Biblica® Open Lao Contemporary Version
ພຣະນິມິດ 15
ເທວະດາເຈັດຕົນ ແລະ ໄພພິບັດທັງເຈັດ
ຂ້າພະເຈົ້າໄດ້ເຫັນໝາຍສຳຄັນອັນຍິ່ງໃຫຍ່ ແລະ ມະຫັດສະຈັນອື່ນອີກໃນສະຫວັນຄື: ເທວະດາເຈັດຕົນ ແລະ ໄພພິບັດສຸດທ້າຍທັງເຈັດ ເຊິ່ງເປັນໄພພິບັດຄັ້ງສຸດທ້າຍ, ເພາະວ່າຄວາມໂກດຮ້າຍຂອງພຣະເຈົ້າສຳເລັດລົງດ້ວຍໄພພິບັດເຫລົ່ານີ້. ແລະ ຂ້າພະເຈົ້າແນມເຫັນສິ່ງໜຶ່ງຄ້າຍຄືກັນກັບທະເລແກ້ວປົນໄຟ, ບັນດາຜູ້ມີໄຊຊະນະເໜືອສັດຮ້າຍກັບຮູບຈຳລອງ ແລະ ໂຕເລກປະຈຳຊື່ຂອງມັນຢືນຢູ່ແຄມທະເລນັ້ນ. ພວກເຂົາຖືພິນທີ່ພຣະເຈົ້າໄດ້ມອບໃຫ້ພວກເຂົາ ແລະ ໄດ້ຮ້ອງບົດເພງຂອງໂມເຊຜູ້ຮັບໃຊ້ຂອງພຣະເຈົ້າ ແລະ ບົດເພງຂອງລູກແກະຂອງພຣະເຈົ້າວ່າ:
“ຂ້າແດ່ອົງພຣະຜູ້ເປັນເຈົ້າ ພຣະເຈົ້າຜູ້ລິດອຳນາດຍິ່ງໃຫຍ່,
ກິດຈະການຂອງພຣະອົງຍິ່ງໃຫຍ່ ແລະ ອັດສະຈັນຫລາຍ.
ຂ້າແດ່ກະສັດແຫ່ງປະຊາຊາດທັງປວງ,
ວິຖີທາງຂອງພຣະອົງກໍຍຸຕິທຳ ແລະ ເປັນຄວາມຈິງ.
ຂ້າແດ່ອົງພຣະຜູ້ເປັນເຈົ້າ ມີຜູ້ໃດແດ່ຈະບໍ່ຢຳເກງພຣະອົງ
ແລະ ຈະບໍ່ຖວາຍກຽດແກ່ນາມຂອງພຣະອົງ?
ເພາະພຣະອົງຜູ້ດຽວບໍລິສຸດ.
ປະຊາຊາດທັງໝົດຈະເຂົ້າມາ
ແລະ ນະມັດສະການຕໍ່ໜ້າພຣະອົງ,
ເພາະກິດຈະການອັນຊອບທຳຂອງພຣະອົງກໍໄດ້ເປີດເຜີຍໃຫ້ເຫັນແລ້ວ”.1
ຫລັງຈາກນີ້ ຂ້າພະເຈົ້າໄດ້ແນມເບິ່ງ ແລະ ຂ້າພະເຈົ້າໄດ້ເຫັນວິຫານໃນສະຫວັນ ນັ້ນແມ່ນຫໍເຕັນຂອງກົດບັນຍັດແຫ່ງພັນທະສັນຍາ ແລະ ຫໍເຕັນນັ້ນກໍເປີດອອກ. ເທວະດາເຈັດຕົນທີ່ຖືໄພພິບັດທັງເຈັດກໍອອກມາຈາກວິຫານ. ພວກເພິ່ນນຸ່ງຜ້າຝ້າຍລິນິນສະອາດ, ຜ້າຝ້າຍລິນິນເຫລື້ອມ ແລະ ຄາດສາຍສະພາຍຄຳຮອບໜ້າເອິກຂອງພວກເພິ່ນ. ແລ້ວໜຶ່ງໃນສິ່ງທີ່ມີຊີວິດທັງສີ່ກໍເອົາຂັນຄຳທັງເຈັດ ເຊິ່ງເຕັມໄປດ້ວຍຄວາມໂກດຮ້າຍຂອງພຣະເຈົ້າຜູ້ມີຊີວິດຢູ່ຕະຫລອດໄປເປັນນິດນັ້ນມອບໃຫ້ແກ່ເທວະດາເຈັດຕົນ. ແລະ ວິຫານນັ້ນກໍເຕັມໄປດ້ວຍຄວັນແຫ່ງສະຫງ່າລາສີ ແລະ ລິດອຳນາດຂອງພຣະເຈົ້າ ແລະ ບໍ່ມີຜູ້ໃດສາມາດເຂົ້າໄປໃນວິຫານໄດ້ຈົນກວ່າໄພພິບັດທັງເຈັດຈາກເທວະດາເຈັດຕົນນັ້ນຈະສຳເລັດສົມບູນ.
Source notes (1)
- Footnote ປະໂຫຍກຕ່າງໆໃນບົດເພງນີ້ ແມ່ນດຶງມາຈາກ ພສສ 111:2,3; ພບຍ 32:4; ຢມຢ 10:7; ພສສ 86:9; 98:2
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.