Razan-tSaontsy 12

1Mikoko hilala ty mpitea lafa,

fe gege ty malaiñ-endake;

2Hanjo fañisohañe am’ Iehovà

ty matarike, fe hafà’e ty mpikinia.

3Tsy mahafioreñe ondaty ty halo-tserehañe,

fe tsy hasiotse ty vaha’o vañoñeo.

4Sabakan-engem-bali’e ty rakemba soa,

fe hoe hamomohañe an-taola’e ao

ty mahasalatse.

5To ty fivetsevetse’ o vantañeo;

fe mitarik’ an-dama ty fanoroa’

o lo-tserekeo.

6Famandroñan-dio ty entam-bola’

o raty tserekeo,

fe hañaha ty vañoñe o saontsi’eo.

7Rotsaheñe o lo-tserekeo le tsy eo,

fe hijadoñe ty anjomba’ o mahitio.

8O hihi’eo ty anambezañe ondatio,

fe ho sirikaeñe ty mengok’ an-troke.

9Hàmake t’ie mirè-batañe,

naho manaña mpitoroñe raike,

ta t’ie mieva ho bey fe tsy aman-kaneñe.

10Haoñe’ ty vantañe ty fiai’ i bibi’ey,

fe fampisoañañe avao

ty tretre’ i rati-tserekey.

11Ho enen-kaneñe ty mpiava’ i tane’ey,

fe po-hilala ty mañeañe ty tsy vente’e.

12Tsikirihe’ o rati-tserekeo

ty fikopahan-karatiañe,

fe mamokatse ty vaha’ o vantañeo.

13Fandrihe’ ty fiolàn-tsoñi’e ty lahiaga,

fe hibolititse amy haloviloviañey ty vañoñe.

14Mahaenen-kasoa t’indaty

ty vokam-palie’e,

vaho himpoly ama’ ondaty

o fitoloñam-pità’eo.

15Mahity amo maso’eo ty gege,

fe mijanjim-panoroañe ty mahihitse.

16Fohiñe aniany ty filoa-tiña’ i dagola,

fe lembefe’ i mahihitse ty mahasalatse.

17Mampiboake havantañañe

ty mikofòke hatò,

fe famañahiañe ty manara-bande.

18Eo ty manoantoañe an-drehake,

hoe fitomboham-pibara,

fe minday fijanganañe

ty famele’ o mahihitseo.

19Hijadoñe nainai’e ty fivimbin-katò,

fe aniany avao ty lelan-dremborake.

20Famañahiañe ty an-tro’ o mpikililio,

fe haehake t’ie mpifampilongo.

21Tsy mizò raty ty vantañe,

fe lifo-kasotriañe ty tsereheñe.

22Tiva am’ Iehovà ty soñy mandañitse,

fe no’e o mitoloñe am-pigahiñañeo.

23Mañaja hihitse ty hendre,

fe mitazataza hagegeañe ty tron-dagola.

24Hifeleke ty fità’ o mahimbañeo, vaho hondevozeñe ty taña migebañe.

25Mampidrodretse ty arofo’ ondaty

ty fivazobazorañe ama’e ao,

fe mampanintsiñe aze ty talily soa.

26Manoro an-drañe’e ty vantañe,

fe mampivike o lo-tsere­keo ty lala’iareo.

27Tsy atono’ i tembo ty nitsatsà’e;

fe vara ami’ty mpifanehake o hanaña’eo.

28Tendrek’ an-dalam-bantañe

ty haveloñe,

vaho tsy aman-kavetrahañe i oloñolo’ey.