2 Kô-rin-tô 6

1Jêh iên, jăng jai mhŏ bruă ju băk Yang Trôk, hi ăt dăn ŏh mi man sŏk dơn pơp đač Yang Trôk di ta pơp dăh dan — 2bơ yơng Khua Yang ngơi:

“Mŏng mông găl, ăñ jêh tŏng no di boh hư̆t pơp me, jêh iên mŏng nar tŏng tlĕh, ăñ jêh đru me.”

“Tŏ hư̆n, nar o jêng mông găl. Tŏ hư̆n, nar o jêng nar tŏng tlĕh.” —

3mŏng djăp mta pơp so ăn ĕh păk bông, no di bruă hi mhŏ so nai ƀuăh ñjăm, 4mlih ta iên, mŏng grăp pơp, hi lăm pơl hi tơm ndrơm klăh di dư̆k Yang Trôk di: mŏng pơp gir ăt ram, mŏng ŏk pơp knap mñai, mŏng ŏk pơp dlĕh dlan, mŏng pơp ăr măh, 5mŏng pơp nai pŭ yat, mŏng war mnă, mŏng pơp rŭng răng, mŏng pơp knap mñai, mŏng mơ măng so mau bê̆, mŏng mông nguôt sap, 6mŏng pơp ƀrăh ngôr, mŏng pơp gư̆t wơng, mŏng pơp gĭr ăt, mŏng pơp băn dhư̆, mŏng Yang Ngăt Găl, mŏng pơp khăp khơñ ngĭn ngăn, 7mŏng pơp ngơi ngĭn ngăn, mŏng pơp myang Yang Trôk di, ta grăp pơp tăm mblăh kpă ti ma wăt ti kiêu, 8mŏng pơp mpŭ wăt pơp prêng, mŏng pơp pĕh hing djŏh wăt pơp pĕh hing găl; klăh di băl mblơm mblam, ƀê̆ dăh wêh năng jêng ngĭn ngăn, 9klăh di so nai gư̆t năl, ƀê̆ dăh dơi ŏk nêh gư̆t năl; klăh di mơñ khư̆t, ƀê̆ dăh — tŏ hư̆n! — ăt hôm brêh; klăh di tŭ pơp kmhal, ƀê̆ dăh so nai lăm khư̆t; 10klăh di ênguôt, ƀê̆ dăh răn ƀăn čhô̆ brơn; klăh di ƀun knap, ƀê̆ dăh wêh lăm ăn ŏk nêh dơi ndrŏng; klăh di so mau ju mta pơp, ƀê̆ dăh wêh mau djăp mta pơp.

11Wơ ŏh mi băl uôn Kô-rin-tô, dơk hi jêh ngơi ta ŏh mi; nuih nhăm hi jêh pơk lơ ngăn. 12So geh yơng băh hi mhŏ kiêl ta ŏh mi ôh, ƀê̆ dăh yơng băh nuih nhăm ŏh mi tơm mhŏ kiêl; 13kơt iên ndrơm mŏng pơp wêh lăh — ăñ ngơi klăh di ta ku sei — ăt ăn ŏh mi pơk lơ nuih nhăm tơm.

14Man gir tung nung so yuôm băk ta băl so đăo, bơ yơng pơp kpă jêh iên pơp so kpă năn pơp yuôm no di tăm tlăč? Mdăh pơp ang ta pơp ngo măng năn pơp yuôm no di tăm guôp băk? 15Yang Tŏng Tlĕh ta Ƀê-li-an mau pơp tăm guôp mơh? Mdăh nêh đăo năn pơp mau ju băk ta băl so đăo? 16Hih kôh mpŭ Yang Trôk ta rup yang năn pơp mau no di tăm tlăč? Bơ yơng băn jêng hih kôh mpŭ Yang Trôk khăng brêh, klăh di Yang Trôk tuôm ngơi ru:

“Ăñ jrăng gŭk mŏng mbar hên, jêh iên sak mŏng mbar hên,

Ăñ jrăng jêng Yang Trôk hên di,

jêh iên hên tơm jrăng jêng uôn lan Ăñ.”

17Kơt iên,

“Ăn du wăč băh băl ĕh

jêh iên tăm tlăh ta băl ĕh,” Khua Yang lăh,

“jêh iên man bi tŏng pơp ƀơ̆ ñơ̆,

jêh hư̆n ăñ jrăng wêh ruôm pu me.”

18Jêh iên

“Ăñ jrăng jêng Bap ta pu me,

jêh iên pu me jrăng jêng kuôn tlau, kuôn u ur ta Ăñ,”

Khua Yang Mau Lĕ Pơp Myang ngơi blăh iên.