लैव्यव्यवस्था 10

नादाब अऊर अबीहू को पाप

1तब नादाब अऊर अबीहू नाम को हारून को दोय टुरावों न अपनो अपनो धूपदान लियो, अऊर उन म आगी भरी, अऊर ओको म धूप डाल क वा ऊपरी आगी ख जेकी आज्ञा परमेश्वर न नहीं दी होती परमेश्वर को सामने चढ़ायो। 2तब परमेश्वर को सामने सी आगी निकली, अऊर उन दोयी ख भस्म कर दियो, अऊर हि परमेश्वर को सामने मर गयो। 3तब मूसा न हारून सी कह्यो, “या वाच बात आय जेक परमेश्वर न कह्यो होतो कि जो मोरो जवर आयेंन, जरूरी हय कि ऊ मोख पवित्र जाने, अऊर पूरी जनता को सामने मोरी महिमा करे।” पर हारून चुप रह्यो।

4तब मूसा न मीशाएल अऊर एलसाफान ख जो हारून को काका उज्जीएल को टुरा होतो बुलाय क कह्यो, “जवर आवो, अऊर अपनो भतीजों ख पवित्र जागा को सामने सी उठ क छावनी को बाहेर ले जावो।” 5मूसा की या आज्ञा को अनुसार हि जवर जाय क उन्ख अंगरखा सहित उठाय क छावनी को बाहेर गयो।

6तब मूसा न हारून सी अऊर ओको टुरा एलीआजार अऊर ईतामार सी कह्यो, “तुम लोग अपनो मुंड को बाल मत बिखरावो, अऊर नहीं अपनो कपड़ावों ख फाड़ो, असो नहीं होय कि तुम भी मर जावो, अऊर पूरी मण्डली पर ओको गुस्सा भड़क उठेंन; पर ऊ इस्राएल को पूरो घराना को लोग जो तुम्हरो भाऊबन्धु हंय परमेश्वर की आगी सी जर गयो ओको पर विलाप करे। 7अऊर तुम लोग मिलाप वालो तम्बू को फाटक को बाहेर मत जाजो, असो नहीं होय कि तुम मर जावो; कहालीकि परमेश्वर को अभिषेक को तेल तुम पर लग्यो हुयो हय।” मूसा को यो वचन को अनुसार उन्न करयो।

याजकों लायी नियम

8तब परमेश्वर न हारून सी कह्यो, 9“जब जब तय यां तोरो टुरा मिलाप वालो तम्बू म आये तब तब तुम म सी कोयी अंगूरीरस यां दारू मत पीवो; कहीं असो नहीं हो कि तुम मर जावो; तुम्हरी पीढ़ी पीढ़ी म या विधि चलती रहे, 10जेकोसी तुम पवित्र अऊर अपवित्र म, अऊर शुद्ध अऊर अशुद्ध म अन्तर कर सको, 11अऊर इस्राएलियों ख उन सब विधियों ख सिखाय सको जेक परमेश्वर न मूसा को द्वारा उन्ख बताय दियो हय।”

12फिर मूसा न हारून सी अऊर ओको टुरा भयो दोयी टुरा ईतामार अऊर एलीआजार सी भी कह्यो, “परमेश्वर को भेंट म सी जो अनाज बलि बच्यो हय ओख ले क वेदी को जवर बिना खमीर को खावो, कहालीकि ऊ परमपवित्र हय; 13अऊर तुम ओख कोयी पवित्र जागा म खावो, ऊ परमेश्वर को भेंट म सी तोरो अऊर तोरो टुरावों को हक हय; कहालीकि मय न असीच आज्ञा पायी हय। 14पर हिलायी हुयी भेंट की छाती अऊर उठायी हुयी भेंट की जांघ ख तुम लोग, मतलब तय अऊर तोरो बेटा-बेटियां सब कोयी शुद्ध जागा म खावो; कहालीकि हि इस्राएलियों को मेल-मिलाप बलियों म सी तोख अऊर तोरो टुरावों को हक ठहराय दियो गयो हय। 15चर्बी को अग्निबलियों समेत जो उठायी हुयी जांघ अऊर हिलायी हुयी छाती परमेश्वर को सामने हिलावन लायी आयो करेंन, यो हिस्सा परमेश्वर की आज्ञा को अनुसार हमेशा की विधि की व्यवस्था सी तोरो अऊर तोरो बच्चां लायी हय।”

16फिर मूसा न पापबलि को बकरा की जांच-पड़ताल करी, त का पायो कि ऊ जलायो गयो हय, येकोलायी एलीआजार अऊर ईतामार जो हारून को टुरा बच्यो होतो उन्कोसी ऊ गुस्सा म आय क कहन लग्यो, 17“पापबलि जो परमपवित्र हय अऊर जेक परमेश्वर न तुम्ख येकोलायी दियो हय कि तुम मण्डली को पाप को बोझ अपनो ऊपर उठाय क ओको लायी परमेश्वर को सामने पश्चाताप करो, तुम न ओको मांस पवित्र जागा म कहाली नहीं खायो? 18देखो, ओको खून भी पवित्र जागा को अन्दर म नहीं लायो गयो होतो, तुम्ख ओख पवित्र जागा म खानो होतो; जसो मय न आज्ञा दियो होतो।” 191

येको उत्तर हारून न मूसा ख यो तरह सी दियो, “देख, अजच उन्न अपनो पापबलि अऊर होमबलि ख परमेश्वर को सामने चढ़ायो; फिर भी मोरो पर असी विपत्तियां आय पड़ी हय! येकोलायी यदि मय अज पापबलि को मांस खातो त का या बात परमेश्वर को सामने अच्छी होती?” 20जब मूसा न यो सुन्यो तब ओख अच्छो लग्यो।