Biblica® Open Lao Contemporary Version
ເຊກາຣີຢາ 10
ພຣະເຈົ້າຢາເວຈະເບິ່ງແຍງຢູດາ
ຈົ່ງຂໍຝົນໃນລະດູໃບໄມ້ປົ່ງຈາກພຣະເຈົ້າຢາເວ;
ພຣະເຈົ້າຢາເວນີ້ແຫຼະຄືຜູ້ສົ່ງພະຍຸມາ.
ພຣະອົງໂຜດປະທານສາຍຝົນແກ່ມະນຸດທຸກຄົນ.
ແລະ ພືດພັນທັນຍາຫານແກ່ທຸກຄົນ.
ຮູບເຄົາລົບຕ່າງໆໃຫ້ຄຳຕອບຫລອກລວງ,
ໝໍດູເຫັນນິມິດຈອມປອມ;
ພວກເຂົາເລົ່າຄວາມຝັນຫລອກລວງ
ແລະ ໃຫ້ຄຳປອບໃຈອັນບໍ່ມີປະໂຫຍດ.
ດັ່ງນັ້ນ ປະຊາຊົນຈຶ່ງຫລົງໄປເໝືອນແກະ
ຖືກຂົ່ມເຫັງເພາະບໍ່ມີຜູ້ລ້ຽງ.
“ເຮົາໂກດຮ້າຍບັນດາຄົນລ້ຽງແກະ,
ແລະ ຈະລົງໂທດພວກຜູ້ນຳ;
ເພາະພຣະເຈົ້າຢາເວຜູ້ມີລິດອຳນາດຍິ່ງໃຫຍ່ຈະເບິ່ງແຍງ
ຝູງແກະຂອງພຣະອົງ, ຄືປະຊາຊົນຢູດາ,
ແລະ ເຮັດໃຫ້ພວກເຂົາເປັນເໝືອນມ້າທີ່ອົງອາດໃນສະໜາມຮົບ.
ຫີນເສົາເອກຈະມາຈາກຢູດາ,
ທັງເຂັມໝຸດປັກເຕັນ,
ທະນູສົງຄາມ
ແລະ ຜູ້ປົກຄອງທຸກຄົນ.
ພວກເຂົາ1ຈະຮວມກັນເປັນນັກຮົບໃນສົງຄາມ
ຢຽບຢໍ່າສັດຕູຂອງພວກເຂົາໃຫ້ເປັນດັ່ງຂີ້ຕົມໃນຫົນທາງ.
ພວກເຂົາຈະຕໍ່ສູ້ເພາະພຣະເຈົ້າຢາເວຢູ່ກັບພວກເຂົາ,
ແລະ ພວກເຂົາຈະເຮັດໃຫ້ທະຫານມ້າອັບອາຍ.
“ເຮົາຈະເຮັດໃຫ້ຢູດາເຂັ້ມແຂງຂຶ້ນ
ແລະ ຊ່ວຍເຫລືອເຊື້ອສາຍຂອງໂຢເຊັບ.
ເຮົາຈະສ້າງພວກເຂົາຂຶ້ນໃໝ່
ເພາະເຮົາສົງສານພວກເຂົາ.
ພວກເຂົາຈະເປັນເໝືອນ
ຄົນທີ່ບໍ່ເຄີຍຖືກເຮົາປະຖິ້ມ,
ເພາະເຮົາເປັນພຣະເຈົ້າຢາເວ ພຣະເຈົ້າຂອງພວກເຂົາ
ແລະ ເຮົາຈະຕອບພວກເຂົາ.
ຊາວເອຟຣາອິມຈະເປັນດັ່ງນັກຮົບຍິ່ງໃຫຍ່,
ຈິດໃຈຂອງພວກເຂົາຈະຊື່ນຊົມຍິນດີເໝືອນໄດ້ດື່ມເຫລົ້າອະງຸ່ນ.
ລູກຫລານຂອງພວກເຂົາຈະເຫັນແລ້ວຊື່ນຊົມຍິນດີ;
ຈິດໃຈຂອງພວກເຂົາຈະຊື່ນຊົມຍິນດີໃນພຣະເຈົ້າຢາເວ.
ເຮົາຈະໃຫ້ສັນຍານ
ແລະ ຮວບຮວມພວກເຂົາມາ.
ແນ່ນອນເຮົາຈະໄຖ່ພວກເຂົາ;
ພວກເຂົາຈະມີຈຳນວນຫລວງຫລາຍດັ່ງແຕ່ກ່ອນ.
ເຖິງວ່າເຮົາເຮັດໃຫ້ພວກເຂົາກະຈັດກະຈາຍໄປໃນທ່າມກາງຊົນຊາດຕ່າງໆ,
ແຕ່ໃນແດນໄກພຸ້ນພວກເຂົາຈະລະນຶກເຖິງເຮົາ.
ພວກເຂົາກັບລູກຫລານຈະຢູ່ລອດ,
ແລະ ພວກເຂົາຈະກັບມາ.
ເຮົາຈະພາພວກເຂົາກັບມາຈາກເອຢິບ
ແລະ ຮວບຮວມພວກເຂົາກັບມາຈາກອັດຊີເຣຍ.
ເຮົາຈະນຳພວກເຂົາມາຍັງກີເລອາດ ແລະ ເລບານອນ
ແລະ ຈະບໍ່ມີຫ້ອງພຽງພໍສຳລັບພວກເຂົາ.
ພວກເຂົາຈະຂ້າມທະເລແຫ່ງຄວາມເດືອດຮ້ອນ;
ທະເລອັນປັ່ນປ່ວນຈະຍອມສະຫງົບ
ແລະ ບັນດາບ່ອນເລິກແຫ່ງແມ່ນ້ຳນິນຈະເຫືອດແຫ້ງ.
ຄວາມຍິ່ງອວດອົ່ງຈອງຫອງຂອງອັດຊີເຣຍຈະຖືກປາບລົງ
ແລະ ຄາຖາແຫ່ງເອຢິບຈະສູນສິ້ນໄປ.
ເຮົາຈະເຮັດໃຫ້ພວກເຂົາເຂັ້ມແຂງຂຶ້ນໃນພຣະເຈົ້າຢາເວ
ແລະ ດ້ວຍນາມຊື່ຂອງພຣະອົງພວກເຂົາຈະດຳເນີນຊີວິດຢູ່ຢ່າງປອດໄພ,”
ພຣະເຈົ້າຢາເວປະກາດດັ່ງນັ້ນ.
Source notes (1)
- Footnote ຫລື ພວກເຂົາທັງໝົດຈະຮວມໂຕກັນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.