ዓይኑሞ ማፃኣፖ 86

ዳውቴኮ ሺኢጲፆ

ፆኦሲ ማኣዳንዳጉዲ ሺኢቂንቴ ሺኢጲሢ

1ናንጊና ናንጋ ጎዳሢዮ!

ዋዮ ኔኤሲ ታ ባንሢ ማሂ ዋይዜ፤

ታኣኒ ማንቆ ሃሣ ሜታዼ ዓሲኬ።

2ኔኤም ታኣኒ ዱማዼ ዓሲታሢሮ ሼምፓሢ ታኣኮ ካፔ፤

ኔኤኒ ታኣኮ ፆኦዛሢኬ፤

ኔና ጉሙርቃ ኔኤኮ ዓይላሢ፥ ታና ዓውሴ።

3ናንጊና ናንጋ ጎዳሢዮ! ታና ሚጪንቴ፤

ሮኦሮ ጉቤ ታ ኔ ባንሢ ዒላታኔ፤

4ኔ ዓይላሢኮ ሼምፓሢ ዎዛሴ፤

ናንጊና ናንጋ ጎዳሢዮ! ታ ሼምፓሢ ታ ኔኤም ዒንጋኔ።

5ናንጊና ናንጋ ጎዳሢዮ! ኔኤኒ ሚጪንታያና ዓቶም ጋዓያናኬ፤

ኔና ዔኤላዞንሢም ቢያ ሚጪንቲፆኮ ዛጲ ኔኤኮ ባኣሴ።

6ናንጊና ናንጋ ጎዳሢዮ! ሺኢጲፆ ታኣኮ ዒናፓ ዋይዜ፤

ታ ሜታዺ ሺኢቃ ሺኢጲፆ ዋይዜ።

7ኔኤኒ ታኣም ማሂ ኬኤዛያታሢሮ

ታኣኮ ሜታሢ ኬሎ ታ ኔ ባንሢ ዒላታኔ።

8ጎዳሢዮ! ሜሌ ፆኦዞ ባኣካ ኔጉዴይ ባኣሴ፤

ኔ ማዾና ቤቃ ማዾዋ ባኣሴ።

9ጎዳሢዮ! ኔኤኒ ማዤ ዴራ ቢያ

ኔ ቤርቶ ሙኪ ኔኤም ዚጋንዳኔ፤

ኔ ሱንፆም ቦንቾዋ ዒንጋንዳኔ። 1

10ኔኤኒ ዼኤፒ ማዔሢሮ

ኔ ዎልቄና ማዺንታ ዓኪ ባኣዚ ኔ ማዻኔ፤

ኔኤኒ ሌሊ ፆኦሲኬ።

11ናንጊና ናንጋ ጎዳሢዮ!

ኔኤኮ ጎይፆ ታና ዔርዜ፤

ኔ ጎኑሞና ታ ዓኣዻንዳኔ፤

ሱንፆ ኔኤኮ ታ ዒጊጫንዳጉዲ ኩሙሢ ዒኔ ታኣም ዒንጌ።

12ናንጊና ናንጋ ጎዳ ማዔ ታ ፆኦዛሢዮ!

ጎኔ ዒናፓ ታ ኔና ጋላታኔ፤

ናንጊና ሱንፆ ታ ኔኤኮ ቦንቻኔ።

13ኔ ታና ሚጪንቴ ሚጪንቲፃ ኮሺ ዼኤፒኬ!

ሼምፓሢ ታኣኮ ኔ ሄሊንቱዋ ዔታፓ ዓውሴኔ።

14ፆኦሲዮ! ዖቶርቃ ዓሳ ታ ጊዳ ፑርቱሞና ዔቄኔ፤

ዒጊቻ ፑርቶ ዓሳ ዎዻኒ ታና ኮዓኔ።

ኔና ዔያታ ዔኤቢኬ ጌይባኣሴ።

15ጎዳሢዮ!

ኔኤኒ ጋዓንቴ ኮሺ ሃሣ ሚጪንታ ፆኦሲኬ፤

ሩኡሪና ዻጋዹዋያ፥ ኮሹሞንታ ጉሙርቂንቲፃኣ ኔኤኮ ሚርጌኬ።

16ታ ባንሢ ዛጊ ታና ሚጪንቴ፤

ታና ኔ ዓይላሢም ዎልቄ ዒንጌ፤

ታና፥ ኔ ዓይሌሎ ናዓሢ ዓውሴ።

17ታና ዒፃ ዓሳ ዛጊ ቦርሲንታንዳጉዲ

ኔኤኮ ሚጪንቲፆ ማላቶ ታና ዻዌ፤

ናንጊና ናንጋ ጎዳሢዮ!

ኔ ታና ማኣዴኔ፥ ዶዲሼኔ።