Biblica® Open Lao Contemporary Version

ເພງສັນລະເສີນ 96

(1ຂຄ 16:23-33)

ຈົ່ງຮ້ອງເພງບົດໃໝ່ຖວາຍແດ່ພຣະເຈົ້າຢາເວ;

ຈົ່ງຮ້ອງເພງຖວາຍພຣະເຈົ້າຢາເວ ທົ່ວແຜ່ນດິນໂລກ.

ຈົ່ງຮ້ອງເພງຖວາຍພຣະເຈົ້າຢາເວ ສັນລະເສີນນາມຂອງພຣະອົງ;

ຈົ່ງປະກາດຄວາມພົ້ນຂອງພຣະອົງທຸກໆວັນ.

ຈົ່ງປະກາດສະຫງ່າລາສີຂອງພຣະອົງໃນທ່າມກາງບັນດາປະຊາຊາດ,

ປະກາດກິດຈະການອັນລ້ຳເລີດຂອງພຣະອົງທ່າມກາງຊົນຊາດທັງໝົດ.

ເພາະພຣະເຈົ້າຢາເວນັ້ນຍິ່ງໃຫຍ່ ແລະ ສົມຄວນໄດ້ຮັບການສັນລະເສີນທີ່ສຸດ;

ພຣະອົງເປັນທີ່ເຄົາລົບຢຳເກງເໜືອພະທັງໝົດ.

ເພາະພະທັງໝົດຂອງຊົນຊາດຕ່າງໆນັ້ນເປັນພຽງຮູບເຄົາລົບ,

ແຕ່ພຣະເຈົ້າຢາເວໄດ້ສ້າງຟ້າສະຫວັນ.

ຄວາມສະຫງ່າງາມ ແລະ ບາລະມີກໍຢູ່ຕໍ່ໜ້າພຣະອົງ;

ກຳລັງ ແລະ ສະຫງ່າລາສີກໍຢູ່ໃນສະຖານນະມັດສະການຂອງພຣະອົງ.

ທຸກຄອບຄົວຂອງຊົນຊາດທັງຫລາຍ, ຈົ່ງເທີດທູນພຣະເຈົ້າຢາເວ,

ຈົ່ງເທີດທູນພຣະເຈົ້າຢາເວເຖິງກຽດ ແລະ ກຳລັງຂອງພຣະອົງ.

ຈົ່ງເທີດທູນພຣະເຈົ້າຢາເວຕາມກຽດທີ່ສົມຄວນແກ່ນາມຂອງພຣະອົງ;

ຈົ່ງນຳເຄື່ອງບູຊາ ແລະ ເຂົ້າມາໃນເດີ່ນວິຫານຂອງພຣະອົງ.

ຈົ່ງນະມັດສະການພຣະເຈົ້າຢາເວໃນຄວາມສະຫງ່າງາມແຫ່ງຄວາມບໍລິສຸດຂອງພຣະອົງ;1

ທົ່ວແຜ່ນດິນໂລກຈົ່ງສັ່ນສະທ້ານຕໍ່ໜ້າພຣະອົງ.

ຈົ່ງກ່າວທ່າມກາງປະຊາຊາດທັງຫລາຍວ່າ “ພຣະເຈົ້າຢາເວຄອບຄອງ”.

ໂລກໄດ້ຮັບການສະຖາປະນາໄວ້ຢ່າງໝັ້ນຄົງ ຈະບໍ່ມີວັນສັ່ນຄອນ;

ພຣະອົງຈະພິພາກສາຊົນຊາດທັງຫລາຍຢ່າງຍຸຕິທຳ.

ຟ້າສະຫວັນຈົ່ງຊື່ນຊົມຍິນດີ, ແຜ່ນດິນໂລກຈົ່ງຍິນດີ;

ໃຫ້ທະເລ ແລະ ທຸກສິ່ງທີ່ຢູ່ໃນນັ້ນສົ່ງສຽງກັງວານ.

ໃຫ້ທົ່ງນາ ແລະ ທຸກສິ່ງທີ່ຢູ່ໃນທົ່ງນານັ້ນມ່ວນຊື່ນ,

ໃຫ້ຕົ້ນໄມ້ທີ່ຢູ່ໃນປ່າຮ້ອງເພງຊື່ນຊົມຍິນດີ.

ໃຫ້ທຸກສິ່ງທີ່ພຣະອົງສ້າງນັ້ນຊື່ນຊົມຍິນດີຕໍ່ໜ້າພຣະເຈົ້າຢາເວ ເພາະພຣະອົງມາ,

ພຣະອົງມາເພື່ອພິພາກສາແຜ່ນດິນໂລກ.

ພຣະອົງຈະພິພາກສາໂລກດ້ວຍຄວາມຊອບທຳ

ແລະ ພິພາກສາຊົນຊາດຕ່າງໆດ້ວຍຄວາມສັດຊື່ຂອງພຣະອົງ.

Source notes (1)

Footnote ຫລື ດ້ວຍສະຫງ່າລາສີແຫ່ງຄວາມບໍລິສຸດ

Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.