KUBA PROJECT BIBLE TRANSLATION
Luke 17
Ilwoong i Yish idik di bikelel bibey i mweeng
(Mataay 18.6-7; 21.22; Maak 9.42)
Yish kalwoosaan bieentsh baan ane: “Ekaal mwooy mesatshitsh mwoot ikaami mbè akel bweph. Ek maphetsh maal abol mwoot esaswoot mbè ibiek’dj bakel bweph! Bi busek mbè; bamankaan mbôk minen a ikool’l, baneph mbok a ntshal aneph’t ikaam i mbè kaal’k itwoom’t i motsh a ndieeng a bân bakieek bakun mbi. 1Buyeeph anyeeny mbok dibak!
“Mbè mwânyo aal’k pheengaa akel bweph, mweek ilwoong. Mbè akal’l ikeleliaan ibey, umwok’s mweeng. Mbè akes bweph phweet shaam’l a lasu lantshiin, kamotsh mbè yikadj phweet mikim amwilwoos ane: ‘Nakal’l bikelel bieem,’ ween umwok’s mweeng.”
Ilwoong idik di yim’s
Batom kalwoos baan Kum ane: “Phet’l yim’siit.”
Kum kabakal’laan ane: “Mbè bwaal i yim’s ikieek muna lashaang la mutaal, bunaph kalwoos ntey munen mu fiink muku ane: ‘Diphuun’l, yaak wediwoon a idiph!’ Mumabuwoom’k.
Dweey dikel di mun ngun mu Ntshièm
“Mbè biaal mbè ane, motsh a ndieengiin edi mun a ngun esabuun’l shin, ambak twoong a nyamiaa. Itaang esaan ikadj to ngwoon, ukwook’dj anwoos ane ya bwaas wishim’k a meense ikaam idia? Kabiangwoos mbi, aan anwokanwoos ane: ‘Ndaam’s biket bidia, kamotsh, sek’s mindel ikaam i mbè umpieek bi bidia, itaang is’miin adia, nanyo; ambis akun, udiakadia, unyo iween a phweetaa.’ Akwook’dj akas lakeeng abol nso akun ikaam awom’k mikieetsh miaane? I bwiin kamotsh bu mbok mintshiin; el’bwiin akel bikim bil’miim butom, twoot anyeeny ane: ‘Te basow ba bukal; tamaakel ngun mwiit.’”
Yish esabo ben a badj ishieeng
Yish ambaak esieyeentsh bos a Yelushalem, kashamaan a phaang minel mi Samaliy baan’i Ngaleel. Amwing’laan a bol ibweek’dj, ben a bwaal bu badj ishieeng kiy baan imoonsiaan. Kayeem’t baan a kaany kamotsh katetsh baan abok mbel angon ane: “Yish! Ntaang’dj! Tawok’s mweeng!” 2
Ama aan bamon, kabalwoosaan ane: “Yaakanyeeny abol batwootsh ba Ntshièm.”
Itaang imbaak baan bienyeentsh, kawook baan busek. Motsh a ndieeng a baan amonaan ane awok busek, kiyaan ikadj a esasem’l Ntshièm i dweey dinoon’l. Kadibokaan a mateem ma Yish, bos aphum’l a shin, esankas lakeeng. Mwoot akun ambaak mun’a Samaliy. Yish kamuulaan ane: “Bakun bakim ishieeng kabawok’dj buseke; ibiek’dj bamotsh diph bakwey? Kway ibiek’dj bamotsh bamwikas lakeeng abol Ntshièm, atey mweentshambaang aku?” A mbis akun Yish kanwoosaan ane: “Kat a shin yaak, yim’siaa yaphaans.”
Mpwiidj a bunyim bu Ntshièm
(Mataay 24.23-28; 24.37-41)
Baphal’s kawuul baan Yish ane, bunyim bu Ntshièm buliy itaang key? Aan kabakal’laan ane: “Bunyim bu Ntshièm kabuliy muna iket isamon bât i miish mbi. Kabel atwoot ane: ‘Lieen anyeeny el ayè’ aal’k: ‘Ela yeenaa,’ ikaam i mbè, yeephanyeeny ane, bunyim bu Ntshièm bul a ndieengiin.”
A mbis akun, Yish kalwoosaan bieentsh baan ane: “Matu mel’kiy mel’bwiin awok nyiing amon lasu lamotsh la Mwân a Mwoot, ek kabul amon mbi. Bât bel’bulwoos ane: ‘El ayenaa!’ Aal’k ane: ‘El ayè!’ Ek kabween’k mbi, kabween’k mbaang ambis a bât baku mbi. Mbok mintshiin angaam’k ntshetsh a dik, angaam’s to mbwoom baan’i mbwoom, ntshiin mbok elaal Mwân a Mwoot a lasu laan. Ek bi busek mbè amanamon maphetsh mabwiik kamotsh bamambiim’l a bol bât ba nkil muku. 3Mwooy makephetsh’dj a itaang ibol Now mekakeph’t mbok mintshiin a matu ma Mwân a Mwoot. 4Bât bambaak adia, banyo, bantweem baat, bantom bân ba baan a malaatsh shaang lasu lambaak Now aying’l a bwaat: mbul a nwiim kanowaan, ngus kadiaak muun bât bakim. 5Bimbaak mbok mintshiin a itaang i Loot. Bât bambaak adia, banyo, banswoom kamotsh bankaph, bambieetsh, bamwoon kamotsh bampik mambûl. Ek, lasu latwoodj Loot a Sodoom, katey baan’i mbôk i tey kanow biin to dik muna mbul, kadiabiin bât bakim. Bil’kakeph’t mbok mintshiin a lasu lel dilak Mwân a Mwoot. 6
“A lasu lakun, mwoot akun elaal a dik di mbûl kamotsh edi biket biaan a ngat a mbûl, kakum’k ikaam yebiswoot mbi! Mbok mintshiin, mwoot elaal a ngwoonaan, kelamon mbok akal a mbûlaan mbi. 7Buyiph’lanyeeny mwaam’s abol Loot! 8Mwoot akun elaswoot mbok aphaans mwoony mwaan el’kamudiim’s; ek mwoot akun eladiim’s mwoony mwaan el’kamuphaans. Ndes’kabulwoos, a butu bukun, bât baphey belaal a ilak intshiin: batokatol motsh banieem’l iyek’dj. Baat baphey belaal a idiing besatow shaang: batokatol motsh banieem’l iyeek’dj. Baluung baphey belaal a ngwoon: batokatol motsh banieem’l iyeek’dj.”
Bieentsh kawuul baan Yish ane: “Kum, bilakeph’t kakwey?”
Yish kabakal’laan ane: “A imbet ikun ilaal ndju, ntshiin imbet ilakwoom’k mayophaang.”
Source notes (8)
- Cross-reference Mt 18.15.
- Cross-reference Lew 14.1-32.
- Cross-reference Matt 6.5-8.
- Cross-reference Matt 7.6-24.
- Cross-reference Matt 18.20—19.25.
- Cross-reference Mt 24.17-18; Mak 13.15-16.
- Cross-reference Matt 19.26.
- Cross-reference Mt 10.39; 16.25; Mak 8.35; Lk 9.24; Yn 12.25.
KUBA PROJECT BIBLE TRANSLATION. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.