KUBA PROJECT BIBLE TRANSLATION
Luke 19
Yish baan’i Sakeey
Yish kaying’laan a bol bu Yeliko, kashamaan a buun. Andwoon, ambabaak mwoot a imbet ikun diin diaan Sakeey. Ambaak kum a babwek minaam, kamotsh ambaak ndiy anen. Ambakaswoot ikaam imoons i Yish, ek kamon bwaany bumon mbi, ikaam i twoong a bât imbaak andaan; mbok aku mbè ambaak mwoot ankwiy. Ngwoon, kieenaan mbaang a bos ikaam ibaan a dik di ntey mu sikomool, ikaam ilieen Yish anaph ashaam andaan. Yish antwoolaan a imbet iku, kasheen’laan miish, kalwoosaan Sakeey ane: “Sakeey, kum a shin bwaas, ikaam i mbè ndedi i nyiing aying’l a mbûlaa alwool.”
Ngwoon Sakeey kakumaan a shin bwaas, kanyeyaan i nshaas mubwiik. Bakim amon baan ngwoon, katetsh baan atieen Yish; besatwoot ane: “Mwoot aku anyetwoos abol mwoot ambey!”
Ek Sakeey kayeem’taan a bos bu Kum, kanwoosaan ane: “Kum, wok, ndekayeek ben a ntaan iteny i biket bieem, mbè namaatol phas ibwiik abol mwoot, nekankas iyin phweet iney.”
Yish kanwoosaan ane: “Alwool aku, mwoony mwaying’l a ngat a mbûl aku, ikaam i mbè, i ween u mun ilwootsh i Abalapham. 1Ikaam’i mbè Mwân a Mwoot ayim’s ikaam iswoot bât bambaak badiim.”
Nkwoon mu phas i ngaang ishieeng
(Mataay 25.14-30)
Itaang imbaak bât besawoom’k mwooy maku, Yish kababok’saan nkwoon muku. Ikaam bambaak akol a Yelushaleem, bât bambaphis ane bunyim bu Ntshièm bunaph’dj kasol a itaang intshiin. Yish kabalwoosaan ane: “Mwoot a ben ilwootsh i budiy ambaak esieyeentsh bos a shin iyiek’dj bu itaan ikaam i biemweek bunyim; amwikadj ambis akun. A bos bu mbè el’kieen, amabok ben a ngun baan isheeng mbel, kayeekaan mun mwoot laphas la ngaang lamotsh, kamotsh kabalwoosaan ane: ‘Kel anyeeny bungangaang i phas iku shaang el’miim ikadj.’ Ek bât ba shinaan bambakambim’l, katom baan bât ambisaan ikaam itwoot ane: ‘Katamuk’dj mbè mwoot aku aal nyimiit mbi.’
“Idim i ngwoos kamweek baan bunyim, kiyaan ikadj a shinaan, kabokaan ben a ngun bambaakaan ayeek phas mbel. Ambaak esamuk ayeeph mbè mwoot nkim amon mateem mbadj key i phas ikun. Mwoot a bukoos kiyaan, kanwoosaan ane: ‘Kum, laphas lamotsh lamaween ampieek lamabot iyeekdj ishieeng.’ Kum kanwoosaan ane: ‘Wakel busek,’ ween u mun a ngun ansek; ‘ikaam i mbè umbabaak i ntem musek a biket bikieek, natshikatshik nguph’lanoph a minuung ishieeng.’ Mwoot ampieen kiyaan, kanwoosaan ane: ‘Kum, laphas lamabot iyiek’dj itaan.’ Kum kalwoosaan wey akun ane: ‘Ween, ndatshik nguph’lanoph a minuung mitaan.’
“Iyek’dj kiyaan, kanwoosaan ane: ‘Kum, laphas laa la ngaang lampieek’dween kaalul; nambaak nalakaan a ishaan nalashwey. Nambaak nesawok butet, ikaam i mbè ween u mwoot a ya inoon’l, umwaak untol phas yaaph ween mbè kulwoon’dj, amwaak unkun biket biaaph ween mbè kuwoon’dj.’ Kum kanwoosaan ane: ‘Ween u mun a ngun isoph, ndelaluum’s to mwooy mesatow to muny mwaa! Umbakayeph ane nde mwoot a yay inoon’l, esatol phas yaaph mbè kanalwoon’dj, kamotsh ndesakun biket biaaph mbè kanawoon’dj. Ikaam’i yey umbaak watshik phasieem a ilwoontsh? Ngwoon amwiy miim ikadj, unaph kankas i mateem.’
“Imbet intshiin kalwoosaan bakun bambaak andaan ane: ‘Ntaam’dj anyeeny laphas lakun, buyeek anyeeny wey akun edi ishieeng.’ Kanwoos baan ane: ‘Kum, aan amatamon phas iyiek’dj ishieeng!’ 2Kankal’laan ane: ‘Ndes’bulwoos mbè mwoot aku nkim edi iket, bamwekamweek iyek’dj; ek mwoot aku ankim aaph iket bantakantaam’l aal’k ikieek iyaan i yiin. Ek baphis bieem bambaak abel mbè kandaal’k nyim a baan mbi, yanyeeny i baan ayè, bubadiaak a miish mieem!’”
Yish ayingl i buum a Yelushalem
(Mataay 21.1-11; Maak 11.1-11; Yoon 12.12-19)
Yish amaans’diaan atwoot dweey dikun, ambaak esieyeentsh a bos bu twoong a bât ikaam iphet bos a Yelushaleem. Intaang intwool baan akolakol i Bet’faaj i Betaniy, a Nkwootsh mu Oliiv, katomaan bieentsh baan baphey ane: “Yaakanyeeny a bol bukun bul a bos bwiin. El’bwiin atwool a bol bukun, butokatotaan mwân a mpuund akaan a mwaan, aaph mbè mwoot mbè motsh katshik abaan mbi. Butuung’l, bwinaatsh ayè. Mbè mwoot abuwuul ane, busatuung’l ikaam i yey. Bunkal’l ane, Kum edi nyiingaan.”
Bambaakaan atom kieen baan, bamatotaan mbok mintshiin abalwoos’dj Yish. Ambaak baan basatuung’l mwân a puund, bakumiaan bamabawuul ane: “Busatuung’l ikaam i yey?”
Bamabakal’l ane: “Ikaam’i mbè Kum edi nyiingaan,” iphontshi kalaat baan mwân a mpuund abol Yish; bamaphweedj mindel mibaan a dik di nyam, kabaans baan Yish a dik diaan. Ambaak Yish yesheem, bât bamawaadj mindel mibaan a mbok.
Yish ambaak esikwim to Nkwootsh mu Oliiv, twoong mikim a bieentsh baan bambaak i nshaas, katetsh baan asem’l Ntshièm i dweey dinoon’l ikaam i makam’l makim mamwoony baan. 3Bambaak besatwoot ane: “Ntshièm ashaak’s kum akun amwiy a diin di Kum! Nkit’l mwaal a dik, buum abol Ntshièm el membet ma dik di kaany!”
Baphal’s biek’dj bambaak aphiing a twoong a bât, kalwoos baan Yish ane: “Ntaang’dj,” “lwoos bieentsh baa bashaal phol!”
Yish amabakal’l ane: “Ndes’bushaak’s mbè ane, mbè bashaal phol, mbôk insekansem’l!”
Yish alel ikaam i Yelushalem
Yish antwolaan akol a Yelushalem, amonaan bol, kaleelaan idik di buun, esatwoot ane: “Tshik mbè umbaak wawok, lasu lakun, unaph’dj amon nkit’l mbony! Ek iphontshi, mwooy makun ma mashaal maswaam a miish maa! Ikaam’i mbè matu mel’kiy idik diaa melaal bashaang’dj baa bampik mbaan, bamalèdj lakat, bamadiph a ngat mabieen, bamayim’k biaas bikim kamotsh. Babwokabwoong’l nkimwaa, ween i bân baa, badiakadiaak bakim bel a ngat, kabelalieem’s mbôk mbè motsh yanyeeng a dik di iyiek’dj mbi. Ikaam’i mbè kuyeeph’dj itaang imbaak Ntshièm anyiyaas mbi!”
Yish ayeen a Ntuum
(Mataay 21.12-13; Maak 11.15-19; Yoon 2.13-16)
Yish anyiing’laan a ngat a Ntuum, katetshaan abieeng ben bungangaang, 4amabalwoos ane: “A nkaan mu Ntshièm bamaphuun ane: ‘Mbûlieem ilaal mbûl a malwoom.’ Ek bwiin, bwayiphis indiy i bieem banen!” 5
Yish ambaak anwoong’s matu makim a Ntuum. Bakum ba batwootsh banen, akol bayeeph ba mikieetsh, baan’i bakum i minuung bambaak besaswoot mbok andiaak, ek kabamon mbok andiaak mbi, ikaam i mbè bât bakim bambaak besamwoom’k i lwook labwiik.
Source notes (5)
- Cross-reference Mt 18.10.
- Cross-reference Mt 13.12; Mak 4.25; Lk 8.18.
- Cross-reference Ntm 118.26.
- Cross-reference Yesh 56.7; Yel 7.11.
- Cross-reference Lk 21.37.
KUBA PROJECT BIBLE TRANSLATION. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.