Biblica® Open Lao Contemporary Version
ເພງສັນລະເສີນ 84:11
Verse 11 is marked below, with the whole chapter around it. Read from the start
(ເຖິງຫົວໜ້ານັກຮ້ອງ, ທຳນອງກິດທີດບົດເພງສັນລະເສີນຂອງລູກຊາຍຂອງໂກຣາ)
ຂ້າແດ່ພຣະເຈົ້າຢາເວຜູ້ມີລິດອຳນາດຍິ່ງໃຫຍ່,
ທີ່ຢູ່ຂອງພຣະອົງງົດງາມຫລາຍ!
ຈິດໃຈຂອງຂ້ານ້ອຍກະຫາຍຫາ ເຖິງວ່າຈະໝົດແຮງ,
ປາຖະໜາທີ່ຈະເຂົ້າມາຍັງວິຫານຂອງພຣະເຈົ້າຢາເວ
ຫົວໃຈຂອງຂ້ານ້ອຍ ແລະ ຮ່າງກາຍຂອງຂ້ານ້ອຍ
ຮ້ອງຫາພຣະເຈົ້າຜູ້ມີຊີວິດຢູ່.
ແມ່ນແຕ່ນົກຈອກກໍຍັງຫາບ້ານໄດ້,
ແລະ ນົກແອ່ນຍັງພົບບ່ອນທີ່ຈະເຮັດຮັງສຳລັບຕົນເອງ
ບ່ອນທີ່ມັນຈະຮັກສາລູກນ້ອຍຂອງຕົນໄວ້
ຄືບ່ອນທີ່ໃກ້ແທ່ນບູຊາຂອງພຣະອົງ,
ຂ້າແດ່ພຣະເຈົ້າຢາເວຜູ້ມີລິດອຳນາດຍິ່ງໃຫຍ່, ກະສັດຂອງຂ້ານ້ອຍ ແລະ ພຣະເຈົ້າຂອງຂ້ານ້ອຍ.
ຄວາມສຸກມີແກ່ບັນດາຜູ້ທີ່ອາໄສຢູ່ໃນວິຫານຂອງພຣະອົງ,
ພວກເຂົາສັນລະເສີນພຣະອົງຕະຫລອດເວລາ.
ຄວາມສຸກມີແກ່ບັນດາຜູ້ທີ່ກຳລັງຂອງພວກເຂົາຢູ່ໃນພຣະອົງ,
ຜູ້ທີ່ມີໃຈຮ້ອນຮົນໄປຍັງເຢຣູຊາເລັມ.
ເມື່ອພວກເຂົາເດີນຜ່ານຮ່ອມພູແຫ່ງເບກາ,
ພວກເຂົາເຮັດໃຫ້ບ່ອນນັ້ນກາຍເປັນແຫລ່ງນ້ຳພຸ
ແລະ ຝົນລະດູໃບໄມ້ຫລົ່ນກໍເຮັດໃຫ້ເຕັມໄປດ້ວຍສະນ້ຳ.1
ພວກເຂົາມີກຳລັງເພີ່ມຂຶ້ນເລື້ອຍໆ
ຈົນແຕ່ລະຄົນໄດ້ມາເຂົ້າພົບພຣະເຈົ້າຢູ່ທີ່ຊີໂອນ.
ຂ້າແດ່ພຣະເຈົ້າຢາເວຜູ້ມີລິດອຳນາດຍິ່ງໃຫຍ່ ໂຜດຮັບຟັງຄຳອະທິຖານຂອງຂ້ານ້ອຍ;
ຂ້າແດ່ພຣະເຈົ້າຂອງຢາໂຄບ ຂໍໂຜດຮັບຟັງຂ້ານ້ອຍ.
ຂ້າແດ່ພຣະເຈົ້າ ໂຜດເບິ່ງທີ່ໂລ່2ຂອງພວກຂ້ານ້ອຍ
ຂໍເບິ່ງຜູ້ທີ່ເຈີມຕັ້ງໄວ້ດ້ວຍຄວາມພໍໃຈຂອງພຣະອົງ.
ວັນດຽວໃນວິຫານຂອງພຣະອົງ
ກໍດີກວ່າພັນວັນໃນທີ່ອື່ນໃດ;
ຂ້ານ້ອຍຂໍເປັນຄົນເຝົ້າປະຕູປະຈຳວິຫານຂອງພຣະເຈົ້າຂອງຂ້ານ້ອຍ
ດີກວ່າຢູ່ໃນເຕັນຂອງຄົນຊົ່ວຮ້າຍ.
ເພາະພຣະເຈົ້າຢາເວ ພຣະເຈົ້າເປັນດວງຕາເວັນ ແລະ ໂລ່ກຳບັງ;
ພຣະເຈົ້າຢາເວໃຫ້ຄວາມພໍໃຈ ແລະ ກຽດຕິຍົດ
ບໍ່ມີສິ່ງດີອັນໃດທີ່ພຣະອົງໜ່ວງໜ່ຽວໄວ້
ຈາກບັນດາຜູ້ທີ່ດຳເນີນຊີວິດຢ່າງບໍ່ມີຕຳໜິ.
ຂ້າແດ່ພຣະເຈົ້າຢາເວ ຜູ້ມີລິດອຳນາດຍິ່ງໃຫຍ່,
ຄວາມສຸກມີແກ່ບັນດາຜູ້ທີ່ໄວ້ວາງໃຈໃນພຣະອົງ.
Source notes (2)
- Footnote ຫລື ພຣະພອນ
- Footnote ຫລື ກະສັດຜູ້ຄອບຄອງ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.