Biblica® Open Lao Contemporary Version
ຍອດເພງ 3
ຢູ່ເທິງຕຽງຂອງຂ້ອຍຕະຫລອດຄືນ
ຂ້ອຍໄດ້ຊອກຫາຍອດຫົວໃຈຮັກຂອງຂ້ອຍ;
ຂ້ອຍໄດ້ຊອກຫາລາວ ແຕ່ກໍບໍ່ພົບລາວ.
ຂ້ອຍຈະລຸກຂຶ້ນດຽວນີ້ ແລະ ໄປທົ່ວເມືອງ,
ໄປຕາມຖະໜົນ ແລະ ເດີ່ນເມືອງ;
ຂ້ອຍຈະຄົ້ນຫາຜູ້ທີ່ເປັນຍອດຫົວໃຈຂອງຂ້ອຍ.
ດັ່ງນັ້ນ ຂ້ອຍໄດ້ຊອກຫາລາວ ແຕ່ກໍບໍ່ພົບລາວ.
ຄົນເຝົ້າຍາມກໍມາພົບຂ້ອຍ
ຂະນະທີ່ພວກເຂົາກຳລັງຍ່າງກວດໄປອ້ອມເມືອງ.
ຂ້ອຍຖາມພວກເຂົາວ່າ, “ພວກເຈົ້າເຫັນຜູ້ເປັນຍອດຫົວໃຈຂອງຂ້ອຍບໍ?”
ພໍແຕ່ຈາກພວກເຂົາໄປບໍ່ພໍເທົ່າໃດ
ຂ້ອຍກໍພົບຜູ້ທີ່ເປັນຍອດຫົວໃຈຂອງຂ້ອຍ.
ຂ້ອຍໂອບກອດລາວໄວ້ ແລະ ຈະບໍ່ປ່ອຍໃຫ້ລາວໄປໃສ
ຈົນກວ່າຂ້ອຍຈະໄດ້ພາລາວມາທີ່ເຮືອນຂອງແມ່ຂອງຂ້ອຍ,
ມາເຖິງຫ້ອງຜູ້ທີ່ໃຫ້ກຳເນີດຂ້ອຍ.
ບັນດາລູກສາວຊາວເຢຣູຊາເລັມ,
ຂ້ອຍຂໍຢ້ຳເຈົ້າໂດຍພະລັງຢ່າງເຍືອງ ແລະ ກວາງໃນທົ່ງຫຍ້າວ່າ:
ຢ່າກະຕຸ້ນຄວາມຮັກ ຫລື ປຸກຄວາມຮັກ
ຈົນປ່ອຍມັນໃຫ້ເປັນໄປຕາມຄວາມປາຖະໜາ.
ຜູ້ໃດນໍທີ່ກໍາລັງອອກມາຈາກຖິ່ນແຫ້ງແລ້ງກັນດານ
ເໝືອນລຳຄວັນພຸ່ງຂຶ້ນ,
ເຕັມໄປດ້ວຍກິ່ນຫອມຂອງຢາງໄມ້ຫອມ ແລະ ກຳຍານ
ທີ່ປຸງມາຈາກເຄື່ອງຫອມຂອງພໍ່ຄ້າ?
ເບິ່ງແມ! ນັ້ນແມ່ນຂະບວນແຫ່ຂອງໂຊໂລໂມນ,
ມີນັກຮົບຜູ້ເກັ່ງກ້າທີ່ສຸດຂອງອິດສະຣາເອນ,
ຫົກສິບຄົນຄຸມກັນໄວ້,
ພວກເຂົາທຸກຄົນຖືດາບໄວ້,
ທຸກຄົນເປັນນັກຮົບທີ່ຊຳນານ,
ແຕ່ລະຄົນມີດາບຂອງຕົນຢູ່ຂ້າງກາຍ,
ກຽມພ້ອມຮັບໄພໂຈມຕີໃນເວລາກາງຄືນ.
ກະສັດໂຊໂລໂມນໄດ້ໃຫ້ປະກອບລົດນີ້ໄວ້ສຳລັບຕົນເອງ;
ເພິ່ນໄດ້ເຮັດລົດນີ້ດ້ວຍໄມ້ຈາກເລບານອນ.
ເສົາຂອງລົດແມ່ນເຮັດດ້ວຍເງິນ,
ພື້ນຂອງລົດແມ່ນເປັນຄໍາ.
ບ່ອນນັ່ງຂອງລົດແມ່ນຫຸ້ມດ້ວຍຜ້າສີມ່ວງ,
ພາຍໃນຂອງລົດແມ່ນຕົບແຕ່ງດ້ວຍຄວາມຮັກ.
ບັນດາລູກສາວຊາວເຢຣູຊາເລັມ, ຈົ່ງອອກມາ,
ພວກເຈົ້າ, ບັນດາລູກສາວແຫ່ງຊີໂອນ,
ຈົ່ງອອກມາເບິ່ງກະສັດໂຊໂລໂມນສວມມົງກຸດ,
ມົງກຸດທີ່ແມ່ຂອງເພິ່ນໄດ້ສວມໃຫ້ເພິ່ນ,
ໃນວັນແຕ່ງງານຂອງເພິ່ນ,
ວັນແຫ່ງຄວາມຊື່ນຊົມຍິນດີຂອງເພິ່ນ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.