Razan-tSaontsy 13

1Miantoke ty lafan-drae’e

ty ajaja karafito,

fe tsy mañaon-trevoke ty mpiteratera.

2Ty havokaran-tsaontsi’ ondatio

ro ikama’e raha mafiry,

fe tsihavokarañe ty fañiria’

o mpitroboo.

3Mahatan-kavelo ty mahambeñe

ty falie’e;

mianto ka ty mampidañadaña fivimby.

4Tea-haneñe ty votroo, fe tsy mahazo;

ho anjañeñe ka ty mavitrike.

5Malain-dremborake ty vañoñe,

fe manao ty hameñarañe naho hasalarañe ty lahiaga.

6Mahambeñe i an-dalam-bantañey

ty havañonañe,

fe mamotsake ty mpanan-kakeo

o hatsivokarañeo.

7Eo ty miamoke ho mpañefoefo

fe poi’e;

eo ka ty manao ho rarake

f’ie mpañaleale.

8Mahajebañe ty fiai’ ondaty o vara’eo,

fe tsy mañaom-pañembàñañe

ty rarake.

9Mirebeke ty failo’ o vantañeo, fe hakipeke ty jiro’ i lahiaga.

10Fifandierañe avao ty ente’

ty fibohabohañe,

fe hihitse ty rambese’

ty mañaom-bere.

11Mikepake ty vara niazo

an-tsata koake,

fa mampitombo ka ty mitromake hanontoña’e.

12Mampikoretse arofo

ty fitamañe nihànkañe,

fe hataen-kaveloñe ty salala niheneke.

13Hanaña’ i tsaray songo ty manirìka aze,

fe ho tambezeñe

ty mañeveñe amo lilio.

14Figoangoañan-kavelo

ty Fañòha’ o mahihitseo

hiholiara’e o fandrin-kavilasio.

15Tendreke fañisohañe ty hilala soa,

fe tomoantoañe ty lala’

o manao bodongeroo.

16Hene mitoloñe an-kilala ze hendre,

fe hagegeañe ty aboa’ i dagolay.

17Mivariñ’an-dama ty irake vìlañe,

fe fijanganañe ty mpihitrike migahiñe.

18Hararahañe naho hasalarañe

ty hizò ty tsi-mañaon-dafa,

iasiañe ka ty miantok’ endake.

19Mamy an-troke ty fisalalàñe heneke,

fe mamparitsike i dagola

ty isitaha’e ty raty.

20Miha-mahihitse te miharo lia

ami’ty mahihitse,

f’ie halovilovy te mpiami’ty gege.

21Tokoen-kasotriañe ty aman-kakeo,

fe firaoraoañe ty anambezañe

o vantañeo.

22Mampandova amo anan’ ana’eo

ty vañoñe,

fe mihaja ho a o vantañeo

ty vara’ o piaroteñeo.

23Bey ty havokarañe an-tane-hoba’ i rarakey,

fe ifaopaoha’ ty tsy-hatò.

24Malaiñ-anake ty mampipoke fikiso,

fe mikoko aze ty mipiso

am-pahimbañañe.

25Mahaeneñe ty tro’e

ty mahakama’ i vantañey,

fe kefoke ty fisafoa’ i lahiaga.