Hosèa 14

1Ho vave’ i Somerone o tahi’eo,

amy t’ie niody aman’Añahare’e;

hampikorovohem-pibara;

ho demoheñe an-damilamy

o anak’ ajaja’ iareoo,

ho boraheñe an-drimitse

o rakemba mivesatseo.

2Ry Israele, mimpolia mb’am’ Iehovà

Andrianañahare’o;

fa nampihotrake azo o hakeo’oo.

3Andeso saontsy, le mibaliha mb’am’Iehovà: ano ty hoe:

Fonga afaho o hakeoo, rambeso an-kasoa,

vaho hengae’ay ty banian-tsoñi’ay1.

4Tsy haharombak’ anay t’i Asore;

izahay tsy hiningitse an-tsoavala,

le tsy hanao ty hoe amo sata-pità’aio:

Ry ndrahare’ay.

Fa ama’o ty hahaoniña’

ty bode-rae fiferenaiñañe.

5Ho jangañeko ty fidisa-voli’ iareo;

hikokoako an-tsatrin-tro,

fa mitolike ty habosehako.

6Hanahake ty zono am’ Israele iraho;

ie hidorenake hoe antake mandriake,

vaho hirifondrifoñe hoe Libanone.

7Handrevake o ra’eo,

naho hanahake ty andramahe ty enge’e,

vaho hoe Libanone ty harifondrifo’e.

8Himpoly iaby o mialok’ ama’eo;

ho tolorañ’ aiñe manahake i ampembay,

le hiraorao hoe vahe,

vaho handrifondrifoñe

hoe ty hamañiran-divai’ i Libanone.

9Le hanao ty hoe t’i Efraime:

Hanoeko inoñe ka o samposampoo?

Fa nitsanoñeko naho nijiloveko,

Manahake ty kile maindoñe ama’o iraho,

amako ty aharendreha’o voa.

10Ee te hahafohiñe o raha zao ty mahihitse,

naho haharendreke o mahilalao.

Amy te vantañe o lala’ Iehovào,

ie orihe’ o vañoñeo,

fe itsikapia’ o miolao.