ዓይኑሞ ማፃኣፖ 85

ዓይኑሞ ሱኡጋሢ ዓይሣ ጎይፆና ቆሬ ናኣታ ዓይናዼ ዓይኑሞ

ኮሹሞ ዛላ ሺኢቂንቴ ሺኢጲሢ

1ናንጊና ናንጋ ጎዳሢዮ!

ኔ ሳዖም ኔኤኒ ኮሺ ባኣዚ ማዼኔ፤

ያይቆኦቤኮ ዲዒንቴ ዓሶ ማሂ ኔ ዓንጄኔ።

2ኔ ዴሮኮ ጎሞ ዓቶም ኔኤኒ ጌዔኔ፤

ጎሞ ዔያቶሲ ቢያ ኔ ካንቄኔ።

3ኔኤኮ ዎዻ ባኮ ቢያ ኔ ሺኢሼኔ፤

ዼኤፖ ዻጎይዳፓኣ ኔ ማዔኔ።

4ኑኡኮ ዼኤሻሢ ማዔ ፆኦዛሢዮ!

ኑና ኑ ቤዞ ማሄ፤

ኑ ዑፃ ዔቃኒ ማላ ዻጎ ኔኤኮ ሺርሼ።

5ኔ ኑና ጎሬ ጎይሣ ናኣናና ናንጋ?

ዻጋ ኔኤሲ ሾይንቲፓ ሾይንቲ ሄሄላኒዳ?

6ዴራ ኔኤኮ ዎዛዻንዳጉዲ

ኔ ኑም ጊንሣ ሼምፖ ዒንጋዓዳ?

7ናንጊና ናንጋ ጎዳሢዮ!

ኔኤኮ ማኣሪፆ ኑና ዻዌቴራ፥ ኑና ዓውሴ።

8ናንጊና ናንጋ ጎዳ ማዔ ፆኦዛሢ ኬኤዛ ባኮ ታ ዋይዛንዳኔ፤

ኑኡኒ ኑኡኮ ዔኤዩሞ ጎይፆ ማዒ ዴንዲባኣቴ

ዒዚ ኑና ፔ ዴሮ፥ ዱማዼዞንሢም ኮሹሞ ዒንጋኒ ጫኣቄኔ።

9ቦንቻ ዒዛኮ ኑ ሳዖይዳ ናንጋንዳጉዲ

ዒዛ ዒጊጫዞንሢም ዓውሲፃ ዒዛኮ ዑኬኬ።

10ማኣሪሢና ጉሙርቂንቲሢና ዎላ ካኣማያኬ፤

ፂሉሞና ኮሹሞና ዎሊ ዔካያኬ።

11ጉሙርቂንቲሢ ሳዓፓ ሌካ ባቃላኔ፤

ፂሉሞ ጫሪንቺፓ ሊካ ዛጋኔ።

12ናንጊና ናንጋ ጎዳ ኮሺ ባኣዚ ዒንጋኔ፤

ዓጬላ ኑኡኮ ጎሽኮዛ ሚርጌ ባኣዚ ካሣኔ።

13ፂሉማ ዒዛኮ ቤርታ ቤርታ ዓኣዻኔ፤

ሃንታንዳጉዲ ጎይፆ ዒዛም ጊኢጊሻኔ።