Ioèle 1

1Ty tsara’ Iehovà niheo am’ Ioèle1 ana’ i Petoele2: 2Janjiño ry androanavio, toloro ravembia

ry hene mpimone’ o taneo,

he t’ie nizoeñe añ’andro’ areo,

ndra tañ’andron-droae’ areo hao? 3Atalilio amo ana’ areoo,

le ampitalilio o ana’ areoo amo ana’ iareoo,

vaho o ana’ iereoo amo tariratse añeo.

4Nabotse’ ty kijeja

ze nenga’ ty marambolo,

nihane’ ty voantane ze nenga i kijeja,

vaho nikapaihe’ ty beañe

ze nenga’ ty lambotane. 5Mitsekafa ry jike le miroveta;

mangololoiha ry mpinon-divaio,

ty amy divai-vao napitsoke

am-palie’ areo. 6Fa nivotrak’ an-taneko atoy ty fòko maozatse, mitozantozañe;

hoe nifen-diona o famotsi’eo,

vazan-diona ra’elahy 7Fa napo’e ho forompotse o vahekoo,

nikorendahe’e ty sakoako;

niholira’e malio naho nahifi’e añe,

le foty iaby o ra’eo. 8Mangoihoia manahake ty somondrara

misikin-gony ty amy valin-katòra’ey. 9Fa naitoañe amy anjomba’ Iehovày

i enga-mahakamay, naho i engan-dranoy;

mandala o mpisoroñe mitoroñe Iehovào. 10Finaoke i tetekey, mitañy ty tane;

finongotse i ampembay;

nimaiheñe i divay vaoy,

kapaike i menakey.

11Mioremeña ry mpihare,

mangololoiha ry mpañalahala vahe,

ty amy ampembay naho i tsakoy;

amy te mikirikintàñe i tetekey. 12Fa maike i vahey,

mongotse i sakoañey;

niforejeje ka i raketay3, i sasaviy,

i takokoy, naho ze hene hatae

an-kivoke ey;

aa le niheatse amo ana’ondatio

ty hafaleañe.

13Midiaña vaho mandalà ry mpisoroñeo;

mangololoiha ry mpitoron-kitrely;

antao hialeñe an-gony ry mpitoron’

Añahareko;

fa napitsok’ amy anjomban’

Añahare’ areoy ty enga-mahakama

naho ty enga rano. 14Añamasiño lilitse,

koiho ty fivory miavake,

atontono o androanavio,

naho ze kila mpimone’ ty tane toy,

mb’ añ’anjomba’ Iehovà

Andrianañahare’ areo,

vaho mitoreova am’ Iehovà. 15Hankàñe ty andro!

fa tondroke ty andro’ Iehovà,

le hoe firotsahañe boak’ amy

El-Sadai ty hivovoa’e. 16Tsy fa naitoañe aolom-

pihaino’ areo hao ty mahakama?

ty haehake naho ty firebehañe boak’

añ’anjomban’Añaharen-tikañe ao? 17Nimomok’ am-bokon-tane ao

ty tabiry, nikapaiheñe o rihao,

nikoromake o kiboho-mahakamao;

fonga niheatse i ampembay. 18Akore ty fañaoloa’ o hareo!

lonjetse o mpirai-tron’añombeo

kanao tsy amam-piandrazañe;

eka, malorè o lia-rain-añondrio. 19Ry Iehovà, ihe ro itoreovako

fa finorototo’ ty afo o fiandrazañe

am-patrambeio;

vaho nampangotomomohe’ i lel’afoy

ze kila hatae an-kivok’ ao. 20Ihe ro isehasehà’

o biby am-patrañeo,

fa maike iaby o sakao,

vaho fa hinotomomo’ i afoy

o fiandrazañe an-dratraratrao.