Biblica® Open Lao Contemporary Version
ເພງສັນລະເສີນ 9
ເຖິງຫົວໜ້ານັກຮ້ອງ, ທຳນອງ “ການຕາຍຂອງລູກຊາຍ” ບົດເພງສັນລະເສີນຂອງດາວິດ.
ຂ້າແດ່ພຣະເຈົ້າຢາເວ ຂ້ານ້ອຍຈະໂມທະນາຂອບພຣະຄຸນພຣະອົງດ້ວຍສຸດຫົວໃຈຂອງຂ້ານ້ອຍ;
ຂ້ານ້ອຍຈະບອກເຖິງການອັດສະຈັນທັງໝົດທີ່ພຣະອົງໄດ້ກະທຳ.
ຂ້ານ້ອຍຈະຍິນດີ ແລະ ຊື່ນຊົມຍິນດີໃນພຣະອົງ;
ຂ້າແດ່ອົງຜູ້ສູງສຸດ ຂ້ານ້ອຍຈະຮ້ອງເພງສັນລະເສີນນາມຂອງພຣະອົງ.
ບັນດາສັດຕູຂອງຂ້ານ້ອຍກໍຫັນກັບໄປ;
ພວກເຂົາໄດ້ລົ້ມລົງ ແລະ ຈິບຫາຍໄປຕໍ່ໜ້າພຣະອົງ.
ເພາະພຣະອົງໄດ້ໃຫ້ສິດ ແລະ ຄວາມຍຸຕິທຳແກ່ຂ້ານ້ອຍ
ພຣະອົງນັ່ງຢູ່ເທິງບັນລັງໃນຖານະຜູ້ພິພາກສາທີ່ຊອບທຳ.
ພຣະອົງໄດ້ຕັກເຕືອນປະຊາຊາດທັງຫລາຍ ແລະ ທຳລາຍຄົນຊົ່ວ;
ພຣະອົງໄດ້ລຶບຊື່ຂອງພວກເຂົາອອກໄປເປັນນິດ.
ສັດຕູຂອງພວກຂ້ານ້ອຍຈິບຫາຍຕະຫລອດໄປ,
ພຣະອົງໄດ້ຖອນຮາກຖອນເຫງົ້າເມືອງຕ່າງໆຂອງພວກເຂົາ;
ແມ່ນແຕ່ຄວາມຈຳຂອງພວກເຂົາກໍໄດ້ຕາຍໄປ.
ພຣະເຈົ້າຢາເວໄດ້ຄອບຄອງຢູ່ເປັນນິດ;
ພຣະອົງໄດ້ຕັ້ງບັນລັງຂອງພຣະອົງໄວ້ເພື່ອການພິພາກສາ.
ພຣະອົງຈະປົກຄອງໂລກດ້ວຍຄວາມຊອບທຳ
ແລະ ພິພາກສາຄົນທັງຫລາຍດ້ວຍຄວາມຍຸຕິທຳ.
ພຣະເຈົ້າຢາເວເປັນທີ່ລີ້ໄພຂອງຜູ້ທີ່ຖືກກົດຂີ່ຂົ່ມເຫັງ,
ເປັນຖານທີ່ໝັ້ນໃນຍາມຍາກລຳບາກ.
ຂ້າແດ່ພຣະເຈົ້າຢາເວ ທຸກຄົນທີ່ຮູ້ຈັກນາມຂອງພຣະອົງຈະໄວ້ໃຈໃນພຣະອົງ,
ເພາະພຣະອົງບໍ່ເຄີຍປະຖິ້ມບັນດາຜູ້ທີ່ສະແຫວງຫາພຣະອົງ.
ຈົ່ງຮ້ອງເພງສັນລະເສີນພຣະເຈົ້າຢາເວ ຜູ້ຄອງບັນລັງໃນຊີໂອນ;
ຈົ່ງປະກາດສິ່ງທີ່ພຣະອົງໄດ້ກະທຳໃນທ່າມກາງປະຊາຊາດ.
ເພາະພຣະອົງຜູ້ແກ້ແຄ້ນແທນເລືອດນັ້ນບໍ່ເຄີຍລືມ;
ພຣະອົງບໍ່ເສີຍຊາຕໍ່ສຽງຮ້ອງຂອງຜູ້ທີ່ທຸກໃຈ.
ຂ້າແດ່ພຣະເຈົ້າຢາເວ ໂຜດເບິ່ງວ່າບັນດາສັດຕູຂອງຂ້ານ້ອຍໄດ້ຂົ່ມເຫັງຂ້ານ້ອຍຢ່າງໃດ!
ຂໍໂຜດເມດຕາ ແລະ ຍົກຂ້ານ້ອຍຂຶ້ນຈາກປະຕູແຫ່ງຄວາມຕາຍດ້ວຍ,
ເພື່ອຂ້ານ້ອຍຈະໄດ້ປະກາດການສັນລະເສີນຂອງພຣະອົງ.
ທີ່ປະຕູເມືອງຂອງລູກສາວແຫ່ງຊີໂອນ,1
ແລະ ຊື່ນຊົມຍິນດີໃນຄວາມພົ້ນຂອງພຣະອົງຢູ່ທີ່ນັ້ນ.
ປະຊາຊາດທັງຫລາຍໄດ້ຕົກລົງໄປໃນຂຸມທີ່ພວກເຂົາຂຸດໄວ້;
ຕີນຂອງພວກເຂົາໄດ້ຕິດກັບດັກທີ່ພວກເຂົາເອງເຊື່ອງໄວ້.
ພຣະເຈົ້າຢາເວເປັນທີ່ຮູ້ຈັກໃນດ້ານຄວາມຍຸຕິທຳຂອງພຣະອົງ;
ຄົນຊົ່ວຮ້າຍໄດ້ຕິດກັບດ້ວຍມືຂອງຕົນເອງ.
ຄົນຊົ່ວຮ້າຍກໍກັບໄປຍັງແດນຂອງຄົນຕາຍ,
ກໍຄືທຸກປະຊາຊາດທີ່ລືມພຣະເຈົ້າ.
ແຕ່ພຣະເຈົ້າຈະບໍ່ມີວັນລືມຄົນທີ່ຂັດສົນເລີຍ;
ຄວາມຫວັງຂອງຜູ້ທີ່ທຸກຍາກຈະບໍ່ຈິບຫາຍເລີຍ.
ຂ້າແດ່ພຣະເຈົ້າຢາເວ ຂໍໂຜດລຸກຂຶ້ນ ຂໍຢ່າໃຫ້ມະນຸດໄດ້ຊະນະ;
ຂໍໂຜດພິພາກສາບັນດາປະຊາຊາດຕໍ່ໜ້າພຣະອົງ.
ຂ້າແດ່ພຣະເຈົ້າຢາເວ ຂໍໂຜດໂຈມຕີພວກເຂົາດ້ວຍຄວາມສະທ້ານຢ້ານກົວ;
ໃຫ້ປະຊາຊາດທັງຫລາຍຮູ້ວ່າພວກເຂົາເປັນພຽງມະນຸດເທົ່ານັ້ນ.
Source notes (1)
- Footnote ຄື ຊາວເຢຣູຊາເລັມ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.