Biblica® Open Lao Contemporary Version
ເຊກາຣີຢາ 3
ເຄື່ອງແຕ່ງກາຍສະອາດສຳລັບມະຫາປະໂລຫິດ
ແລ້ວເທວະດາອົງນັ້ນໄດ້ສະແດງໃຫ້ຂ້າພະເຈົ້າເຫັນມະຫາປະໂລຫິດໂຢຊວຍ1 ຢືນຢູ່ຕໍ່ໜ້າເທວະດາຂອງພຣະເຈົ້າຢາເວ, ແລະ ຊາຕານ2 ຢືນຢູ່ຂວາມືຂອງເພິ່ນເພື່ອກ່າວຫາເພິ່ນ. ພຣະເຈົ້າຢາເວໄດ້ກ່າວກັບຊາຕານວ່າ, “ຊາຕານ! ພຣະເຈົ້າຢາເວຕຳນິເຈົ້າ, ພຣະເຈົ້າຢາເວຜູ້ເລືອກເຢຣູຊາເລັມຕຳນິເຈົ້າ! ຊາຍຜູ້ນີ້ເປັນດົ້ນຟືນຕິດໄຟທີ່ຖືກດຶງອອກຈາກໄຟບໍ່ແມ່ນບໍ?”
ບັດນີ້ໂຢຊວຍນຸ່ງເສື້ອຜ້າເປີເປື້ອນຢືນຢູ່ຕໍ່ໜ້າເທວະດາອົງນັ້ນ. ເທວະດານັ້ນກ່າວແກ່ບັນດາຜູ້ຢືນຢູ່ຕໍ່ໜ້າເພິ່ນວ່າ, “ຈົ່ງແກ້ເສື້ອຜ້າເປີເປື້ອນຂອງເພິ່ນອອກ”.
ຈາກນັ້ນກ່າວກັບໂຢຊວຍວ່າ, “ຈົ່ງເບິ່ງ, ເຮົາໄດ້ຍົກບາບຂອງເຈົ້າອອກໄປແລ້ວ, ແລະ ເຮົາຈະໃຫ້ເຈົ້ານຸ່ງເຄື່ອງງົດງາມ”.
ຂ້າພະເຈົ້າຈຶ່ງກ່າວວ່າ, “ຈົ່ງເອົາຜ້າປົກຫົວທີ່ສະອາດມາປົກໃຫ້ເພິ່ນ”. ແລ້ວພວກເຂົາກໍປົກຫົວໂຢຊວຍດ້ວຍຜ້າສະອາດ ແລະ ນຸ່ງເຄື່ອງໃຫ້ເພິ່ນ, ໃນຂະນະທີ່ເທວະດາຂອງພຣະເຈົ້າຢາເວຢືນຢູ່ໃກ້ໆ.
ເທວະດາຂອງພຣະເຈົ້າຢາເວໄດ້ມອບໜ້າທີແກ່ໂຢຊວຍວ່າ: “ນີ້ແມ່ນສິ່ງທີ່ພຣະເຈົ້າຢາເວຜູ້ມີອຳນາດຍິ່ງໃຫຍ່ຍິ່ງໃຫຍ່ກ່າວວ່າ: ‘ຖ້າເຈົ້າດຳເນີນດ້ວຍການເຊື່ອຟັງເຮົາ ແລະ ຖືຮັກສາກົດບັນຍັດຂອງເຮົາ, ແລ້ວເຈົ້າຈະໄດ້ຮັບຜິດຊອບວິຫານຂອງເຮົາ ລວມທັງເດີ່ນວິຫານຂອງເຮົາ, ເຮົາຈະໃຫ້ເຈົ້າດຳເນີນຢູ່ຕໍ່ໜ້າເຮົາຮ່ວມກັບຄົນເຫລົ່ານີ້ທີ່ຢືນຢູ່ທີ່ນີ້.
“ ‘ຈົ່ງຟັງ, ມະຫາປະໂລຫິດໂຢຊວຍ, ທ່ານ ແລະ ເພື່ອນຮ່ວມງານທີ່ນັ່ງຢູ່ຕໍ່ໜ້າທ່ານ, ພວກທ່ານຜູ້ເປັນຄົນທີ່ເປັນສັນຍະລັກບົ່ງເຖິງສິ່ງທີ່ຈະເກີດຂຶ້ນໃນອະນາຄົດ: ເຮົາຈະນຳຜູ້ຮັບໃຊ້ຂອງເຮົາມາຄື “ກິ່ງ”. ຈົ່ງເບິ່ງ, ສີລາທີ່ເຮົາຕັ້ງໄວ້ຕໍ່ໜ້າໂຢຊວຍ! ສີລາກ້ອນດຽວມີເຈັດຫລ່ຽມ,3 ແລະເຮົາຈະສະຫລັກຄຳຈາລຶກເທິງສີລານັ້ນ,’ ພຣະເຈົ້າຢາເວອົງມີອຳນາດຍິ່ງໃຫຍ່ຍິ່ງໃຫຍ່ກ່າວວ່າ, ‘ແລະເຮົາຈະລຶບບາບຂອງດິນແດນນີ້ພາຍໃນວັນດຽວ.
“ ‘ໃນວັນນັ້ນ ພວກເຈົ້າແຕ່ລະຄົນຈະເຊີນເພື່ອນບ້ານມານັ່ງກ້ອງເຄືອອະງຸ່ນ ແລະ ຕົ້ນໝາກເດື່ອຂອງຕົນ,’ ພຣະເຈົ້າຜູ້ມີອຳນາດຍິ່ງໃຫຍ່ຍິ່ງໃຫຍ່ປະກາດດັ່ງນັ້ນ”.
Source notes (3)
- Footnote ເປັນອີກຮູບໜຶ່ງຂອງ ເຍຊຸອາ ເຊັ່ນດຽວກັບທີ່ອື່ນໆໃນພະທຳເຊກາຣີຢາ
- Footnote ແປວ່າ ຜູ້ກ່າວໂທດ
- Footnote ຫລື ເຈັດຕາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.