ዓይኑሞ ማፃኣፖ 83

ዒስራዔኤሌኮ ሞርካ ባሺንታንዳጉዲ ሺኢቂንቴ ሺኢጲሢ

ዓሳኣፔኮ ፆኦሲ ሄርሺፆ ዓይኑሞ

1ፆኦሲዮ! ኔኤኒ ዚቲዮ ጌዒፖ፤

ፆኦሲዮ! ኔኤኒ ጬዊዮ ጌዒፖ።

2ሞርካ ኔኤኮ ዎማይዲ ዔቄያታቴ ዛጌ፤

ኔና ዒፃ ዓሳ ቶኦኮ ፔኤሲ ዎማይዲ ዼጊሴቴያ ዛጌ።

3ኔኤኮ ዴሮ ዑፃ ጌኔ ማዻኒ ዓኣቺ ጌስታኔ፤

ኔኤኒ ካፓ ዓሶ ኮምባኒ ዔያታ ዞርታኔ።

4«ሃካፓ ሴካ ዒስራዔኤሌ ዓሶ ሱንፃ ዔርቱዋጉዲ

ሃኒ ሙኩዋቴ ዴሬ ማዑዋጉዲ ኑ ዔያቶ ጋፒሶም» ጋዓኔ።

5ፔቴ ማሊሢና ዎላ ጊኢጊ ዔያታ ዞርቴኔ፤

ኔ ዑፃ ዔቃኒ ዎላ ጫኣቄኔ።

6ዔያታ፦ ዔዶኦሜ፥ ዒስማዔኤሌ፥ ሞዓኣቤ፥ ዓጋሪያኔ፥

7ጌባሌ፥ ዓሞኔ፥ ዓማሌቄ፥ ፒሊስፄኤሜንታ ፂሮሴ ዴሮንታኬ።

8ዓሶኦሬ ዓሳኣ ዔያቶና ዎላ ፔቴ ማዔኔ፤

ሎኦፄ ናኣቶዋ ዔያታ ማኣዳያ ማዔኔ።

9ሚዲያሜ ዓጮይዳ ኔ ማዼ ጎይፆ ዔያቶይዳ ማዼ፤

ቂሶኔ ዎራ ሲሳራና ዒያቢሴናይዳ ኔ ሄሊሴ ባካ ዔያቶ ሄሎንጎ። 1

10ዔያታ ዓይኔዶሬ ጌይንታ ቤዛ ባይቄኔ፤

ዓዳ ሳዓይዳ ኬኤሪንቴ ቡኡራ ማዔኔ።

11ዖሬቤና ዜቤ ዓሶና ዑፃ ኔ ማዼ ጎይፆ

ሃያ ዓሶ ሱኡጎ ዑፃኣ ማዼ፤

ዜባሄና ፃልሙናዔ ዓሶና ዑፃ ኔ ማዼ ጎይፆ

ሃያ ዓሶ ዎይሣ ዓሶይዳኣ ማዼ። 2

12ዔያታ፦ «ፆኦሲ ዓሶ ቤዞ

ኑኡኒ ኑኡሮ ማሃንዳኔ» ጌዔኔ።

13ዬያሮ ታ ፆኦዛሢዮ! ዔያቶ ሲላሊጉዲ

ዢባሬ ዔኪ ዓኣዻ ዲልባጉዲ ላኣሌ።

14ታሚ ዴኤሊ ካይዚ ሙዓሢጉዲ

ታሚኮ ሎስታ ዹካ ዓርቃሢጉዲ

15ኔኤኮ ጉዳሢ ዢባሮና ዔያቶ ዳውሴ፤

ዓልጎ ዢባሮናኣ ዲቃሤ።

16ናንጊና ናንጋ ጎዳሢዮ! ዔያታ ሱንፆ ኔኤሲ ኮዓንዳጉዲ

ቦርሲንቲ ዔያቶይዳ ዋሄ።

17ናንጊና ዔያታ ካራ ባይዚ ቦርሲንቶንጎ፤

ዻውሲንቲ ዔያታ ባይቆንጎ።

18ሱንፃ ኔኤኮ ናንጊና ናንጋ ጎዳ ማዔሢ ኔ ሌሊ

ሳዖ ቢያይዳ ዼኤፓሢ ኔና ማዔሢያ ዔያታ ዔሮንጎ።