu bhiêu), 9nar o, ăñ čhô̆ brơn, so geh yơng băh ŏh mi ênguôt ôh, ƀê̆ dăh yơng băh ŏh mi jêh ênguôt ĕh lăm trôh ta pơp niêl mlih. Bơ yơng ŏh mi jêh ênguôt hui si Yang Trôk, no di ŏh mi so nga mŏng ju mta pơp băh hi. 10Bơ yơng pơp ênguôt hui si Yang Trôk ĕh lăm ndơp ta pơp niêl mlih trôh ta pơp tŏng tlĕh ƀê̆ dăh so ƀlŏk. Ƀê̆ dăh pơp ênguôt hui si teh dih ĕh lăm ndơp ta pơp khư̆t. 11Blăh iên dlăng tŏ, ju băk bruă hư̆n năn pơp mhŏ ênguôt hui si Yang Trôk, jêh ăn mŏng nuih nhăm ŏh mi ŏk pơp dôh hôl: bơ đô̆ nă pơp ngơi mgang, đô̆ nă pơp hao nuih, đô̆ nă pơp bhŭng mpŭ, đô̆ nă pơp čang mơn, đô̆ nă nuih nhăm bluh hôl, đô̆ nă pơp ƀuăh mkra! Mŏng grăp pơp, ŏh mi jêh lăm klă ŏh mi tơm jêng ƀrăh ngôr yơng ta bruă ho. 12Kơt iên, wăt di lăh ăñ jêh čih ta ŏh mi, hư̆n so geh yơng băh nêh jêh mhŏ tih djŏh, mdăh yơng băh nêh jêh nai mhŏ ƀai, ƀê̆ dăh jêng yơng băh nuih nhăm dôh hôl ŏh mi di, hư̆n jêng pơp bi la ta hi, jêh lăm ƀang ŏh mi ta măt Yang Trôk. 13Mơn băh pơp ho, hi dơi mau pơp jôh lih.

Jêh iên, ta pơp jôh lih hi tơm, hi ăt čhô̆ brơn hĭn yơng pơp čhô̆ brơn kăn Tit di, bơ yơng lĕ mơt ŏh mi nuih nhăm kăn dơi mau pơp đăp nang. 14Ndă di năn pơp ăñ mbŭ săk ta kăn yơng ta ŏh mi, hư̆n ăñ so hôm prêng, ƀê̆ dăh klăh di grăp pơp hi jêh ngơi ta ŏh mi mŏng pơp ngĭn ngăn, hư̆n pơp hi mbŭ săk ăt jêh dơi lăm ƀlang knuih ngĭn ngăn klăh iên ya ta kăn Tit. 15Jêh iên nuih nhăm khăp khơñ kăn di ăn ta ŏh mi hư̆n khăñ khăh hĭn ya, jăng jai wêh kăh wơi hư̆t lĕ mơt pơp dơn dơk ŏh mi di, đô̆ nă ŏh mi tŭ drông kăn ta pơp bhŭng jêh iên pơ prăm. 16Ăñ čhô̆ brơn bơ yơng ăñ knang ta ŏh mi mŏng lĕ mơt bruă.