Skip to content
BibleKenya

MUNGA TRANSLATION PROJECT

Matta 2

Bǝ Wuo Ya Ibǝnung Lo Vin Gwɔpi Lǝ

Kwɔ i si Yeso Baitalami dang Yahudiya lona lǝkwɔ Hiridus lǝ yigwoi, ya ibǝnung lo vin ǝrr gwɔpi wuo Urshalima wui ɓib angǝ, << Yui kwɔ i siu angǝ u ǝǝ lǝ yigwoi ya Yahudawa kwɔ ɓǝla? Ɓi ɓyǝa vin gu pilǝ ɓi wuo bǝ wab bu.>>

Kwɔ yigwoi Hiridus lǝ nungkwɔni kiggǝu ǝrr, i ya Urshalima ǝndǝi. U lubǝ yayuu ǝndǝi yakku ya nyǝknung i ya nanatthǝnung Musa, u ɓibǝi angǝ i si Kristi tthǝn pǝttǝnna?>> I gwab nwa angǝ<< Baitalami dang Yahudiya lǝ, Bakwɔ ǝn nungkwɔ ya gei ba a tthasi vullǝ ɓǝ:

<< <Kwoi mǝ, Baitalami, losua Yahudiya, mǝ lǝ a tuab dang losua Yahudiya lǝu; dang ɓǝ ɓa tǝi yigwoi kwɔ a gagci yayuum Israila ɓǝ.> >> Nungkwɔ Hiridus lubǝ ya ibǝnung lo vin lǝ lǝbǝ pya u ɓibǝi lona kwɔ vin ɓǝ i tthǝɓǝ. U tummi Baitalami u gei angǝ,<<Ɓatǝ tǝɓa ɗubǝ yui ɓǝ i kiggǝ. Nǝ ɓa tǝiu, ɓa geimthǝ, yangbǝ ǝntǝ tǝn wabbu langɓǝ.>>

I lǝ nungkwɔ yigwoi ɓǝ geiɓǝ, i pa nung gi, vin ɓǝkwɔ i ɓyǝa pilǝ na tǝ loilǝ tǝ dǝi bǝikwɔ yui ɓǝ tthǝɓǝ. Kwɔ i ɓyǝa vin ɓǝ, tthǝi la ǝndǝi! Kwɔ i wuo dang gwoi ɓǝ, i ɓyǝa yui ɓǝ i Naa gu Maryamu, i bai nwalongǝi sua i wabu. I ɓau Bithal gi i gummu nungkurɓǝ a yummi i zinariya, i luban i mur. Natthǝ Fuh gub ɗogsui dang muani angǝ bǝ i kwoi i tǝ sua Hiridus thǝ, i kwoi i tǝ losua gi nunglǝi akun.

Bo Dum Tǝlǝ Masar

Kwɔ ya ibǝnung lo vin ɓǝ pa ǝndǝi, ya nwatummi gi Dangbang fug tthǝ Yusufu dang muani geiu angǝ.<<Hiridus a ɗubǝ yuiɓǝ yangbǝ thǝu. Manungkwɔni yang a ǝrr, a lǝi yui ɓǝ i naa gu ɓasur ɓatǝ Masar, a ǝǝ bǝilǝ nǝ ǝn gei a yitthǝ bǝiɓǝ ɗǝ.>>

Yusufu ǝrr, lǝi yui ɓǝ i naa gu, nungvii lǝ i pa nunglǝi Masar u ǝǝ bǝilǝ tǝlǝ vii kwɔ Hiridus ɓuilǝ tthǝɓǝ. I to nungkwɔ ni yangbǝ nungkwɔ Dangbang gei nwa ya gei ba a tthasi kwɔ ǝǝlǝ ba a langǝ i, <<Ən lubǝ Yuim ǝn ilǝ dang Masar.>>

Bǝ Thǝb Yathang

Kwɔ Hiridus ibǝi angǝ ya yol kwɔ ǝrr gwɔpi kwɔ ɗam nwuǝing, u ɓanglǝ dang wa ghaatthǝ, U dǝba angǝ i thǝb yathang a yiɓǝi dang Baitalami ǝndǝi i yakwɔ tthangtha i ilǝ ɓǝ yakwɔ tthai rab kwoilǝ sua ɓǝ, natha i lona kwɔ u lǝ nwa ya ibǝnung lo vin ɓǝ.

Manungkwɔni nungkwɔ ya gei ba tthasi Irmiya gei kwɔ ǝǝlǝ ba a langǝ ing:

<<I lǝ yol sui yuu akun Ramah,

yol sui tthǝzii,

Rahila dǝna tasui lǝ ba yathang gu;

dǝnnu labǝ yambǝi,

i ɓumɓui ǝndǝi.>>

Bǝ kwoi Gi Masar Itǝ Nazarat

Tthasua bǝ ɓuiɓua gi Hiridus, ya nwatummi gi Dangbang fug tthǝ Yusufu dang muani kwɔ yirrǝ u Masar ɓǝ. U geiu angǝ,<<A ǝrr, a lǝi yui ɓǝ i naa gu ɓatǝ losua Israila, bakwɔ yakwɔ dǝna yiɗi bǝ thǝb yui ɓǝkwɔ i ɓui ǝndǝing.>> Nungkwɔ Yusufu ǝrr, lǝi yui ɓǝ i naa gu, i kwoi itǝ losua Israila.

Kwoi kwɔ Yusufu lǝ angǝ Arkilayus lǝ yigwoi u lǝi bǝ dǝi gi daa gu Hiridus losua Yahudiya, tthǝu sur vulli bǝtǝ bǝ ǝǝ bǝilǝ. Langkwoi ya nwatummi gi Fuh gub ɗuogsuiu dang muani, u kwoi tǝu ǝǝ Galili. Yusufu tǝ ǝǝ dang gwoi angǝ a Nazarat lǝ, langkwoi nungkwɔ ya gei ba a tthasi gei kwɔ ǝǝlǝ ba a langǝ i: <<I luu ɗuǝnu angǝ ya Nazarat.>>

MUNGA TRANSLATION PROJECT. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.