Biblica® Open Lao Contemporary Version
ພຣະນິມິດ 5
ໜັງສືມ້ວນ ແລະ ລູກແກະຂອງພຣະເຈົ້າ
ແລ້ວຂ້າພະເຈົ້າເຫັນໜັງສືມ້ວນໃນມືເບື້ອງຂວາຂອງພຣະອົງຜູ້ນັ່ງຢູ່ເທິງບັນລັງ ໜັງສືມ້ວນນີ້ຂຽນໄວ້ທັງສອງດ້ານ ແລະ ປະທັບດ້ວຍຕາປະທັບເຈັດດວງ. ແລະ ຂ້າພະເຈົ້າໄດ້ເຫັນເທວະດາຜູ້ມີລິດຕົນໜຶ່ງກຳລັງປະກາດດ້ວຍສຽງດັງວ່າ: “ຜູ້ໃດສົມຄວນທີ່ຈະແກະຕາປະທັບ ແລະ ເປີດໜັງສືມ້ວນນີ້?” ແຕ່ບໍ່ມີຜູ້ໃດໃນສະຫວັນ ຫລື ເທິງແຜ່ນດິນໂລກ ຫລື ໃຕ້ແຜ່ນດິນໂລກສາມາດເປີດໜັງສືມ້ວນອອກ ຫລື ແມ່ນແຕ່ເບິ່ງຂ້າງໃນຂອງໜັງສືມ້ວນນີ້ໄດ້. ຂ້າພະເຈົ້າໄດ້ແຕ່ຮ້ອງໄຫ້ເພາະບໍ່ພົບຜູ້ໃດທີ່ສົມຄວນທີ່ຈະເປີດໜັງສືມ້ວນອອກ ຫລື ເບິ່ງຂ້າງໃນໄດ້. ແລ້ວໜຶ່ງໃນບັນດາຜູ້ອາວຸໂສນັ້ນໄດ້ກ່າວກັບຂ້າພະເຈົ້າວ່າ, “ຢ່າຮ້ອງໄຫ້! ເບິ່ງແມ, ສິງແຫ່ງເຜົ່າຢູດາ, ຮາກເຫງົ້າຂອງດາວິດຊະນະແລ້ວ. ພຣະອົງສາມາດເປີດໜັງສືມ້ວນ ແລະ ຕາປະທັບທັງເຈັດໄດ້”.
ຫລັງຈາກນັ້ນ ຂ້າພະເຈົ້າກໍໄດ້ເຫັນລູກແກະຂອງພຣະເຈົ້າ, ເບິ່ງຄືວ່າໄດ້ຖືກຂ້າແລ້ວ ກຳລັງຢືນຢູ່ໃຈກາງຂອງບັນລັງ, ອ້ອມຮອບດ້ວຍສິ່ງທີ່ມີຊີວິດທັງສີ່ ແລະ ບັນດາຜູ້ອາວຸໂສ. ລູກແກະຂອງພຣະເຈົ້າມີເຂົາເຈັດອັນ ແລະ ມີຕາເຈັດໜ່ວຍ, ເຊິ່ງເປັນວິນຍານ1ທັງເຈັດຂອງພຣະເຈົ້າທີ່ໃຊ້ອອກໄປທົ່ວແຜ່ນດິນໂລກ. ລູກແກະຂອງພຣະເຈົ້າໄດ້ໄປ ແລະ ຮັບໜັງສືມ້ວນຈາກມືເບື້ອງຂວາຂອງພຣະອົງຜູ້ນັ່ງຢູ່ເທິງບັນລັງ. ແລະ ເມື່ອພຣະອົງຮັບໜັງສືມ້ວນນັ້ນແລ້ວ, ສິ່ງທີ່ມີຊີວິດທັງສີ່ ແລະ ບັນດາຜູ້ອາວຸໂສທັງຊາວສີ່ທ່ານກໍກົ້ມຂາບລົງຕໍ່ໜ້າລູກແກະຂອງພຣະເຈົ້າ. ແຕ່ລະຕົນມີພິນ ແລະ ພວກເພິ່ນໄດ້ຖືຂັນຄຳທີ່ເຕັມດ້ວຍເຄື່ອງຫອມ, ເຊິ່ງເປັນຄຳອະທິຖານຂອງບັນດາຄົນຂອງພຣະເຈົ້າ. ແລະ ພວກເພິ່ນໄດ້ຮ້ອງເພງບົດໃໝ່ວ່າ:
“ພຣະອົງສົມຄວນທີ່ຈະຮັບໜັງສືມ້ວນ
ແລະ ເປີດຕາປະທັບຂອງໜັງສືມ້ວນອອກ,
ເພາະພຣະອົງຖືກຂ້າແລ້ວ,
ແລະ ດ້ວຍເລືອດຂອງພຣະອົງນັ້ນພຣະອົງໄດ້ຊື້ມະນຸດທັງຫລາຍຖວາຍແກ່ພຣະເຈົ້າ
ຈາກທຸກຊົນເຜົ່າ ແລະ ທຸກພາສາ, ທຸກຄົນ ແລະ ທຸກຊົນຊາດ.
ພຣະອົງໄດ້ເຮັດໃຫ້ພວກເຂົາເປັນອານາຈັກ ແລະ ເປັນປະໂລຫິດເພື່ອຮັບໃຊ້ພຣະເຈົ້າຂອງພວກເຮົາ,
ແລະ ພວກເຂົາຈະປົກຄອງເທິງແຜ່ນດິນໂລກ”.
ແລ້ວຂ້າພະເຈົ້າໄດ້ຫລຽວເບິ່ງ ແລະ ໄດ້ຍິນສຽງຂອງເທວະດາຈໍານວນຫລວງຫລາຍນັບເປັນພັນໆ ແລະ ນັບເປັນໝື່ນໆ. ເທວະດາເຫລົ່ານັ້ນໄດ້ອ້ອມຮອບບັນລັງກັບສິ່ງທີ່ມີຊີວິດ ແລະ ບັນດາຜູ້ອາວຸໂສ. ເທວະດາເຫລົ່ານັ້ນໄດ້ກ່າວດ້ວຍສຽງອັນດັງວ່າ:
“ລູກແກະຂອງພຣະເຈົ້າ, ຜູ້ຖືກຂ້າ,
ຜູ້ສົມຄວນໄດ້ຮັບລິດອຳນາດ ແລະ ຄວາມຮັ່ງມີ, ສະຕິປັນຍາ ແລະ ກຳລັງ
ກຽດຕິຍົດ, ສະຫງ່າລາສີ ແລະ ຄຳສັນລະເສີນ!”
ແລ້ວຂ້າພະເຈົ້າໄດ້ຍິນສຽງຂອງທຸກສິ່ງທີ່ມີຊີວິດໃນສະຫວັນ ແລະ ເທິງແຜ່ນດິນໂລກ, ໃຕ້ແຜ່ນດິນໂລກ ແລະ ໃນທະເລ, ແລະ ທຸກສິ່ງໃນທີ່ນັ້ນກ່າວວ່າ:
“ແດ່ພຣະອົງຜູ້ນັ່ງຢູ່ເທິງບັນລັງ ແລະ ແດ່ລູກແກະຂອງພຣະເຈົ້າ
ຂໍຖວາຍຄຳສັນລະເສີນ ແລະ ກຽດຕິຍົດ, ສະຫງ່າລາສີ ແລະ ລິດອຳນາດ
ຕະຫລອດໄປເປັນນິດ!”
ສິ່ງທີ່ມີຊີວິດທັງສີ່ໄດ້ຮ້ອງວ່າ, “ອາແມນ2” ແລະ ບັນດາຜູ້ອາວຸໂສກໍກົ້ມຂາບລົງ ແລະ ນະມັດສະການ.
Source notes (2)
- Footnote ຫລື ພຣະວິນຍານທັງເຈັດ
- Footnote ແປວ່າ ເປັນດັ່ງນັ້ນ ຫລື ຂໍໃຫ້ເປັນເຊັ່ນນັ້ນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.