Biblica® Open Lao Contemporary Version
ຍອດເພງ 2
ຍິງສາວ
ຂ້ອຍເປັນດັ່ງດອກກຸຫລາບແຫ່ງຊາໂຣນ,
ເໝືອນດອກລີລາແຫ່ງຮ່ອມພູ.
ຊາຍໜຸ່ມ
ທີ່ຮັກຂອງຂ້ອຍ ຢູ່ທ່າມກາງຍິງສາວ
ກໍເປັນເໝືອນດອກລີລາທ່າມກາງພຸ່ມໜາມ.
ຍິງສາວ
ທີ່ຮັກຂອງຂ້ອຍ ຢູ່ທ່າມກາງຊາຍໜຸ່ມ
ກໍເປັນເໝືອນຕົ້ນແອັບເປີ້ນທ່າມກາງຕົ້ນໄມ້ໃນປ່າ
ຂ້ອຍມັກນັ່ງຢູ່ກ້ອງຮົ່ມເງົາຂອງລາວ,
ແລະ ໝາກຂອງລາວແມ່ນຫອມຫວານເມື່ອຂ້ອຍໄດ້ຊີມລົດ.
ລາວພາຂ້ອຍໄປໃນຫ້ອງກິນລ້ຽງ,
ແລະ ໃຫ້ຫລາຍຄົນເຫັນວ່າລາວຮັກຂ້ອຍຫລາຍເທົ່າໃດ1
ໃຫ້ກໍາລັງໃຈຂ້ອຍດ້ວຍໝາກອະງຸ່ນແຫ້ງ,
ເຮັດໃຫ້ຂ້ອຍສົດຊື່ນດ້ວຍໝາກແອັບເປີ້ນ
ເພາະຂ້ອຍອ່ອນແຮງດ້ວຍຄວາມຮັກ.
ແຂນຊ້າຍຂອງລາວປະຄອງຫົວຂ້ອຍໄວ້,
ແລະ ແຂນຂວາຂອງລາວກໍໂອບກອດຂ້ອຍໄວ້.
ບັນດາລູກສາວຊາວເຢຣູຊາເລັມ,
ຂ້ອຍຂໍຢ້ຳເຈົ້າໂດຍພະລັງຢ່າງເຍືອງ ແລະ ກວາງໃນທົ່ງຫຍ້າວ່າ:
ຢ່າກະຕຸ້ນຄວາມຮັກ ຫລື ປຸກຄວາມຮັກ
ຈົນປ່ອຍມັນໃຫ້ເປັນໄປຕາມຄວາມປາຖະໜາ.
ຈົ່ງຟັງ! ທີ່ຮັກຂອງຂ້ອຍ!
ເບິ່ງແມ! ລາວກໍາລັງມາທີ່ນີ້,
ກະໂດດຂ້າມພູເຂົາທັງຫລາຍ,
ກະໂດດຂ້າມເນີນພູມາ.
ທີ່ຮັກຂອງຂ້ອຍເປັນເໝືອນເຍືອງຜູ້ ຫລື ກວາງໜຸ່ມ.
ເບິ່ງແມ! ລາວຢູ່ຫລັງກຳແພງຂອງພວກເຮົາ,
ກໍາລັງໂງຫົວຂຶ້ນເບິ່ງຜ່ານປ່ອງຢ້ຽມ,
ແນມເບິ່ງລອດຜ່ານຕາໜ່າງ.
ທີ່ຮັກຂອງຂ້ອຍເອີ່ຍຂຶ້ນ ແລະ ໄດ້ເວົ້າກັບຂ້ອຍວ່າ,
“ລຸກຂຶ້ນ, ສຸດທີ່ຮັກຂອງຂ້ອຍ,
ຄົນງາມຂອງຂ້ອຍ, ຈົ່ງມາກັບຂ້ອຍ.
ເບິ່ງແມ! ລະດູໜາວຜ່ານພົ້ນໄປແລ້ວ;
ຝົນກໍເຊົາຕົກແລ້ວ.
ດອກໄມ້ຕ່າງໆເລີ່ມບານຢູ່ເທິງແຜ່ນດິນໂລກ;
ລະດູແຫ່ງການຮ້ອງເພງໄດ້ມາເຖິງແລ້ວ,
ສຽງນົກເຂົາຮ້ອງ
ໄດ້ຍິນໃນຖິ່ນຂອງພວກເຮົາ.
ຕົ້ນໝາກເດື່ອກຳລັງເກີດຜົນທຳອິດ
ເຄືອອະງຸ່ນກໍອອກດອກບານສົ່ງກິ່ນຫອມຂອງມັນ.
ລຸກຂຶ້ນມາ ທີ່ຮັກຂອງຂ້ອຍ;
ຄົນງາມຂອງຂ້ອຍ ຈົ່ງມາກັບຂ້ອຍ”.
ຊາຍໜຸ່ມ
ນົກເຂົາຂອງຂ້ອຍຢູ່ໃນຫລືບຫີນ,
ກໍາລັງລີ້ຢູ່ເທິງເປີ້ນພູເຂົາ
ຂໍໃຫ້ຂ້ອຍໄດ້ເຫັນໜ້າເຈົ້າ,
ຂໍໃຫ້ຂ້ອຍໄດ້ຍິນສຽງຂອງເຈົ້າ;
ເພາະສຽງຂອງເຈົ້າຊ່າງຫວານແທ້,
ແລະ ໃບໜ້າຂອງເຈົ້າກໍງາມໜ້າຮັກ.
ຈົ່ງມາຊ່ວຍຈັບຝູງໝາຈອກໃຫ້ພວກເຮົາ
ໝາຈອກໂຕນ້ອຍທັງຫລາຍ
ທີ່ທຳລາຍສວນອະງຸ່ນ
ສວນຂອງພວກເຮົາທີ່ກຳລັງອອກດອກບານ.
ຍິງສາວ
ທີ່ຮັກຂອງຂ້ອຍແມ່ນເປັນຂອງຂ້ອຍ ແລະ ຂ້ອຍກໍເປັນຂອງລາວ
ລາວລ້ຽງສັດຢູ່ທ່າມກາງດອກລີລາ.
ຈົນຮຸ່ງເຊົ້າມາ
ແລະ ເງົາມືດກໍລັບຫາຍໄປ,
ຈົ່ງຫັນມາ ທີ່ຮັກຂອງຂ້ອຍ,
ແລະ ຂໍໃຫ້ເປັນເໝືອນເຍືອງ
ຫລື ກວາງໜຸ່ມ
ທີ່ຢູ່ເທິງເນີນພູເບັດເອ.2
Source notes (2)
- Footnote ຫລື ທຸງຂອງລາວທີ່ຢູ່ເໜືອຂ້ອຍຄືຄວາມຮັກ
- Footnote ຫລື ເນີນພູທີ່ຮົກ ແລະ ບໍ່ຮາບພຽງ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.