Biblica® Open Lao Contemporary Version
ເພງສັນລະເສີນ 83
(ບົດເພງ ບົດເພງສັນລະເສີນຂອງອາສັບ)
ຂ້າແດ່ພຣະເຈົ້າ ຂໍຢ່າມິດງຽບຢູ່
ຂໍຢ່າເຮັດຄືຫູໜວກ,
ຂ້າແດ່ພຣະເຈົ້າ ຂໍຢ່າຢືນຢູ່ຫ່າງເລີຍ.
ໂຜດເບິ່ງວ່າສັດຕູຂອງພຣະອົງນັ້ນແຜດສຽງຢ່າງໃດ
ບັນດາສັດຕູຂອງພຣະອົງເຊີດໜ້າຊູຄໍຂອງຕົນຢ່າງໃດ.
ພວກເຂົາສົມຮູ້ຮ່ວມຄິດກັນຕໍ່ສູ້ຄົນຂອງພຣະອົງດ້ວຍອຸບາຍ;
ພວກເຂົາວາງແຜນຈັດການກັບບັນດາຜູ້ທີ່ພຣະອົງທະນຸຖະໜອມ.
ພວກເຂົາເວົ້າກັນວ່າ “ມາແມ, ໃຫ້ພວກເຮົາທຳລາຍຊົນຊາດອິດສະຣາເອນ,
ເພື່ອບໍ່ໃຫ້ຊື່ຂອງອິດສະຣາເອນເປັນທີ່ຈົດຈຳອີກຕໍ່ໄປ”.
ພວກເຂົາໄດ້ພ້ອມໃຈກັນວາງແຜນ
ພວກເຂົາໄດ້ລວມໂຕກັນເປັນພັນທະມິດຕໍ່ຕ້ານພຣະອົງ
ໄດ້ແກ່ເຕັນຂອງຊາວເອໂດມ ແລະ ອິດຊະມາເອນ,
ຂອງຊາວໂມອາບ ແລະ ຊາວຮັກກິດ,
ຂອງຊາວເກບານ,1 ຊາວອຳໂມນ ແລະ ຊາວອາມາເຫລັກ,
ຂອງຊາວຟີລິດສະຕິນ ແລະ ຊາວຕີເຣ.
ແມ່ນແຕ່ອັດຊີເຣຍກໍຍັງເຂົ້າມາສົມທົບກັບພວກເຂົາ
ເພື່ອເສີມກຳລັງລູກຫລານຂອງໂລດ.
ຂໍໃຫ້ເຮດກັບພວກເຂົາເໝືອນກັບທີ່ເຮັດກັບຊາວມີດີອານ,
ເໝືອນຢ່າງທີ່ເຮັດກັບສີເສຣາ ແລະ ຢາບິນທີ່ແມ່ນ້ຳກີໂຊນນັ້ນ,
ຜູ້ທີ່ພິນາດຈິບຫາຍທີ່ເອນໂດເຣ
ແລະ ກາຍເປັນເໝືອນຂີ້ເຫຍື້ອທີ່ຢູ່ເທິງພື້ນດິນ.
ຂໍເຮັດໃຫ້ຂຸນນາງທັງຫລາຍຂອງພວກເຂົາເປັນເໝືອນໂອເຣັບ ແລະ ເຊເອັບ,
ໃຫ້ບັນດາເຈົ້ານາຍຂອງພວກເຂົາເປັນເໝືອນເຊບາ ແລະ ຊັນມູນນາ,
ເປັນຜູ້ທີ່ເວົ້າວ່າ “ໃຫ້ພວກເຮົາຢຶດເອົາທົ່ງຫຍ້າຂອງພຣະເຈົ້າ
ມາເປັນກຳມະສິດ”.
ພຣະເຈົ້າຂອງຂ້ານ້ອຍ ຂໍໂຜດເຮັດໃຫ້ພວກເຂົາເປັນເໝືອນສັດຕູພືດ,
ເປັນເໝືອນແກບທີ່ປິວໄປຕາມລົມ.
ເໝືອນໄຟໄໝ້ປ່າໄມ້
ຫລື ເປັນເໝືອນແປວໄຟທີ່ເຮັດໃຫ້ພູເຂົາລຸກໄໝ້,
ດັ່ງນັ້ນ ຂໍໂຜດໄລ່ຕາມພວກເຂົາໄປດ້ວຍລົມພະຍຸຂອງພຣະອົງ
ແລະ ເຮັດໃຫ້ພວກເຂົາຢໍາເກງດ້ວຍພະຍຸຂອງພຣະອົງ.
ຂ້າແດ່ພຣະເຈົ້າຢາເວ ຂໍໂຜດປົກປິດໜ້າຂອງພວກເຂົາດ້ວຍຄວາມອັບອາຍ,
ເພື່ອພວກເຂົາຈະໄດ້ສະແຫວງຫານາມຂອງພຣະອົງ,
ຂໍໃຫ້ພວກເຂົາອັບອາຍ ແລະ ທໍ້ຖອຍຕະຫລອດໄປ;
ຂໍໃຫ້ພວກເຂົາຈິບຫາຍໄປດ້ວຍຄວາມອັບອາຍ.
ໃຫ້ພວກເຂົາຮູ້ວ່າ ພຣະອົງຜູ້ມີນາມວ່າພຣະເຈົ້າຢາເວ
ພຣະອົງຜູ້ດຽວເທົ່ານັ້ນທີ່ເປັນອົງຜູ້ສູງສຸດເໜືອໂລກນີ້.
Source notes (1)
- Footnote ຄື ໄບບະຫລອດ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.