Skip to content
BibleKenya

MUNGA TRANSLATION PROJECT

Matta 3

Bǝ Nanatthǝnung Gi Yohanna Ya Wollmung

(Markus 1:1-8; Luka 3:1-18; Yohanna 1:19-28)

Lona lǝ kullo Yohanna ya wollmung wuo dǝna gei ba yui Fuh losua a kwi Yahudiya. Dǝnnu gei angǝ, <<Ɓa mǝrrǝm ɓa yitthǝ nung a ɓko ɓǝ,>>bakwɔ lona gbagǝng kwɔ Fuh wa nwong yayuu gu ɓǝ!>> Yohanna lǝ yuu akwɔ Ishaya ya gei ba a tthasi dǝna gei bagu ɓǝ kwɔ u gei angǝ,

<<Yol yuu akun dǝna buogbǝi dang gug angǝ,

<Mablǝi lǝ Dangbang tthǝ;

mabbu lǝitthǝ juantthǝ yangbǝ u thkotthǝ!>>>

I mab nunglitthǝ gi Yohanna i zuǝ Jurobǝ; u tthǝ i nung tthǝbtthǝ a zuǝ luiu, langkwoi nungtang gu ǝn mangkari i sɔng dang gug. Yayuu ǝrr Urshalima, i losua Yahudiya, i sua losua kwɔ gbag dual Urdun ɓǝ tǝsuo. Dǝi gei nwa nung a ɓko gi, langkwoi u wollimung ɗiggǝ nung a ɓko dang dual Urdun.

Kwɔ Yohanna ɓyǝa ya Farisiyawa i ya Sadukiyawa kpaatthǝ dǝna wɔ suo yangbǝ wuu wollimung, u gei angǝ, <<Ɓǝ ya ɗambǝi i Nagilǝ Yi gub ɗuogsui ɓǝ angǝ ɓa sur ɓua kwɔ dǝna wɔ ɓa? Ɓato i nung to kwɔ a mǝrrǝm dang wa a ɓkoɓǝ ɓǝ. Langkwoi bǝ ɓa nghǝm ɓangǝ ɓa i dang bǝ ɗablua bǝi dǝɓa gei ɓangǝ, Ibrahim lǝ daa ɓithǝ. Ən gei ɓǝtthǝ dang tal kwɔ Fuh a ǝrr lǝ yathang lǝ Ibrahim tthǝ. Zom gi Fuh osi tǝtthǝ yǝng kabbǝng, kab kwɔ ǝndǝi si sikab a langǝ i lǝu yang i ɓǝrr i walǝtǝ dang lua a ɗing. <<Ən wollɓǝ mung i mungki yangbǝ mǝrrǝm lǝ bǝ yitthǝ nung a ɓkoɓǝ. Kwoi tthasuam yuu akun dǝna wɔ u nyim u pǝllǝm, kwɔ ǝko gu ǝn ɓuan ǝn lǝiu. U wollɓǝ mung i Ɓyang a Langǝ i i lua. Nung yǝlnung gu nko lǝ, u kai bǝ pǝmnung gu, u gǝm min dang bi langkwoi u li wong i lua a ɗing.>>

Yohanna Wollmung Lǝ Yeso

(Markus 1:9-11; Luka 3:21,22)

Lona lǝ kullo Yeso yitthǝ Galili wuo Urdun yangbǝ Yohanna wollǝu mung Kwoi Yohanna dǝna yiɗi bǝ lko angǝ,<<Mǝma wollǝm mung, baɓǝ bǝ dǝmma wɔ suamma?>>

Yeso geiu angǝ,<<Lakwɔ nikwɔ a gwab ɓi to nung a langǝ i kwɔ Fuh dǝna yiɗi ɓi to ɓǝ.>> Nungkwɔ Yohanna gwabbu tthǝ.

Dangtthǝ kwɔ Yohanna wollmung lǝ Yeso ni, u i dang munglǝ. Bǝilǝ kulo wayi ǝrr ɓko, u ɓyǝa Ɓyang gi Fuh dǝna pin mǝngǝn Gko i lua tthǝu lǝ. Langkwoi yol wayi dǝna gei angǝ,<<Yuu kwɔ ǝn Yuim kwɔ dǝm yiɗi ɓǝ, dǝm lǝ tthǝla gu.>>

MUNGA TRANSLATION PROJECT. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.