Biblica® Open Lao Contemporary Version
ຍອດເພງ 1
ຍອດບົດເພງຂອງໂຊໂລໂມນ.
ຜູ້ສາວ
ຂໍໃຫ້ເຈົ້າຈູບຂ້ອຍດ້ວຍປາກຂອງເຈົ້າ
ເພາະຄວາມຮັກຂອງເຈົ້າແມ່ນຊື່ນໃຈຫລາຍກວ່າເຫລົ້າອະງຸ່ນ.
ກິ່ນນ້ຳຫອມຂອງເຈົ້າຊ່າງຊວນຫລົງໄຫລ;
ຊື່ສຽງຂອງເຈົ້າກໍເປັນເໝືອນນໍ້າຫອມທີ່ຖອກອອກມາ.
ຈຶ່ງບໍ່ແປກໃຈເລີຍທີ່ຍິງສາວຫຸ້ມຮັກເຈົ້າ!
ພາຂ້ອຍໄປນໍາເຈົ້າ ໃຫ້ພວກເຮົາຟ້າວໄປ!
ຂໍໃຫ້ກະສັດພາຂ້ອຍເຂົ້າໄປໃນຫ້ອງຂອງເຈົ້າ.
ບັນດາໝູ່
ພວກເຮົາຊື່ນຊົມ ແລະ ຍິນດີໃນໂຕເຈົ້າ;
ພວກເຮົາຈະເທີດທູນຄວາມຮັກຂອງເຈົ້າຫລາຍກວ່າເຫລົ້າອະງຸ່ນ.
ຜູ້ສາວ
ຖືກຕ້ອງແລ້ວທີ່ພວກເຂົາເທີດທູນເຈົ້າ!
ບັນດາຍິງສາວຊາວເຢຣູຊາເລັມເອີຍ,
ຂ້ອຍເປັນຄົນຜິວດໍາ,
ດໍາເໝືອນດັ່ງຜ້າເຕັນແຫ່ງເກດາກໍຈິງ,
ແຕ່ກໍງາມໜ້າຮັກເໝືອນຜ້າກັ້ງຂອງໂຊໂລໂມນ.1
ຢ່າຈ້ອງເບິ່ງຜິວທີ່ດຳຂອງຂ້ອຍຫລາຍ,
ເພາະຂ້ອຍເປັນຄົນຍ້ອນຕາເວັນ.
ບັນດາອ້າຍຂອງຂ້ອຍໃຈຮ້າຍໃຫ້ຂ້ອຍ
ແລະ ໃຫ້ຂ້ອຍໄປເບິ່ງແຍງສວນອະງຸ່ນທັງຫລາຍ.
ແຕ່ສວນອະງຸ່ນຂອງຂ້ອຍເອງຖືກປະຖິ້ມໄວ້;
ບອກຂ້ອຍແດ່ທີ່ຮັກຂອງຂ້ອຍ
ມື້ນີ້ເຈົ້າຈະພາຝູງແກະຂອງເຈົ້າໄປກິນຫຍ້າຢູ່ໃສ
ແລະ ຕອນທ່ຽງນັ້ນເຈົ້າຈະພາຝູງແກະຂອງເຈົ້າໄປພັກຜ່ອນຢູ່ໃສ.
ດ້ວຍເຫດໃດຂ້ອຍຈະຕ້ອງເປັນເໝືອນແມ່ຍິງທີ່ເອົາຜ້າຄຸມໜ້າ
ໄປກັບຝູງແກະຂອງບັນດາໝູ່ຂອງເຈົ້າ?
ບັນດາໝູ່
ແມ່ຍິງງາມທີ່ສຸດ, ຖ້າເຈົ້າບໍ່ຮູ້ຈັກ,
ກໍໃຫ້ຕິດຕາມຮອຍຝູງແກະໄປ
ແລະ ໄປທີ່ເຕັນຂອງພວກຄົນລ້ຽງແກະ
ໄປລ້ຽງຝູງແບ້ຂອງເຈົ້າຢູ່ທີ່ນັ້ນ.
ຊາຍໜຸ່ມ
ທີ່ຮັກຂອງຂ້ອຍ, ຂ້ອຍປຽບເຈົ້າເໝືອນດັ່ງມ້າແມ່
ທີ່ໃຊ້ທຽມລົດມ້າຂອງຟາໂຣ
ແກ້ມຂອງເຈົ້າງົດງາມດ້ວຍຕຸ້ມຫູ,
ຄໍຂອງເຈົ້າກໍງາມດ້ວຍສາຍຄໍອັນຍະມະນີ.
ພວກເຮົາຈະເຮັດຕຸ້ມຫູຄຳໃຫ້ເຈົ້າ,
ປະດັບເຈົ້າດ້ວຍເງິນ.
ຍິງສາວ
ເມື່ອກະສັດຢູ່ທີ່ບ່ອນນອນ,
ນ້ຳຫອມຂອງຂ້ອຍກໍສົ່ງກິນຫອມໄປທົ່ວ.
ທີ່ຮັກຂອງຂ້ອຍ ເຈົ້າເປັນດັ່ງຖົງຢາງໄມ້ຫອມ
ທີ່ວາງຢູ່ຫວ່າງເອິກຂອງຂ້ອຍ.
ທີ່ຮັກຂອງຂ້ອຍ ເຈົ້າເປັນດັ່ງພວງດອກທຽນຊຳ
ຈາກສວນອະງຸ່ນແຫ່ງເອນເກດີ.
ຊາຍໜຸ່ມ
ເຈົ້າຊ່າງງາມແທ້ ສຸດທີ່ຮັກຂອງຂ້ອຍ!
ໂອ, ງາມແທ້!
ດວງຕາຂອງເຈົ້າເໝືອນດັ່ງນົກເຂົາ.
ຍິງສາວ
ທີ່ຮັກຂອງຂ້ອຍ ເຈົ້າຊ່າງເຈົ້າຊູ້ແທ້!
ໂອ, ມີສະເໜ່ຫລາຍ!
ແລະ ຕຽງນອນຂອງພວກເຮົາກໍຂຽວສົດ.
ຊາຍໜຸ່ມ
ຂື່ເຮືອນຂອງພວກເຮົາກໍເປັນໄມ້ສີດາ;
ເພດານເຮືອນຂອງພວກເຮົາກໍເປັນໄມ້ເຟີ້.
Source notes (1)
- Footnote ຫລື ຊັນມາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.