Biblica® Open Lao Contemporary Version
ຍອດເພງ 7
ໂອ ລູກສາວຂອງເຈົ້ານາຍ!
ຕີນຂອງເຈົ້າທີ່ຢູ່ໃນເກີບສານຊ່າງງົດງາມ!
ຂາຂອງເຈົ້າງາມເໝືອນດັ່ງອັນຍະມະນີ,
ທີ່ມືຂອງນັກສິນລະປິນເຈຍລະໄນ.
ສະບືຂອງເຈົ້າເປັນດັ່ງຈອກກົມ
ທີ່ບໍ່ເຄີຍຂາດກິ່ນເຫລົ້າອະງຸ່ນປະສົມ.
ແອວຂອງເຈົ້າງາມດັ່ງກອງເຂົ້າຫວີດ
ອ້ອມດ້ວຍດອກລີລາ.
ນົມຂອງເຈົ້າເໝືອນກັບລູກກວາງສອງໂຕ,
ເໝືອນກັບລູກແຝດຂອງເຍືອງ.
ລຳຄໍເຈົ້າກໍສູງດັ່ງຫໍຄອຍງາຊ້າງ.
ຕາຂອງເຈົ້າໃສເໝືອນສະນໍ້າໃນເຮັດຊະໂບນ
ທີ່ສ່ອງປະກາຍຢູ່ທີ່ຂ້າງປະຕູບັດຣັບບິມ.
ດັງຂອງເຈົ້າງາມດັ່ງຫໍຄອຍແຫ່ງເລບານອນ
ທີ່ເບິ່ງໄປທີ່ດາມັສກັດ.
ຫົວຂອງເຈົ້າສະຫງ່າງາມເໝືອນພູເຂົາກາເມນ.
ຜົມຂອງເຈົ້າງາມຄືກັບຜ້າກັ້ງປັກຢູ່ໃນວັງ;
ຜົມຂອງເຈົ້າມັດໃຈກະສັດ.
ທີ່ຮັກຂອງຂ້ອຍ, ເຈົ້າຊ່າງງາມຫລາຍ ແລະ ເປັນທີ່ພໍໃຈຫລາຍ,
ເຈົ້າໜ້າຊື່ນໃຈແທ້!
ເຈົ້າສູງເໝືອນອິນທະຜາລຳ
ແລະ ນົມຂອງເຈົ້າເໝືອນພວງໝາກໄມ້.
ຂ້ອຍໄດ້ເວົ້າວ່າ, “ຂ້ອຍຈະປີນຂຶ້ນຕົ້ນອິນທະຜາລຳຕົ້ນນີ້;
ຂ້ອຍຈະກອດໝາກຂອງມັນໄວ້”.
ຂໍໃຫ້ນົມຂອງເຈົ້າເໝືອນພວງໝາກອະງຸ່ນທີ່ຢູ່ເທິງເຄືອອະງຸ່ນ,
ໃຫ້ກິ່ນລົມຫາຍໃຈຂອງເຈົ້າຫອມເໝືອນກິ່ນໝາກແອັບເປີ້ນ,
ແລະ ປາກຂອງເຈົ້າເໝືອນເຫລົ້າອະງຸ່ນຊັ້ນດີ.
ຍິງສາວ
ຂໍໃຫ້ເຫລົ້າອະງຸ່ນນີ້ໄຫລສູ່ຮີມສົບ
ແລະ ແຂ້ວຂອງທີ່ຮັກຂອງຂ້ອຍ.1
ຂ້ອຍເປັນຂອງທີ່ຮັກຂອງຂ້ອຍ
ແລະ ລາວປາຖະໜາຂ້ອຍ.
ຈົ່ງມາ, ທີ່ຮັກຂອງຂ້ອຍ, ໃຫ້ພວກເຮົາອອກໄປທີ່ຊົນນະບົດນຳກັນ,
ໃຫ້ພວກເຮົານອນຄ້າງຄືນຢູ່ທີ່ໝູ່ບ້ານ.2
ໃຫ້ພວກເຮົາລຸກຂຶ້ນໄປສວນອະງຸ່ນແຕ່ເຊົ້າ
ເພື່ອເບິ່ງວ່າເຄືອອະງຸ່ນແຕກຕາແລ້ວບໍ,
ເພື່ອເບິ່ງວ່າດອກອະງຸ່ນເປີດອອກບານແລ້ວແລ້ວບໍ,
ແລະ ເບິ່ງວ່າດອກໝາກພິລາບານອອກແລ້ວບໍ
ຢູ່ທີ່ນັ້ນ ຂ້ອຍຈະມອບຄວາມຮັກໃຫ້ແກ່ເຈົ້າ.
ຕົ້ນມານເດກກໍສົ່ງກິ່ນຫອມ,
ແລະ ຢູ່ທີ່ປະຕູຂອງພວກເຮົາກໍມີໝາກໄມ້ແຊບທີ່ສຸດ,
ມີທັງໝາກທີ່ຫາກໍສຸກ ແລະ ໝາກທີ່ສຸກເຕັມທີ່ແລ້ວ,
ເຊິ່ງຂ້ອຍໄດ້ເກັບຮວບຮວມໄວ້ໃຫ້ເຈົ້າ, ທີ່ຮັກຂອງຂ້ອຍ.
Source notes (2)
- Footnote ຫລື ຮີມສົບຂອງຜູ້ນອນຫລັບ
- Footnote ຫລື ຟຸ່ມທຽນຊຳ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.