Biblica® Open Lao Contemporary Version
ເຊກາຣີຢາ 9
ການພິພາກສາສັດຕູຂອງອິດສະຣາເອນ
ຄໍາທໍານວາຍ ມີດັ່ງນີ້:
ຖ້ອຍຄໍາຂອງພຣະເຈົ້າຢາເວ ຕໍ່ສູ້ດິນແດນຮັດຮັກ
ແລະ ດາມັສກັດ
ເພາະຕາຂອງປະຊາຊົນທັງໝົດ
ແລະ ອິດສະຣາເອນທຸກເຜົ່າຈັບຈ້ອງທີ່ພຣະເຈົ້າຢາເວ1
ແລະ ຕໍ່ສູ້ຮາມັດເຊັ່ນກັນ, ທີ່ຢູ່ໃກ້ຊາຍແດນຮັດຮັກ,
ແລະ ຕໍ່ສູ້ຕີເຣ ແລະ ຊີໂດນດ້ວຍ, ເຖິງແມ່ນວ່າພວກເຂົາມີຄວາມຊໍານານຫລາຍ.
ຕີເຣໄດ້ສ້າງປ້ອມປ້ອງກັນເມືອງ;
ສະສົມເງິນໄວ້ຫລວງຫລາຍດັ່ງຂີ້ຝຸ່ນດິນ,
ແລະ ມີຄໍາຫລວງຫລາຍດັ່ງຂີ້ຝຸ່ນຕາມຖະໜົນ,
ແຕ່ອົງພຣະຜູ້ເປັນເຈົ້າຈະປຸ້ນຊັບສົມບັດຂອງເມືອງນັ້ນໄປ
ແລະ ທຳລາຍອຳນາດທາງທະເລຂອງມັນ,
ແລະ ເຜົາຜານມັນດ້ວຍໄຟ.
ອາຊະເກໂລນຈະເຫັນ ແລະ ຢ້ານກົວ.
ກາຊາຈະທໍລະມານດ້ວຍຄວາມເຈັບປວດແສນສາຫັດ,
ເອັກໂຣນກໍເຊັ່ນກັນ, ເພາະຄວາມຫວັງຂອງມັນຮ່ຽວແຫ້ງໄປ.
ກາຊາຈະສູນເສຍກະສັດ
ແລະ ອາສະເກໂລນຈະຖືກຖິ້ມຮ້າງ.
ຄົນຕ່າງຊາດຈະຄອບຄອງອາຊະໂດດ,
ແລະ ເຮົາຈະກຳຈັດຄວາມຍິ່ງອວດອົ່ງຈອງຫອງຂອງຊາວຟີລິດສະຕິນ.
ເຮົາຈະເອົາເລືອດອອກຈາກປາກຂອງພວກເຂົາ,
ແລະ ເອົາອາຫານຕ້ອງຫ້າມອອກຈາກວ່າງແຂ້ວຂອງພວກເຂົາ.
ບັນດາຜູ້ເຫລືອຢູ່ຈະເປັນຂອງພຣະເຈົ້າຂອງພວກເຮົາ
ແລະ ຈະກາຍເປັນຜູ້ນຳໃນຢູດາ,
ແລະ ເອັກໂຣນຈະເປັນດັ່ງຊາວເຢບຸດ.
ແຕ່ເຮົາຈະປົກປ້ອງວິຫານຂອງເຮົາ
ຈາກກອງກຳລັງທີ່ມາປຸ້ນຊິງ.
ຜູ້ກົດຂີ່ຈະບໍ່ມາກົດຂີ່ຂົ່ມເຫັງປະຊາຊົນຂອງເຮົາອີກ,
ເພາະບັດນີ້ເຮົາກຳລັງຈັບຕາເບິ່ງຢູ່.
ການມາຂອງກະສັດຊີໂອນ
ລູກສາວແຫ່ງຊີໂອນ2! ຈົ່ງຊື່ນຊົມຍິນດີຢ່າງເຫລືອລົ້ນ,
ລູກສາວແຫ່ງເຢຣູຊາເລັມ3! ຈົ່ງໂຫ່ຮ້ອງ,
ຈົ່ງເບິ່ງ, ກະສັດຂອງພວກເຈົ້າມາຫາພວກເຈົ້າ,
ຊອບທຳ ແລະ ມີໄຊຊະນະ
ຖ່ອມຕົວ ແລະ ນັ່ງເທິງຫລັງລໍ,
ຂີ່ລູກມ້າ, ຂີ່ລູກລໍ,
ເຮົາຈະກຳຈັດລົດມ້າຈາກເອຟຣາອິມ
ແລະ ມ້າເສິກຈາກເຢຣູຊາເລັມ,
ລູກທະນູໃນການຮົບຈະຖືກຫັກຖິ້ມ.
ພຣະອົງຈະປະກາດສັນຕິພາບແກ່ນານາປະຊາຊາດ.
ການປົກຄອງຂອງພຣະອົງຈະຂະຫຍາຍຈາກທະເລສູ່ທະເລ
ແລະ ຈາກແມ່ນ້ຳຈົນເຖິງສຸດປາຍແຜ່ນດິນໂລກ.4
ສໍາລັບເຈົ້າ, ເພາະເລືອດແຫ່ງພັນທະສັນຍາຂອງເຮົາຢູ່ກັບເຈົ້າ,
ເຮົາຈະປົດປ່ອຍນັກໂທດຂອງເຈົ້າຈາກເຫວເລິກທີ່ບໍ່ມີນ້ຳ.
ນັກໂທດຜູ້ມີຄວາມຫວັງ; ຈົ່ງກັບມາຍັງປ້ອມປະການຂອງເຈົ້າ,
ບັດນີ້ເຮົາປະກາດວ່າເຮົາຈະຟື້ນຟູເຈົ້າຂຶ້ນມາເປັນສອງເທົ່າ.
ເຮົາຈະກົ່ງຢູດາດັ່ງກົ່ງທະນູ
ແລະ ກົ່ງລູກທະນູໃສ່ເອຟຣາອິມໃຫ້ເຕັມ.
ຊີໂອນ, ເຮົາຈະກະຕຸ້ນພວກລູກຂອງເຈົ້າ,
ມາສູ້ກັບພວກລູກຂອງ, ກຣີກ,
ແລະ ເຮັດໃຫ້ພວກເຈົ້າເປັນດັ່ງດາບໃນມືນັກຮົບ.
ພຣະເຈົ້າຢາເວຈະປາກົດ
ແລ້ວພຣະເຈົ້າຢາເວຈະປາກົດເໜືອພວກເຂົາ;
ລູກທະນູຂອງພຣະອົງຈະເປັ່ງປະກາຍດັ່ງຟ້າແມບເຫຼື້ອມ.
ພຣະເຈົ້າຢາເວອົງຜູ້ຄອບຄອງຈະເປົ່າແກ;
ພຣະອົງຈະປາກົດໃນພາຍຸແຫ່ງທິດໃຕ້,
ແລະ ພຣະເຈົ້າຢາເວຜູ້ມີລິດອຳນາດຍິ່ງໃຫຍ່ຈະປົກປ້ອງພວກເຂົາໄວ້.
ພວກເຂົາຈະຖືກທຳລາຍ
ແລະ ຖືກເອົາຊະນະດ້ວຍສະລິງ.
ພວກເຂົາຈະດື່ມ ແລະ ໂຫ່ຮ້ອງເໝືອນດື່ມເຫລົ້າອະງຸ່ນ,
ພວກເຂົາຈະເຕັມລົ້ນດັ່ງຊາມ
ທີ່ໃຊ້ໃນການຖອກເລືອດ5ໃສ່ແຈແທ່ນບູຊາ.
ພຣະເຈົ້າຢາເວ ພຣະເຈົ້າຂອງພວກເຂົາຈະຊ່ວຍຄົນຂອງພຣະອົງໃນວັນນັ້ນ
ດັ່ງຜູ້ລ້ຽງແກະຊ່ວຍແກະຂອງຕົນ.
ພວກເຂົາຈະຮຸ່ງເຮືອງໃນແຜ່ນດິນຂອງພຣະອົງ
ດັ່ງເພັດໃນມົງກຸດ.
ພວກເຂົາຈະງົດງາມ ແລະ ໜ້າດຶງດູດຫລາຍ!
ທັນຍາພືດຈະເຮັດໃຫ້ຄົນໜຸ່ມເຕີບໂຕ,
ແລະ ເຫລົ້າອະງຸ່ນໃໝ່ຈະເຮັດໃຫ້ຍິງສາວຈະເລີນໄວ.
Source notes (5)
- Footnote ຫລື ດາມາເຊ ເພາະອົງພຣະຜູ້ເປັນເຈົ້າຈັບຕາເບິ່ງມວນມະນຸດ ເຊັ່ນດຽວກັບທີ່ຈັບຕາເບິ່ງເຜົ່າຕ່າງໆ ຂອງອິດສະຣາເອນ
- Footnote ຄື ຊາວເຢຣູຊາເລັມ
- Footnote ຄື ຊາວເຢຣູຊາເລັມ
- Footnote ຫລື ສຸດເຂດແດນ
- Footnote ຫລື ຊາມ ເໝືອນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.