Hosèa 13

1Ie nisaontsy ama-nevenevetse t’i Efraime

le nonjoneñe e Israele ao,

fe nizoeñe te aman-kakeo

ty amy Baale, vaho nihomake.

2Ie henanekeo, mitolom-pandilatse avao,

nampitranake saren-draha ami’ty volafoti’ iareoo, ty amo hilala’ iareo, toe samposampon-draha,

fitoloña’ ty kante;

anoa’iareo ty hoe: Angao horofa’

o mpanao soroñeo i bania rey.

3Aa le hanahake

ty zono maraindray iereo,

naho i mika am-pangoàñ’andro

mihelañey;

hambañe an-kàfo’e asiotsion-talìo boak’an-toe-pifofohañe eo,

vaho hatoeñe boak’an-toñak’ ao.

4Fa izaho Iehovà Andrianañahare’o

boak’ an-tane’ i Mitsraime añe;

aa le tsy hahafohin-drahare ila’e nahareo naho tsy Izaho;

fa tsy eo ty mpandrombake

naho tsy Izaho avao.

5Napotako an-dratraratra añe irehe,

an-tane kankañe añe.

6Ie nifahanañe le niboboke, toe nianjañe, le nikavokavok’ an-troke,

izay ty nandikofa’ iareo ahy.

7Aa le liona am’ iereo iraho henaneo,

hanampohako hoe farasy añ’olon-dalañeo.

8Hipoke am’iereo iraho hoe dòbe mandala

handrimitse ty saron’arofo’ iareo;

vaho habotseko hoe liona;

ho rimiteko hoe biby hako.

9Ry Israele, mampianto vatan-drehe,

fa amako ty fañolorañ’azo.

10Aia ty mpanjaka’o

handrombak’ azo an-drova’o iaby?

Naho o mpizaka’oo nanoe’o ty hoe :

Añomezo mpanjaka naho roandriañe?

11Tinoloko mpanjaka irehe ami’ty habosehako;

vaho nasintako ami’ty fifomboko.

12Mifamahotse ty tahi’ i Efraime,

mihaja ao o hakeo’eo.

13Hivotrak’ama’e

ty fitsongoan’ ampela;

ie ana-dahy tsy mahilala,

tsy ho nihenekenek’ ambavan-koviñe ao.

14Ho jebañeko ami’ty haozara’

i Tsikeokeokey hao?

ho vilieko aiñe amy Havilasiy?

O Havilasio, aia o angorosi’oo?

O Tsikeokeokeo,

aia o fandrotsaha’oo?1

Mietak’ amo masokoo ty tretre.

15Ndra te ie mibodobodo amo vindao,

ho avy ty tiok’atiñanañe;

hivovo boak’ am-patram-bey ao

ty tio’ Iehovà,

le ho maike i rano’e manganahanay,

ho ritse i loha-rano’e nigoangoañey,

ho haofe’e ty an-driha’e ao

hañakatse ze hene vara’e sarotse.