जीवन को वचन
लैव्यव्यवस्था 9
हारून द्वारा बलिदान
आठवों दिन मूसा न हारून अऊर ओको टुरावों ख अऊर इस्राएली बुजूर्गों ख बुलाय क कह्यो। “पापबलि लायी एक निर्दोष बछड़ा, अऊर होमबलि लायी एक निर्दोष मेंढा लाय क परमेश्वर को सामने भेंट चढ़ाव। अऊर इस्राएलियों सी यो कह्य, ‘तुम पापबलि लायी एक बकरा, अऊर होमबलि लायी एक बछड़ा अऊर एक मेंढी को बच्चा लावो, जो एक साल को हो अऊर पूर्ण स्वस्थ हो,’ अऊर मेल-मिलाप बलि लायी परमेश्वर को सामने चढ़ावन लायी एक बईल अऊर एक मेंढा, अऊर तेल सी सान्यो हुयो मैदा को एक अनाज भेंट भी लावो; कहालीकि अज परमेश्वर तुम्ख दर्शन देयेंन।”
अऊर जो-जो चिज की आज्ञा मूसा न दी उन सब ख हि मिलाप वालो तम्बू को आगु लाये; अऊर पूरी मण्डली जवर जाय क परमेश्वर को सामने खड़ी भयी। तब मूसा न कह्यो, “यो ऊ काम आय जेक करन लायी परमेश्वर न आज्ञा दी हय कि तुम ओख करो; अऊर परमेश्वर की महिमा तुम ख दिखायी पड़ेंन।” तब मूसा न हारून सी कह्यो, “परमेश्वर की आज्ञा को अनुसार वेदी को जवर जाय क अपनो पापबलि अऊर होमबलि ख चढ़ाय क अपनो अऊर सब जनता को पाप ख झाके करो अऊर जनता को चढ़ावा ख भी चढ़ाय क ओको पाप ख झाके।”
येकोलायी हारून न वेदी को जवर जाय क अपनो पापबलि को बछड़ा ख बलिदान करयो। अऊर हारून को टुरा खून ख ओको जवर ले गयो, तब ओन अपनो बोट ख खून म डुबाय क वेदी को सींगो पर खून ख लगायो, अऊर बच्यो खून ख वेदी को पाया पर कुड़ाय दियो; अऊर पापबलि म की चरबी अऊर गुड़दा अऊर कलेजा पर की झिल्ली ख ओन वेदी पर जलायो, जसो परमेश्वर न मूसा ख आज्ञा दी होती। अऊर मांस अऊर खाल ख ओन छावनी सी बाहेर आगी म जलायो।
तब होमबलिपशु ख भेंट चढ़ायो; अऊर हारून को टुरावों न खून ख ओको हाथ म दियो, अऊर ओन ओख वेदी पर चारयी तरफ छिड़क दियो। तब उन्न होमबलिपशु को तुकड़ा अऊर मुंड सहित ओको हाथ म दियो अऊर ओन ओख वेदी पर जलाय दियो। अऊर ओन अतड़ियों अऊर पाय ख धोय क वेदी पर होमबलि को ऊपर जलायो।
तब हारून न लोगों को चढ़ावा ख आगु लाय क अऊर ऊ पापबलि को बकरा जो लोगों लायी होतो ले क ओकी बलि चढ़ायो, अऊर पहिले को जसो ओख भी पापबलि कर क् चढ़ायो। अऊर ओन होमबलि ख भी जवर लिजाय क विधि को अनुसार चढ़ायो। अऊर अनाज भेंट ख भी जवर लिजाय क ओको म सी मुट्ठी भर वेदी पर जलायो, यो सुबेरे को होमबलि को सहित चढ़ायो गयो। बईल अऊर मेंढा, मतलब जो मेल-मिलाप बलि पशु, जनता लायी होतो हि भी बलि करयो गयो; अऊर हारून को टुरावों न खून ख उन्को हाथ म दियो,अऊर ओन ओख वेदी पर चारयी तरफ छिड़क दियो; अऊर उन्न बईल की चरबी ख, अऊर मेंढा म सी चरबीदार पूछ ख, अऊर जो चरबी सी अंतड़ियां झकी रह्य हय ओख, अऊर गुड़दावो सहित कलेजा पर की झिल्ली ख भी ओको हाथ म दियो; अऊर उन्न चरबी ख जनावरों की छातियों पर रख्यो; अऊर ओन वा चरबी वेदी पर जलायी, पर छातियों अऊर दायो जांघ ख हारून न मूसा की आज्ञा को अनुसार हिलावन की भेंट लायी परमेश्वर को सामने हिलायो।
तब हारून न लोगों को तरफ हाथ बढ़ाय क उन्ख आशीर्वाद दियो; अऊर पापबलि, होमबलि, अऊर मेल-मिलाप बलियों ख चढ़ाय क ऊ खल्लो उतर गयो। तब मूसा अऊर हारून मिलाप वालो तम्बू म गयो, अऊर बाहेर निकल क लोगों ख आशीर्वाद दियो; तब परमेश्वर को महिमा पूरी जनता ख दिखायी दियो। अऊर परमेश्वर को सामने सी आगी निकली अऊर चरबी सहित होमबलि ख वेदी पर भस्म कर दियो; येख देख क जनता न जय जयकार को नारा लगायो अऊर अपनो अपनो मुंह को बल गिर क दण्डवत प्रनाम करयो।
जीवन को वचन. Copyright © 2020-2025 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.