ጌኤዦ ማፃኣፖ
ዓይኑሞ ማፃኣፖ 84
ዓይኑሞ ሱኡጋሢ ዓይሣ ጎይፆና ቆሬ ናኣታ ሹሉንጎና ዓይናዼ ዓይኑሞ
ፆኦሲኮ ጌኤዦ ማኣሮ ጶቂሥሢ
ቢያ ባኮ ዎይሣ ጎዳሢዮ!
ኔ ዎርቃ ማኣራ ዎዚጉዲ ናሽኪንታያዳይ!
ሼምፓሢ ታኣሲ ናንጊና ናንጋ ጎዳ ካራ
ዓሳ ቡካ ጶኦኮ ጶቂሣኔ፤
ታኣኮ ዒኖንታ ዑፆንታ ናንጊና ባይቁዋ ፆኦዛሢም ዒላሹዋቴ።
ቢያ ባኮ ዎይሣ ጎዳ ማዔ ፆኦዛሢዮ፥ ታ ጎዳ!
ኔኤም ዒንጎ ባኮ ሺኢሾ ቤዞ ኮራ
ሱኡታታዖ ናንጋ ማኣሪ
ዶኦሌያ ፔ ናኣቶ ዴይሣ ማኣሪ ማዣኔ።
ኔ ማኣራ ናንጋዞንሢ ዓንጂንቴያኬ፤
ናንጊና ዔያታ ኔና ጋላታኔ።
ኔና ፔኤኮ ዎልቃሢ ማሄዞንሢ
ዒኖና ፔኤኮ ፂዮኔ ጎይፆ ማላዞንሢ
ሚርጌና ዓንጂንቴያኬ።
ባካ ጌይንታ ዋኣፃ ባኣ ዶኦጮና ዔያታ ፒንቃ ዎዶና
ዓልቃ ዋኣሢ ፆኦሲ ዔያቶም ዑራኔ፤
ሲሎ ዒራኣ ቦቆሎ ዔቶ ዋኣሢና ኩንሣንዳኔ።
ዎልቄይዳ ዎልቄ ዔያታ ቃሳንዳኔ፤
ፔቴ ፔቴሢ ፂዮኔ ዹኮይዳ ዓኣ ፆኦሲ ቤርቶ ሺኢካንዳኔ።
ቢያ ባኮ ዎይሣ ጎዳሢዮ! ሺኢጲፆ ታኣኮ ዋይዜ፤
ያይቆኦቤ ፆኦዛሢዮ! ታኣም ዋይዜ።
ፆኦሲዮ! ዶኦሪ ኔ ኑም ዶኦሜ ካኣቲ ዓንጄ፤
ዒዚ ኑኡኮ ጊቲማ ማዔሢሮ ዒዛ ዛጌ።
ሜሌ ቤስካ ሺያ ኬሊ ዴይሢዳፓ
ኔ ጌኤዦ ማኣሮ ካራ ፔቴ ኬሊ ፔኤቂሢ ኮሺኬ፤
ፑርቶ ዓሶ ማኣራ ናንጊፆይዳፓ
ፆኦሲ ማኣሮ ካፓያ ማዒ ናንጋኒ ታ ኮዓኔ።
ኑኡኮ ጎዳሢና ፆኦዛሢዮ!
ኔኤኒ ዓዳ ዓቢና ጊቲማና ጉዲኬ፤
ኔ ኮሹሞና ኔ ቦንቾና ኔ ኑና ካፓኔ፤
ኮሺ ማዻ ዓሲም ዓይጎዋ ኮሺ ማዔ ባኣዚ ኔ ላኣጉዋሴ።
ቢያ ባኮ ዎይሣ ጎዳሢዮ!
ኔና ጉሙርቃዞንሢ ዎዚ ዓንጂንቴያዳይ!
ጌኤዦ ማፃኣፖ. Copyright © 2008 The Word for the World International and The Bible Society of Ethiopia. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.