Skip to content
BibleKenya

KUBA PROJECT BIBLE TRANSLATION

Luke 18

Nkwoon mu ngaat a bweel baan’i kom’l ambey

Yish ambaak ababok’s nkwoon muku ikaam i mbè abalak ane bambaak i dweey dilwoom Ntshièm itaang ikim, kabakal’k a mbis mbi. Kabalwoosaan ane: “Ambabaak kom’l a bol ibwek’dj, kambaak es’ditshik a mwooy ma Ntshièm mbi, kamotsh kambaak atshiin mwoot mbè motsh mbi. Ambabaak kamotsh a bol bukun buntshiin ngaat a ngweel ambaak amwinwoos phweet mikim ane: ‘Mbas ikaam i mpisieem aku!’ To kaany aku mikim, kom’l ambaak ambel, ntshiin akun kadilwoosaan ane: ‘Dikwook, ntem mweem kamusatshiin Ntshièm mbi, kamotsh kandesamuk aal i mwoot akolieem mbi, ek mbok aku mbè ngaat aku a ngweel esambok latwoot, ndekakel mbokesaan alwoom, ikaam i mbè kiik kamotsh imbok latwoot mbi!’”

Ngwoon Kum katwootaan kamotsh ane: “Woom’k anyeeny mbok esatwoot kom’l aku ambey. I Ntshièm kakwook’dj atwoos bât bansolaan itaang is’baan alel butu i mwaanye? Akwook’dj aman su ikaam ibayaase? Ndes’bulwoos ane: el’kabatwoos mbaang. Ek, itaang ilikadj Mwân a Mwoot, atokatotaan ben yim’s a shin a maane?”

Nkwoon mu mufal’s baan’i nkweek minaam

Bât bambakayeeph ane tesakel imuk i Ntshièm, bankas abètsh ibiek’dj, Yish kabok’saan nkwoon imweek’dj ane: “Bât baphey kieen baan bos a Ntuum ikaamielwoom Ntshièm: motsh ambaak mufal’s, iyiek’dj ambaak nkweek minaam.

“Mufal’s ambaak ayeem a dik a isek esalwoom Ntshièm ngo: ‘Maye! Ntshièmieem, ndes’kakas lakeeng ikaam i mbè kandaaph muna bât baku bakim bamwaak: bieem, bât babey akol biphaang’t. Ndesakas lakeeng kamotsh ikaam i mbè kandaaph muna nkweek minaam aku mbi. Namwaak nankin biket bidia matu maphey a ndieeng labiing kamotsh ndesayeek iteny imotsh i ishieeng i biket bieem bikim bi miim ibiin.’

“Nkweek minaam kayem’taan kaany, kambaak ayeem’l asheen’l miish a dik mbi, ek ambaak amadibak lo a laang la tol esatwoot ane: ‘Ntshièmieem, mpwook’s mweeng, ikaam i mbè nde mwoot ambey!’ 1Yish kabalwoosaan kamotsh ane: “Ikakaam, Ntshièm amawok’s nkweek minaam mweeng, ikaam ambaak mwoot ansek a miish ma Ntshièm, kakalaan a bol bwaan. Ek Ntshièm kawok’s muphal’s mweeng mbi. Ntshiin akun, mwoot es’diwoot bankukankum’s, ek mwoot es’dikum’s bampekampet’l.”

Yish esashaak’s bân bakieek

(Mataay 19.13-15; Maak 10.13-16)

Bât bambaak bamwiy i bân abol Yish ikaam i mbè abashaak’s. Bieentsh amwoony baan ngwoon, katetsh baan abaphaang’s buluung, ek Yish kabokaan bieentsh baan mbel, kabalwoosaan ane: “Lieem’l anyeeny bân bakieek biy a miim! Kabubakiny’k mbi, ikaam i mbè bunyim bu Ntshièm bu bu bât besaphwaans’i bân bakieek. Ikakaam, ndes’bulwoos mbè, mwoot esabel mbok anyey buum bu Ntshièm muna mwân ankieek, kelaying’l mbi.”

Ndiy a ilanuung

(Mataay 19.16-30; Maak 10.17-31)

Motsh a ndieeng a bakum ba Yudey kawuulaan Yish ane: “Ntaang’dj ansek, nakwok’dj akel mbony ikaam imon mwoony mu yoyoo?”

Yish kankal’laan ane: “Usambok mbel ane, mwoot ansek ikaam i yey?” “Kwa mwoot ansek mbè motsh a shin itaang mbi, Ntshièm anamieet ntshaan mwoot ansek. 2Usayeeph mikieetsh mi Ntshièm miku: ‘Kukwook’dj akel buphaang’t mbi, kukwook’dj adiaak mwoot, kukwook’dj asheen, kukwook’dj abaang’s mwânyo, utshiin ishô baan’i nyo.’”

Mwoot kankal’laan ane: “Namaatshik mikieetsh a ikelel to bulieeng bweem.” Yish awok’diaan ngwoon, kanwoosaan ane: “Wanyeen dweey dimotsh kamotsh: kaph biket bikim bi ween i biin, ukaph’s ben a ntaan, ntshiin mbè ukaal’i ikaph inen a dik; ambis akun, ya windeph.” Ek mwoot amwookaan mwooy maku, kawokaan buphol, ikaam i mbè ambaak ndiy anen.

Yish amonaan mbè awok buphol, katwootaan ane: “Bi ngon ikaam i mbè bât bedi budiy baying’l a bunyim bu Ntshièm! Ek bi bwool ikaam i nyam anen mun kameel ashaam a diish ndwoong a ntshwey mu ndiy aying’l a bunyim bu Ntshièm.”

Bât bambaak amwoom’k kamuul baan ane: “Ek iphontshi, nyeeny akwook’dj aphaan?” Yish kabakal’laan ane: “Dweey di bunoon’l a miish ma bât, di bwool a miish ma Ntshièm.”

Petelo kanwoosaan ane: “Wom’k, talieem’l bikim bimbaak biit i biin ikaam ilaph.”

Yish kankal’laan ane: “Ikakaam,” “ndes’bulwoos dweey dikwook mbè mwoot aku nkim anieem’l mbûlaan, mwam’shaan, babinaan, bapheeng baan, babotsh baan aal’k bân baan ikaam i bunyim bu Ntshièm ekaal’i biket bibwiik to lwool aku, kamotsh a matu mesiyi, ekaal’i mwoony mu yoyoo.”

Yish esatwoot phweet anset idik di iwa yaan

(Mataay 20.17-19; Maak 10.32-34)

Yish kabokaan bieentsh baan ishieeng baphey mbel a yik’l, kabalwoosaan ane: “Woom’k anyeeny! Telaphet bos a Yelushaleem, ntshiin imbet yilayeem’l mwooy makim maphuun’dj bangaang ba ntshièm idik di Mwân a Mwoot. Baniekanieem’l a mio mi bât babey, bansèkansèy, bantwokantwoon mishiing, kamotsh bantukantuuny masony. Bambokambol kodj kamotsh bandiakandiaak. Lasu lanseet abukabuum to iwa.”

Ek bieentsh kabawok dweey mbè dimotsh mbi; kabawok mbok ambaak atwoot nkwoon mukun mbi, kabayeeph mbè ane Yish esatwoot dweey key mbi.

Yish esabo mwoot awa miish

(Mataay 20.29-34; Maak 10.46-52)

Yish antwoolaan akol a Yeliko, ambabaak mwoot awa miish ashik a nkol mu mbok, asalwoom bât biket. Amwokaan ntshey a bât isiesheem, kawuulaan ane: “Dweey key dinkeph’t?”

Kanwoos baan ane: “Yish mun a Nasaleet es’kieshaam.”

Kabolaan nwool ane: “Yish! Mwân abol Davidj, mpwok’s mweeng!”

Ba bambaak a bos kaphaang’s baan buluung ikaam i mbè ashaal phol. Ek kakasaan abol nwool munoon’l ane: “Mwân abol Davidj, mpwok’s mweeng!”

Ngwoon Yish kayeem’taan, kabatomaan ikaam i mbè binaatsh. Ansèm’s mun a miish mawa akolaan, Yish kamuulaan ane: “Usamuk mbè ane nakes yeye?” Kankal’laan ane.

“Kum,” “Kel mbok a mbè ane namon.”

Yish kanwoosaan ane: “Tieeng’l miish! Yim’siaa yaphaans.” Itaang intshiin, miish maan katieeng’l maan, kamotsh kalaphaan Yish yiesèm’l Ntshièm. Twoong mikim amoniin ngwoon, iyin katetshiin asem’l Ntshièm.

Source notes (2)
  1. Cross-reference Mt 23.12; Lk 14.11.
  2. Cross-reference Eks 20.12-16; Dtn 5.16-20.

KUBA PROJECT BIBLE TRANSLATION. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.