Biblica® Open Lao Contemporary Version
ປັນຍາຈານ 12
ຈົ່ງລະນຶກເຖິງພຣະຜູ້ສ້າງຂອງເຈົ້າ
ຕະຫລອດວັນເວລາທີ່ເຈົ້າຍັງໜຸ່ມ,
ກ່ອນຍາມທຸກລຳບາກຈະມາເຖິງ
ແລະ ປີເດືອນເຫລົ່ານັ້ນໃກ້ເຂົ້າມາ ເມື່ອເຈົ້າຈະເວົ້າວ່າ,
“ຂ້ອຍບໍ່ເຫັນຈະມ່ວນຊື່ນອັນໃດໃນຊີວິດ”
ກ່ອນດວງຕາເວັນ ແລະ ແສງສະຫວ່າງ
ດວງເດືອນ ແລະ ດວງດາວຈະມືດມົວລົງ,
ກ່ອນເມກຈະຫວນກັບມາພາຍຫລັງຝົນ;
ເມື່ອຄົນເຝົ້າເຮືອນໂຕສັ່ນ,
ແລະ ຊາຍທີ່ແຂງແຮງກົ້ມລົງ,
ເມື່ອຄົນໂມ້ແປ້ງຢຸດໂມ້ເພາະເຫລືອຄົນໜ້ອຍ,
ແລະ ບັນດາຜູ້ທີ່ເບິ່ງຜ່ານປ່ອງຢ້ຽມເລີ່ມເບິ່ງເຫັນບໍ່ແຈ້ງ;
ເມື່ອປະຕູທີ່ເປີດສູ່ຖະໜົນນັ້ນຖືກປິດ
ແລະ ສຽງໂມ້ຄ່ອຍລົງ;
ເມື່ອຄົນເຮົາຕື່ນຂຶ້ນຕອນໄດ້ຍິນສຽງນົກຮ້ອງ,
ແຕ່ສຽງເພງຂອງພວກມັນກໍຄ່ອຍລົງ;
ເມື່ອຄົນເຮົາຢ້ານຄວາມສູງ
ແລະ ຢ້ານໄພອັນຕະລາຍໃນຖະໜົນ;
ເມື່ອຕົ້ນອັນມອນອອກດອກບານ
ແລະ ຕັກແຕນລາກຂາຍ່າງໄປ
ແລະ ຄວາມປາຖະໜາບໍ່ຖືກກະຕຸ້ນອີກຕໍ່ໄປ.
ເມື່ອນັ້ນມະນຸດກໍໄປສູ່ບ້ານນິລັນດອນຂອງຕົນ
ແລະ ຄົນໄວ້ທຸກຍ່າງໄປຕາມຖະໜົນ.
ຈົ່ງລະນຶກເຖິງພຣະອົງ ກ່ອນທີ່ສາຍເງິນຈະຂາດ,
ຫລື ຖ້ວຍຄຳຈະແຕກ;
ກ່ອນທີ່ເຢືອກຈະແຕກໝຸ່ນຢູ່ທີ່ນ້ຳພຸ,
ຫລື ລໍ້ຫັກເພຢູ່ທີ່ນ້ຳສ້າງ,
ແລະ ຂີ້ຝຸ່ນດິນຈະກັບຄືນສູ່ດິນທີ່ມັນຈາກມາ,
ແລະ ຈິດວິນຍານກັບຄືນສູ່ພຣະເຈົ້າຜູ້ໄດ້ມອບໃຫ້.
ປັນຍາຈານ1ກ່າວວ່າ, “ອະນິຈັງ! ອະນິຈັງ!
ທຸກສິ່ງລ້ວນແຕ່ອະນິຈັງ!”
ບົດສະຫລຸບ
ປັນຍາຈານນັ້ນບໍ່ພຽງແຕ່ສະຫລາດເທົ່ານັ້ນ ແຕ່ເພິ່ນຍັງໄດ້ຖ່າຍທອດຄວາມຮູ້ໃຫ້ແກ່ປະຊາຊົນນຳອີກ. ເພິ່ນໄດ້ສຶກສາກັບຄົ້ນຄວ້າຮ່ຳຮຽນ ແລະ ຮວບຮວມສຸພາສິດຕ່າງໆໄວ້ໃຫ້ເປັນລະບົບ. ເພິ່ນໄດ້ຊອກຫາຖ້ອຍຄຳທີ່ເໝາະສົມ ແລະ ສິ່ງທີ່ເພິ່ນຂຽນນັ້ນທ່ຽງທຳ ແລະ ເປັນຈິງ.
ຄໍາເວົ້າຂອງຄົນສະຫລາດກໍເໝືອນຫອກທີ່ແຫລມ, ຄຳເວົ້າທີ່ຮວບຮວມໄວ້ຂອງພວກເຂົາກໍເໝືອນຕະປູຕອກແໜ້ນ ເຊິ່ງພຣະຜູ້ລ້ຽງໄດ້ມອບໃຫ້. ລູກເອີຍ, ຈົ່ງລະວັງສິ່ງທີ່ຕໍ່ເຕີມເສີມແຕ່ງຫລາຍກວ່ານັ້ນ.
ຈະເຮັດໜັງສືຫລາຍ ກໍບໍ່ຈົບສິ້ນ ແລະ ຮຽນຫລາຍ ກໍເມື່ອຍກາຍ.
ບັດນີ້ ກໍໄດ້ຟັງມາໝົດແລ້ວ;
ບົດສະຫລຸບກໍຄື:
ຈົ່ງຢຳເກງພຣະເຈົ້າ ແລະ ຖືຮັກສາຄໍາສັ່ງຂອງພຣະອົງ,
ເພາະນີ້ເປັນໜ້າທີ່ຂອງມະນຸດທຸກຄົນ.
ເພາະພຣະເຈົ້າຈະພິພາກສາການກະທຳທຸກຢ່າງ,
ລວມເຖິງທຸກສິ່ງທີ່ປົກປິດໄວ້,
ບໍ່ວ່າດີ ຫລື ຊົ່ວ.
Source notes (1)
- Footnote ຫລື ຜູ້ນຳຂອງຊຸມຊົນ ເຊັ່ນດຽວກັບຂໍ້ 9
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.