Biblica® Open Lao Contemporary Version
ຍອດເພງ 5
ຊາຍໜຸ່ມ
ຂ້ອຍໄດ້ເຂົ້າມາໃນສວນຂອງຂ້ອຍແລ້ວ ນ້ອງທີ່ຮັກຂອງຂ້ອຍ, ເຈົ້າສາວຂອງຂ້ອຍ;
ຂ້ອຍໄດ້ເກັບຢາງໄມ້ຫອມ ແລະ ເຄື່ອງຫອມຂອງຂ້ອຍ.
ຂ້ອຍໄດ້ກິນຮັງເຜິ້ງ ແລະ ນ້ຳເຜິ້ງຂອງຂ້ອຍ;
ຂ້ອຍໄດ້ດື່ມເຫລົ້າອະງຸ່ນ ແລະ ນ້ຳນົມຂອງຂ້ອຍ.
ໝູ່ເພື່ອນ
ໝູ່ເພື່ອນ, ຈົ່ງກິນ ແລະ ດື່ມ;
ດື່ມຄວາມຮັກຂອງເຈົ້າໃຫ້ອິ່ມເຕັມ.
ຍິງສາວ
ຂ້ອຍໄດ້ນອນຫລັບໄປ ແຕ່ຫົວໃຈຂອງຂ້ອຍຍັງຕື່ນຢູ່.
ຈົ່ງຟັງ! ທີ່ຮັກຂອງຂ້ອຍກຳລັງເຄາະປະຕູ ແລະ ເວົ້າວ່າ:
“ນ້ອງຮັກຂອງຂ້ອຍ, ທີ່ຮັກຂອງຂ້ອຍ, ເປີດໃຫ້ຂ້ອຍແດ່,
ນົກເຂົານ້ອຍຂອງຂ້ອຍ, ຄົນງາມບໍ່ມີທີ່ຕິຂອງຂ້ອຍ.
ຫົວຂອງຂ້ອຍປຽກຊຸ່ມໄປດ້ວຍນ້ຳໝອກ,
ຜົມຂອງຂ້ອຍຊຸ່ມດ້ວຍລະອອງນໍ້າໃນຍາມກາງຄືນ”.
ແຕ່ຂ້ອຍໄດ້ແກ້ເສື້ອຄຸມຂອງຂ້ອຍອອກແລ້ວ
ຈະໃຫ້ນ້ອຍນຸ່ງເສື້ອຄຸມນັ້ນເຂົ້າໄປໃໝ່ອີກບໍ?
ຂ້ອຍໄດ້ລ້າງຕີນຂອງຂ້ອຍແລ້ວ
ຈະໃຫ້ຂ້ອຍເຮັດໃຫ້ເປື້ອນດິນອີກບໍ?
ທີ່ຮັກຂອງຂ້ອຍພະຍາຍາມເອົາມືຖອດກອນປະຕູ
ຫົວໃຈຂອງຂ້ອຍເລີ່ມເຕັ້ນແຮງເພາະຄິດຮອດລາວ.
ຂ້ອຍລຸກຂຶ້ນເປີດເພື່ອປະຕູຮັບທີ່ຮັກຂອງຂ້ອຍ,
ແລະ ມືຂອງຂ້ອຍກໍປຽກຊຸ່ມດ້ວຍຢົດຢາງໄມ້ຫອມ,
ນິ້ວມືຂອງຂ້ອຍທີ່ມີຢາງໄມ້ຫອມ
ໄຫລປຽກຊຸ່ມກອນປະຕູ.
ຂ້ອຍໄດ້ເປີດປະຕູຕ້ອນຮັບທີ່ຮັກຂອງຂ້ອຍ
ແຕ່ທີ່ຮັກຂອງຂ້ອຍໄດ້ຈາກໄປ; ລາວໄດ້ໄປແລ້ວ.
ຂ້ອຍກໍຕົກໃຈເມື່ອລາວຈາກໄປ.1
ຂ້ອຍໄດ້ຊອກຫາລາວ ແຕ່ບໍ່ພົບລາວເລີຍ.
ຂ້ອຍຮ້ອງຫາລາວ ແຕ່ລາວບໍ່ຕອບ.
ຄົນເຝົ້າຍາມໄດ້ພົບຂ້ອຍ
ຂະນະທີ່ພວກເຂົາຍ່າງກວດອ້ອມເມືອງ.
ພວກເຂົາຕີຂ້ອຍ, ພວກເຂົາໄດ້ເຮັດໃຫ້ຂ້ອຍບວມຊ້ຳ;
ບັນດາຄົນເຝົ້າຍາມຢູ່ທີ່ກຳແພງເມືອງ
ພວກເຂົາໄດ້ເອົາເສື້ອຄຸມຂອງຂ້ອຍໄປ!
ບັນດາລູກສາວຂອງຊາວເຢຣູຊາເລັມ, ຂ້ອຍຂໍຮ້ອງພວກເຈົ້າວ່າ
ຖ້າພວກເຈົ້າພົບທີ່ຮັກຂອງຂ້ອຍ,
ພວກເຈົ້າຈະບອກລາວເລື່ອງໃດກັບລາວ?
ຈົ່ງບອກລາວວ່າຂ້ອຍກຳລັງປ່ວຍເປັນໄຂ້ໃຈ.
ໝູ່ເພື່ອນ
ແມ່ຍິງທີ່ງາມທີ່ສຸດ,
ຄົນຮັກຂອງເຈົ້າດີກວ່າຄົນອື່ນຢ່າງໃດ?
ຄົນຮັກຂອງເຈົ້າດີກວ່າຄົນອື່ນຢ່າງໃດ?
ເຈົ້າຈຶ່ງຢ້ຳພວກເຮົາຢ່າງນີ້?
ຍິງສາວ
ທີ່ຮັກຂອງຂ້ອຍງາມສະຫງ່າ ແລະ ແຂງແຮງດີ,
ໂດດເດັ່ນທ່າມກາງຄົນເປັນໝື່ນ.
ຫົວຂອງລາວເໝືອນຄໍາບໍລິສຸດທີ່ສຸດ;
ຜົມຂອງລາວກໍເປັນຄື້ນ
ແລະ ດຳເໝືອນດັ່ງກາ.
ຕາຂອງລາວກໍເໝືອນນົກເຂົາ
ຢືນຢູ່ແຄມສາຍນ້ຳ,
ທີ່ອາບນໍ້ານົມ,
ເໝືອນດັ່ງອັນຍະມະນີປະດັບໄວ້.
ແກ້ມຂອງລາວເປັນເໝືອນໜານເຄື່ອງຫອມ
ທີ່ສົ່ງກິ່ນຫອມ.
ຮີມສົບຂອງລາວເໝືອນດັ່ງດອກລີລາ
ທີ່ຢົດດ້ວຍຢາງໄມ້ຫອມ.
ແຂນຂອງລາວເໝືອນດັ່ງແທ່ງຄຳ
ທີ່ປະດັບດ້ວຍບຸດສະລາຄຳ.
ຮ່າງກາຍຂອງລາວເໝືອນງາຊ້າງທີ່ເງົາເຫລື້ອມ
ປະດັບດ້ວຍແກ້ວໄພທູນ.
ຂາຂອງລາວຄືກັບເສົາຫີນອ່ອນ
ທີ່ຕັ້ງຢູ່ເທິງຖານທີ່ເຮັດດ້ວຍຄຳບໍລິສຸດ.
ຮູບຮ່າງຂອງລາວແຂງແກ່ນເໝືອນດັ່ງຕົ້ນໄມ້ສີດາແຫ່ງເລບານອນ,
ທີ່ຄັດເລືອກມາເປັນຢ່າງດີ.
ປາກຂອງລາວກໍຫວານເປັນທຳມະຊາດ
ທຸກສິ່ງໃນຕົວລາວເບິ່ງເປັນຕາໜ້າຮັກ,
ນີ້ແມ່ນທີ່ຮັກ ແລະ ເພື່ອນຂອງຂ້ອຍ,
ໂອ ບັນດາລູກສາວຊາວເຢຣູຊາເລັມ.
Source notes (1)
- Footnote ຫລື ຈິດໃຈຂອງຂ້ອຍໄດ້ແລ່ນໄປຫາລາວເມື່ອລາວເວົ້າ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.